Al‑gawaaniin al‑bukhussu al‑malik
46
1 Daahu Allah al‑Rabb gaal :
« Al‑baab hana beet al‑madkhal al‑sabhaani al‑yaftah fi l‑fadaay al‑dakhlaaniiye yagood masduud le muddit sitte yoom hana khidme fi ayyi subuuʼ.
Wa laakin yaftahooh fi kulli yoom sabt wa battaan kula yaftahooh fi awwal yoom fi kulli chahar.
2 Wa min al‑fadaay al‑barraaniiye,
al‑malik yadkhul fi khurfit al‑madkhal wa yagiif jamb iidaan al‑baab.
Wa rujaal al‑diin yigaddumu leyah dahiiytah al‑muharraga wa dahiiytah al‑salaama wa hu yasjud fi khachum al‑baab.
Wa baʼad da,
yamrug wa ma yisiddu al‑baab da gubbaal al‑achiiye.
3 Wa chaʼab al‑balad yasjudu le Allah fi khachum al‑baab da fi kulli yoom sabt wa awwal yoom fi kulli chahar.
4 « Wa fi kulli yoom sabt,
al‑malik yigaddim dahaaya muharragiin le Allah.
Wa l‑bahaayim al‑yigaddimhum,
humman sitte kharuuf wa kabich waahid al‑ma induhum ayyi eeb.
5 Wa yigaddim hadaaya 10 kooro hana dagiig maʼa ayyi kabich wa maʼa l‑khurfaan kamaan,
yigaddim dagiig hasab al‑tantiih iidah.
Wa yiziid foogah 6 liitir hana dihin fi l‑achara kooro hana l‑dagiig.
6 Wa fi awwal yoom fi kulli chahar,
al‑malik yigaddim toor waahid wa sitte kharuuf wa kabich waahid al‑ma induhum ayyi eeb.
7 Wa yigaddim hadaaya 10 kooro hana dagiig maʼa ayyi toor wa ayyi kabich.
Wa maʼa l‑khurfaan kamaan,
yigaddim dagiig hasab al‑tantiih iidah.
Wa yiziid foogah 6 liitir hana dihin fi l‑achara kooro hana l‑dagiig.
8 « Wa wakit al‑malik yadkhul,
hu yadkhul be l‑baab hana khurfit al‑madkhal wa yamrug be nafs al‑baab da.
9 Wa wakit al‑chaʼab yaju giddaami ana Allah fi wakit al‑munaasabaat,
al‑naas al‑yadkhulu be l‑baab al‑munchaakhi le yasjudu,
yamurgu be l‑baab al‑watiyaani.
Wa l‑naas al‑yadkhulu be l‑baab al‑watiyaani yamurgu be l‑baab al‑munchaakhi.
Wa be da,
ma waajib yamurgu be l‑baab al‑dakhalo beyah laakin yamurgu be l‑baab al‑mugaabilah.
10 Wa l‑malik yadkhul maʼaahum wakit yadkhulu wa yamrug maʼaahum wakit yamurgu.
11 « Wa fi l‑aʼyaad wa l‑munaasabaat,
yigaddim hadaaya 10 kooro hana dagiig maʼa ayyi toor wa ayyi kabich.
Wa maʼa l‑khurfaan kamaan,
yigaddim dagiig hasab al‑tantiih iidah.
Wa yiziid foogah 6 liitir hana dihin fi l‑achara kooro hana l‑dagiig.
12 Wa ayyi wakit al‑malik indah niiye yigaddim dahiiye muharraga aw dahiiyat al‑salaama leyi ana Allah,
yaftaho leyah baab beet al‑madkhal al‑sabhaani.
Wa be da,
hu yigaddim dahiiytah al‑muharraga aw dahiiytah hana l‑salaama misil hu yigaddimhum fi ayyi yoom al‑sabt.
Wa baʼad da,
hu yamrug wa yisiddu al‑baab min hu marag bas.
13 « Wa kulla yoom,
tigaddumu kharuuf wald sana al‑ma indah ayyi eeb dahiiye muharraga leyi ana Allah wa da tigaddumuuh kulli fajur.
14 Wa kulli fajur,
tigaddumu leyi ana Allah hadiiye hana dagiig maʼa l‑kharuuf da wa hi kooro wa nuss hana dagiig wa dihin liitreen al‑yikhalbutu beyah al‑dagiig.
Wa da chart daayim ila l‑abad.
15 Wa kulli fajur,
tigaddumu al‑kharuuf wa hadiiyat al‑dagiig wa l‑dihin hadiiye muharraga ila l‑abad. »
16 Wa daahu Allah al‑Rabb gaal :
« Kan al‑malik yanti hadiiye le waahid min awlaadah,
al‑hadiiye di tabga warasa le l‑wileed da.
Wa l‑warasa di tabga hintah halaalah wa baʼadeen,
yawrusuuha iyaalah.
17 Wa laakin kan al‑malik yanti hadiiye min warasatah le waahid min abiidah,
al‑hadiiye di tabga hint al‑abid lahaddi sanit al‑Hurriiye.
Wa baʼad da,
al‑warasa di tigabbil le l‑malik.
Wa be da,
hagg al‑malik yagood warasa le iyaalah bas.
18 Wa l‑malik ma yichiil cheyy min warasat al‑chaʼab wa ma yazlumhum fi hagguhum.
Wa cheyy al‑haggah hu bas yantiih le iyaalah warasa.
Achaan ma fi naadum waahid min chaʼabi yadharooh min warasatah. »
Al‑ladaay fi beet Allah
19 Wa l‑raajil waddaani jamb beet al‑madkhal al‑munchaakhi.
Wa hinaak,
dakhalna be l‑madkhal jamb al‑khuraf al‑mukhassasiin le rujaal al‑diin al‑yaftaho munchaakh.
Wa fi l‑bakaan da,
fiyah faraga be l‑nuss al‑kharbaani.
20 Wa l‑raajil gaal leyi :
« Da l‑bakaan al‑foogah rujaal al‑diin yirakkubu al‑dahaaya le kaffaarat al‑khata wa l‑dahaaya le kaffaarat al‑zanib.
Wa humman yirakkubu al‑dahaaya dool fi l‑faraga di wa ma yamurguuhum ale l‑fadaay al‑barraaniiye.
Wa da achaan ma yikhassusu al‑chaʼab. »
21 Wa baʼad da,
al‑raajil maragaani ale l‑fadaay al‑barraaniiye wa waddaani ale l‑arbaʼa rukun hana l‑fadaay.
Wa fi ayyi rukun,
fiyah fadaay sakhayre.
22 Wa l‑fadaayaat hana l‑arbaʼa rukun dool dugaag wa induhum nafs al‑magaas.
Ayyi waahide tuulha 40 duraaʼ wa urdaha 30 duraaʼ.
23 Wa kulla l‑fadaayaat al‑arbaʼa dool muhawwagiin be durdur wa khatto ladaay fi gaʼar al‑durdur da fi kulla daayirah.
24 Wa l‑raajil gaal leyi :
« Dool al‑ladaay al‑fooghum khaddaamiin beet Allah yirakkubu al‑dahaaya hana l‑chaʼab. »