Kitaab Hizgiyaal
min Kutub al‑Anbiya
Mugaddima
Al‑kitaab da, Hizgiyaal bas katabah wa hu waahid min aayilaat rujaal al‑diin al‑karabooh wa waddooh fi Baabil fi l‑khurba. Wa da gubbaal Nabuukhadnasar malik Baabil ma chaal Madiinat al‑Khudus wa la dammar beet Allah. Wa hinaak fi Baabil, Allah naada Hizgiyaal fi ruʼya wa sawwaah nabi. Wa kallafah le yihajji kalaamah le naas Bani Israaʼiil al‑maʼaayah fi Baabil wa hu hajja leehum le muddit ichriin sana.
Bidaayit al‑kitaab da yihajji be l‑kalaam al‑Hizgiyaal hajjaah le Bani Israaʼiil wakit hazzaraahum be kikkeef Allah khidib didduhum fi chaan amalhum al‑cheen wa charmatathum wara l‑asnaam. Wa baʼad da, al‑kitaab yihajji be ikhaab Allah le l‑umam al‑aakhariin misil balad Adoom wa Muwaab wa Suur wa Masir. Wa fi l‑akhiir, ikhaab Allah yanzil fi muluuk Juuj wa Maajuuj kula.
Wa l‑kitaab da yihajji be kikkeef Allah yigabbil chaʼabah fi balad Israaʼiil al‑maragaahum minha. Wa humman yagoodu foogha be amaan wa hu yibaarikhum. Wa Allah yisawwi maʼaahum muʼaahada jadiide al‑tabga daayme wa hu yabga Ilaahhum wa humman yabgo chaʼabah.
Fi aakhir al‑kitaab, da yihajji be l‑ruʼya al‑Allah wassafha le Hizgiyaal al‑tukhuss beet Allah wa fadaayaatah wa khurafah al‑baʼadeen yabnuuhum. Wa battaan wassafah al‑almi al‑yamrug min al‑beet al‑mukhaddas wa yinawwir kulla l‑ard wa yanti al‑haya le kulla l‑makhluugiin.