Kitaab Maraasi Irmiya
min Kutub al‑Anbiya
Mugaddima
Al‑kitaab da hu kitaab al‑binaaduuh Maraasi Irmiya. Wa maraasi da maʼanaatah nuwaah wa l‑nuwaah hu al‑khine fi wakt al‑hizin. Wa l‑kitaab da hu nuwaah le Madiinat al‑Khudus fi wakit damaarha wa buguulu al‑nabi Irmiya bas katabah.
Wa l‑kitaab yihajji be damaar Madiinat al‑Khudus wakit askar Baabil haasarooha. Wa l‑hisaar da gaʼad muddit siniin wa l‑juuʼ fi l‑madiina bigi chadiid marra waahid lahaddi al‑naas tiʼibo wa maato min al‑juuʼ. Wa fi l‑akhiir, askar Baabil hajamo al‑madiina wa chaalooha. Harragooha wa dammaro beet Allah wa chaalo min chaʼabha wa waddoohum fi l‑khurba fi Baabil. Wa be da, mamlakat Yahuuza bigat ma fiiha lahaddi Allah haggag waʼadah wa gabbal naasha min al‑khurba wa sabbathum battaan fi baladhum. Wa l‑kitaab da yiwassif kadar chaʼab Allah haznaaniin le damaar madiinithum wa laakin be da kula, irfo kadar kheer Allah wa rahmatah ma yikammulu wa gaaʼidiin daayman. Wa da bas khallaahum yukhuttu achamhum fi l‑Rabb.
Al‑kitaab da yihajji be Sahyuun wa Sahyuun da bas al‑jabal al‑gaaʼide foogah Madiinat al‑Khudus. Wa beet Allah gaaʼid fi lubb al‑madiina di. Wa fi l‑nuwaah da, al‑nabi yimassil Madiinat al‑Khudus misil hi bineeye samha wa udriiye wa da min hubbah le l‑madiina di wa le sukkaanha.
Wa l‑aayaat min fasul 1 lahaddi fasul 4, rassoohum hasab nizaam al‑huruuf al‑hijaaʼiiye hana l‑lukhkha al‑asliiye wa hi al‑ibraaniiye. Al‑aaya al‑awwalaaniiye tabda be l‑harif al‑awwalaani wa l‑aaya al‑taaniye tabda be l‑harif al‑taani wa yamchi misil da lahaddi al‑harif al‑akhiir.