Fi l‑diige, atwakkal ale Allah
3
1 Wa l‑nabi gaal :
Ana al‑raajil al‑icht al‑azaab
tihit soot khadab Allah.
2 Hu taradaani wa waddaani
fi l‑dalaam al‑ma indah nuur.
3 Aywa,
kulla yoom yadrubni
iddat marraat
ana wiheedi.
4 Wa hu dammar laham jildi
wa rihik udaami.
5 Wa sajanaani
wa be l‑murr wa l‑taʼab,
hawwagaani.
6 Wa sakkanaani fi dalaam al‑khabur
misil al‑maato min zamaan.
7 Wa sadda leyi al‑tariig achaan ma najri
wa zaad janaaziiri.
8 Ana koorakt wa dawwart al‑fazaʼ
wa laakin hu aba ma simiʼ chihidti.
9 Be hujaar kubaar,
gaffal duruubi
wa gamma sadda maraahiili.
10 Hu bigi leyi misil nimir al‑kaaris
wa duud mullabbid al‑haaris.
11 Hu maragaani min duruubi
wa gattaʼaani lahamaay lahamaay
wa kharabaani.
12 Wa jabad nubbaalah
wa khattaani hadaf le nuchchaabah.
13 Wa zarrag kulla nachaachiibah
wa beehum gaddad sadri.
14 Ana bigiit madhaka le kulla chaʼabi
wa daayman yikhannu
wa yichchammato foogi.
15 Wa hu chabbaʼni be l‑hamdal
wa rawaani be maraar al‑sibir.
16 Wa kassar sunuuni be madkh al‑hashas
wa marmakhaani fi l‑rumaad.
17 Wa baʼʼadaani min al‑salaama
wa ana nisiit halaat al‑dunya.
18 Wa fi chaan da,
ana gult :
« Abadan ma indi mustakhbal
wa ma fi cheyy al‑narjaah min Allah. »
19 Wakit nifakkir fi taʼabi wa haalti fi l‑hamm,
da misil maraar al‑sibir wa l‑samm.
20 Wakit ana nizzakkar tamaam,
nafsi tatʼab ziyaada.
21 Wa laakin fi galbi ana gult :
« Aywa,
indi acham. »
22 Kheer Allah abadan ma yingatiʼ
wa rahmatah abadan ma tikammil !
23 Aywa,
hi tiljaddad kulli sabaah
wa amaanah yabga ziyaada.
24 Wa ma faddal leyi illa Allah
wa ana nukhutt achami foogah.
25 Allah hu zeen le l‑yarjaah
wa hu adiil le l‑yifattichah.
26 Wa da sameh kan tarja be hudu
wa tukhutt achamak
fi l‑naja al‑jaaye min Allah.
27 Sameh le l‑raajil
yuduukh al‑taʼab fi subaayah.
28 Wa waajib yagood wiheedah wa yaskut
achaan Allah bas jaʼalah leyah.
29 Wa l‑yasjud le Allah be galib waahid
laabudda yalga acham.
30 Yanti chidgah le l‑yadurbah
wa yachbaʼ min al‑muʼyaar.
31 Achaan al‑Rabb ma yaaba al‑insaan
ila l‑abad.
32 Hatta kan aakhab kula,
yarham
wa da hasab kheerah al‑kabiir.
33 Achaan hu ma yihibb yitaʼʼib al‑insaan
wa la yijiib leyah al‑hizin.
34 Wakit yiʼazzubu
kulla masaajiin al‑balad
35 wa wakit ma yihtarumu huguug al‑insaan
giddaam Allah al‑Aali
36 wa wakit yiʼawwuju al‑chariiʼa,
al‑Rabb ma yichiifah walla ?
37 Yaatu yagdar yikharrir
wa tawwaali yukuun ?
Al‑Rabb bas ma siid al‑kharaar ?
38 Wa ma min Allah al‑Aali bas
yaji al‑kheer wa l‑charr walla ?
39 Wa maala al‑insaan al‑hayy yachki
min ikhaab zunuubah ?
40 Khalli nichiifu amalna wa nawzunuuh
wa nigabbulu le Allah.
41 Wa fi nafs al‑wakit,
narfaʼo iideenna
wa nantu guluubna le l‑Rabb al‑gaaʼid fi l‑sama.
42 Wa nuguulu :
« Aniina khitiina wa isiinaak
wa inta ma khafart leena.
43 « Wa fi zaʼalak al‑chadiid,
inta gammeet diddina
wa kataltina bala mahanna.
44 Wa khatteet beenna wa beenak sahaab
achaan salaawaatna ma yawsalook.
45 Wa inta jaʼaltina misil al‑wasaakha wa l‑afaana
been al‑chuʼuub. »
46 Wa kulla udwaanna fataho khuchuumhum
wa ayyaroona.
47 Wa khalaas,
wagaʼ foogna
al‑ruʼub wa l‑halaak
wa l‑damaar wa l‑kharaab.
48 Dumuuʼi yajru wudyaan
fi chaan kharaab ummati al‑misil bitt ammi.
49 Wa dumuuʼi saalo
wa abadan ma wagafo
50 lahaddi Allah min al‑sama
yanzur wa yichiif.
51 Wa ma nagdar nichiif al‑cheyy
al‑kaan le banaat madiinti.
52 Al‑bigo udwaani bala janiiye
kajjo leyi charak
wa misil al‑teer,
karabooni.
53 Wa fi nugra,
zagalooni
wa khatto hajar min foog leyi.
54 Wa almi khatta raasi
lahaddi gult fi nafsi :
« Ana numuut ! »
55 Min gaʼar al‑nugra,
naadeet usmak,
ya Allah.
56 Wa inta simiʼt hissi
wa hassaʼ,
asmaʼ darabaan galbi
wa munaadaati.
57 Wakit naadeetak,
inta garrabt leyi
wa gult leyi :
« Ma takhaaf ! »
58 Ya Rabb,
inta daafaʼt leyi
wa fadeet hayaati.
59 Inta chift kikkeef zalamooni.
Ya Allah,
ahkim wa kaafiini daliimti.
60 Inta chift afkaarhum
wa kikkeef alkaffo al‑taar.
61 Ya Allah,
inta simiʼt muʼyaarhum
wa chift afkaarhum.
62 Wa khuchuum udwaani
yilkhaalo tuul al‑yoom diddi.
63 Kan humman gaaʼidiin tihit
walla waagfiin foog kula,
chiifhum !
Ana bigiit khineehum
hana l‑chamaate.
64 Ya Allah !
Gabbil leehum fi raashum
nafs al‑amal al‑sawwooh.
65 Wa agfil guluubhum
wa nazzil laʼanatak fooghum.
66 Ya Allah,
fi khadabak,
gumm fooghum
wa min tihit samaawaatak,
kammilhum.