Kitaab Maraasi Irmiya
min Kutub al‑Anbiya
Taʼab Sahyuun al‑misil bineeye
1
1 Ya l‑salaam !
Al‑madiina amchaʼaban katiir
bigat maʼzuula
misil armala ma indaha musaaʼada.
Awwal,
hi fi l‑umam sayyida
wa l‑yoom,
bigat khaadim mamluuka.
2 Hi tabki,
tabki tuul al‑leel
be kulla gudritha
wa min sudgaanha,
ma fi sadiig al‑yisabbirha.
Kulla rufgaanha khaanooha
wa bigo udwaanha.
3 Tihit al‑taʼab hana l‑khurba,
balad Yahuuza waddooha fi l‑ubuudiiye.
Wa aayche fi ust al‑umam bala raaha
wa udwaanha al‑taaradooha
fi l‑derib al‑dayyig zarrooha.
4 Wa chawaariʼ Sahyuun hizno
wa ma fi naas maachiin le l‑iid
wa kulla biibaan al‑madiina daffago.
Wa rujaal al‑diin hineeha yaguntu
wa banaatha al‑udriiyaat haznaanaat
wa madiinat Sahyuun gaaʼide fi l‑murr.
5 Wa khusmaanha bigo siyaadha
wa udwaanha gaaʼidiin fi l‑raaha.
Wa Allah jaab foogha al‑hizin
be sabab kutur isyaanha.
Wa karabo iyaalha
wa waddoohum abiid.
6 Wa madiinat Sahyuun al‑misil bineeye
waddarat kulla charafha.
Wa daahu kubaaraatha bigo misil teetal
al‑ma ligo bakaan marʼaahum
wa arrado bala gudra
giddaam tarraadiinhum.
7 Wa fi ayyaamha hana l‑diige wa l‑taʼab,
Madiinat al‑Khudus azzakkarat kulla chahwaatha
al‑zamaan gaaʼide tafrah beehum.
Wa wakit chaʼabha wagaʼo
fi iideen khusmaanhum,
ma fi naadum al‑yafzaʼhum.
Wa khusmaanha chaafooha
wa firho be damaarha.
8 Madiinat al‑Khudus aznabat
wa be da,
najjasat nafisha.
Wa kulla l‑naas al‑zamaan karramooha,
hassaʼ nakarooha achaan chaafo ireeha.
Wa laakin hi gaaʼide tagnit
wa tantiihum daharha.
9 Wa be najaasitha fi surwaalha,
hi ma fakkarat fi mustakhbalha.
Wa wagaʼaanha bigi ajiib
wa ma fi naadum al‑yisabbirha.
Wa Madiinat al‑Khudus gaalat :
« Ya Allah,
chiif taʼabi
achaan al‑adu annasar foogi ! »
10 Wa l‑khasiim khatta iideenah
fi kulla ziinat beetha al‑tafrah beeha.
Aywa,
fi l‑beet al‑mukhaddas
dakhalo umam al‑inta Allah gult
ma yadkhulu fi bakaan jamaaʼtak.
11 Wa kulla chaʼabha gaaʼidiin yaguntu
wakit yifattuchu al‑akil.
Wa yibaddulu kulla ziinat buyuuthum
al‑yafraho beeha
be akil achaan yiʼiichu.
Wa Sahyuun gaalat :
« Ya Allah !
Asmaʼ
wa chiif kikkeef ana mahguura.
12 Wa leeku intu kulluku
al‑tiʼaddu be l‑derib da,
asmaʼo wa chiifu !
Fiyah taʼab ziyaada
min taʼabi al‑ana aayche beyah ?
Wa da l‑taʼab al‑jaabah Allah
fi yoom khadabah al‑muhrig.
13 Min al‑sama,
hu rassal khadabah
misil naar dakhalat fi udaami.
Wa kajja leyi charak
wa beyah ramaani.
Wa dassaani fi l‑kharaab
wa nagnit tuul yoomi.
14 Hu zaatah chaal zunuubi
wa sawwaahum misil daami.
Wa rabataahum leyi fi ragabati
wa be da,
waddart gudurti.
Wa l‑Rabb sallamaani le iid udwaani
wa ma nagdar nugumm min tihithum.
15 Wa l‑Rabb aba kulla rujaali al‑furraas
al‑gaaʼidiin maʼaayi
wa jaab diddi deech
le yaktul chabaabi.
Wa khatta balad Yahuuza al‑misil bineeye udriiye
been al‑murhaaka wa bittaha le yarhakha.
16 Wa fi chaan da,
ana bakeet
wa dumuuʼi jaro wudyaan
achaan al‑yisabbirni
wa l‑yihayyiini bigi baʼiid minni.
Wa iyaali hilko
achaan al‑adu annasar foogi. »
17 Sahyuun rafaʼat iideenha wa naadat
wa laakin ma ligat naadum al‑yisabbirha.
Wa Allah anta izin le jiiraan zurriiyit Yaakhuub
yabgo udwaanhum.
Wa fi uyuunhum,
Madiinat al‑Khudus
malaane be l‑najaasa.
18 Wa Madiinat al‑Khudus gaalat :
« Allah aadil
achaan ana isiit amrah.
Asmaʼo,
ya kulla l‑chuʼuub,
wa chiifu taʼabi.
Kulla subyaani wa banaati karaboohum
wa waddoohum fi l‑khurba.
19 Wa ana naadeet sudgaani
wa laakin humman khachchooni.
Rujaal al‑diin wa chuyuukhi maato
fi l‑madiina
wakit humman fattacho al‑akil
le yiʼiichu beyah wa ma ligooh.
20 Ya Allah,
chiif al‑diige al‑foogi !
Nafsi mubarjala wa galbi munjarih
achaan ana isiitak isyaan chadiid.
Kan maragt fi l‑chaariʼ,
al‑moot yilaagiini
wa kan gaʼadt fi l‑beet,
al‑seef yagtaʼ ragabati.
21 Udwaani simʼo ganiiti
wa laakin ma fi naadum al‑yisabbirni.
Kulluhum simʼo be hizni
wa farhaaniin beyah.
Wa da kulla inta bas jaʼaltah
wa jibt yoom al‑ikhaab al‑inta gataʼtah.
Wa khalli udwaani yabgo misli ana !
22 Jiibhum giddaamak
be kulla l‑fasaala al‑sawwooha.
Wa sawwi fooghum misil sawweet foogi
be sabab kulla isyaani.
Achaan ganiiti bigi katiir
wa nafsi bigat mardaane. »