Ikhaab Madiinat al‑Khudus
2
1 Ya l‑salaam !
Fi khadabah,
al‑Rabb khatta be l‑dalaam
madiinat Sahyuun al‑misil bineeye.
Min al‑sama,
rama majd Israaʼiil fi l‑ard
wa fi yoom khadabah,
ma fakkar fi beetah al‑mukhaddas.
2 Al‑Rabb dammar bala mahanna
kulla gechch al‑marʼa hana zurriiyit Yaakhuub.
Wa fi khadabah,
kassar al‑buyuut al‑gawiyiin
hana balad Yahuuza al‑misil bineeye.
Wa rama al‑mamlaka wa kubaaraatha fi l‑turaab
wa ma jaʼalaahum mukhassasiin leyah.
3 Wa yoom khadabah al‑muhrig,
hu dammar kulla khuwwaat Bani Israaʼiil.
Wa rafaʼ minhum iidah al‑zeene
wa sallamaahum le udwaanhum.
Wa gawwam hariige amlahiib
akalat kulla hawaale zurriiyit Yaakhuub.
4 Wa misil adu,
jabad nubbaalah
wa misil khasiim,
be iidah al‑zeene
gaaʼid yisawwib fooghum.
Hu katal kulla iyaalhum
al‑humman ziinat buyuuthum.
Wa nazzal khadabah misil naar
fi kheemat Sahyuun al‑misil bineeye.
5 Al‑Rabb bigi misil adu dammar Israaʼiil
wa dammar kulla daraadirha
wa kharab buyuutha al‑gawiyiin.
Wa fi balad Yahuuza al‑misil bineeye,
kattar al‑hizin wa l‑nuwaah.
6 Hu kharab zariibtah
misil zariibe hana jineene
wa Allah dammar bakaanah
hana l‑malamma.
Wa fi Sahyuun,
hu nassaahum
yoom al‑iid wa yoom al‑sabt.
Wa min chiddit khadabah,
hu abaahum le l‑muluuk wa rujaal al‑diin.
7 Wa l‑Rabb aba al‑madbah
wa le bakaanah al‑mukhaddas,
khallaah.
Wa sallam daraadir buyuut al‑gawiyiin hana l‑madiina
fi iid al‑adu.
Wa ansamaʼat haraka chadiide fi beet Allah
misil al‑haraka al‑chadiide hana yoom al‑iid.
8 Wa Allah kharrar
yidammir daraadir madiinat Sahyuun al‑misil bineeye.
Hu ma waggaf iidah min al‑damaar
lahaddi kulla cheyy khalaas addammar.
Wa hu darab al‑bakaan al‑gawi wa l‑daraadir
wa kulluhum daffago giddaamah.
9 Wa biibaan madiinat Sahyuun andafano fi l‑turaab
wa hu dammaraahum
wa kassar hawaadirhum.
Wa l‑malik wa kubaaraatah ankarabo
fi iideen al‑umam al‑aakhariin.
Wa churuut al‑Tawraat waddaro
wa l‑anbiya kula ma ligo ruʼya min Allah.
10 Wa madiinat Sahyuun al‑misil bineeye,
chuyuukhha gaʼado tihit bala kalaam
wa sabbo al‑turaab fi ruuseehum
wa libso khulgaan al‑hizin.
Wa banaat Madiinat al‑Khudus al‑udriiyaat
dangaran ruuseehin ale l‑ard min al‑hizin.
11 Wa uyuuni dumuuʼhum kammalo
wa butuuni hirgo
wa gudurti bigat ma fiiha
be sabab al‑damaar al‑lihig ummati al‑misil bitt ammi.
Wakit al‑atfaal wa l‑iyaal al‑dugaag
gaaʼidiin yakhmaro fi chawaariʼ al‑madiina,
12 humman yuguulu le ammahaathum :
« Antuuna akil wa charaab ! »
Wa yidaffugu fi chawaariʼ al‑madiina
misil almi al‑yajri
wa ruuhhum gaaʼide tamrug
fi huduun ammahaathum.
13 Ya Madiinat al‑Khudus al‑misil bineeye,
be chunu nichabbihki ?
Wa chunu al‑yisaawiiki wa yisabbirki,
ya Sahyuun al‑misil bineeye udriiye ?
Damaarki bigi wasiiʼ misil al‑bahar
wa yaatu al‑yagdar yisaaʼidki ?
14 Be ruʼya saakit,
anbiyaaki hajjooki
wa ma oorooki be l‑khata
al‑inti sawweetiih
achaan tutuubi
wa ma yiwadduuki fi l‑khurba.
Be ruʼya,
hajjooki
wa be kalaam kidib,
khachchooki.
15 Wa kulla l‑naas al‑faaytiin
be l‑derib jambiki
yisaffugu le kharaabki.
Aywa,
yisaffuru wa yihizzu ruuseehum leeki inti,
ya Madiinat al‑Khudus al‑misil bineeye,
wa yuguulu :
« Di bas al‑madiina al‑binaaduuha
Amjamaalan Kaamil ?
Di bas al‑bisammuuha
Farah al‑Dunya walla ? »
16 Kulla udwaanki fataho khuchuumhum
wa alkallamo beeki.
Humman saffaro
wa addo chalaaliifhum wa gaalo :
« Khalaas dammarnaaha !
Da bas al‑yoom al‑gaaʼidiin narjooh
wa daahu hidirnaah wa chifnaah. »
17 Allah sawwa hasab hu dawwarah
wa haggag kalaamah al‑waaʼad beyah min zamaan
wa dammar kulla cheyy bala mahanna.
Wa khalla udwaanki yichchammato leeki
wa antaahum gudra le yagiifu diddiki.
18 Sukkaan al‑madiina sarakho le l‑Rabb
min daakhal guluubhum.
Ya daraadir Sahyuun !
Ya madiinat Sahyuun al‑misil bineeye !
Dumuuʼki saalo leel wa nahaar
wa bigo misil al‑wudyaan.
Ma tanti nafiski raaha
wa uyuunki kula ma yinjammo.
19 Yalla gummi wa abki
min bidaayit al‑leel
lahaddi aakhirah !
Wa khalli galibki yingatiʼ misil al‑almi
giddaam al‑Rabb.
Wa arfaʼe iideenki wa achhade Allah
le yinajji iyaalki al‑yumuutu min al‑juuʼ
fi kulla machbak al‑chawaariʼ.
20 Asmaʼ wa chiif,
ya Allah !
Le yaatu inta sawweet al‑masiibe di ?
Maala al‑awiin akalan iyaalhin
al‑yiriidanhum ?
Wa maala kataloohum le rujaal al‑diin
wa l‑anbiya fi beetak al‑mukhaddas ?
21 Wa fi kulla chawaariʼ al‑madiina,
mudaffigiin iyaal wa chiyyaab.
Wa l‑madiina gaalat :
« Banaati wa subyaani kataloohum
be l‑seef.
Fi yoom zaʼalak,
inta Allah dammart
wa bala mahanna,
inta katalt.
22 Wa misil yoom al‑iid,
inta naadeet kulla udwaani al‑mujaawiriinni.
Ya Allah,
fi yoom khadabak
ma fi naja wa la haya.
Al‑iyaal al‑ana rabbeethum wa kabbartuhum,
al‑adu dammaraahum. »