Al‑taʼab al‑ja fi Madiinat al‑Khudus
4
1 Ya l‑salaam !
Al‑dahab yiwaddir loonah walla ?
Wa l‑dahab al‑saafi yilkhayyar walla ?
Wa l‑hujaar al‑mukhaddasiin
chatto fi machbak al‑chawaariʼ.
2 Wa iyaal Sahyuun al‑khaaliyiin kula
misil al‑dahab al‑saafi.
Wa maala bigo misil jiraar al‑tiine
al‑sawwoohum al‑haddaad ?
3 Hatta al‑baʼaachiim yantu duyuudhum
wa yiradduʼu iyaalhum.
Wa laakin ummati al‑misil bitt ammi
ma induhum mahanna
misil naʼaamaayit al‑sahara.
4 Al‑atfaal lisneehum yibso min al‑atach
wa l‑iyaal talabo akil
wa laakin naadum al‑yantiihum ke ma fiih.
5 Al‑naas al‑awwal akalo akil adiil
al‑yoom min al‑juuʼ daffago fi l‑chawaariʼ
wa l‑awwal ragado fi l‑hariir,
al‑yoom ragado fi l‑baʼar.
6 Wa khata ummati al‑misil bitt ammi
akbar min zunuub madiinat Saduum
al‑tawwaali addammarat
wa ma ligat fazaʼ.
7 Awwal kubaaraat ummati saafiyiin ziyaada min al‑barad
wa ajsaamhum buyud karr min al‑laban
wa samhiin misil al‑marajaan
wa uruug jisimhum khudur misil al‑yaakhuut.
8 Wa hassaʼ kamaan,
binchaafo zurug kurum misil al‑faham
wa ma binʼarfu fi chawaariʼ al‑madiina
wa farwithum laasge fi udaamhum
wa yaabse karr misil al‑uud.
9 Akheer tumuut be l‑seef
min tumuut be l‑juuʼ
walla tabtul be bicheech bicheech
min gillit al‑maʼaach.
10 Wa halaak ummati al‑misil bitt ammi
lihig lahaddi l‑ammahaat al‑hanuunaat
rakkaban iyaalhin wa bigo akilhin.
11 Wa Allah nazzal kulla zaʼalah
wa khadabah al‑muhrig zaadah
wa gabbad naar fi Sahyuun akalat asaasha.
12 Muluuk al‑aalam wa kulla naas al‑dunya
abadan ma yisaddugu
kadar al‑adu wa l‑khasiim
yagdar yadkhul fi biibaan Madiinat al‑Khudus.
13 Wa da be sabab zanib al‑anbiya
wa khata rujaal al‑diin
al‑daffago damm al‑saalihiin fi ust al‑madiina.
14 Yiddaggacho fi chawaariʼ al‑madiina
misil amyaaniin.
Wa munajjasiin be l‑damm
hatta khulgaanhum ma yinlamsu min al‑najaasa.
15 Wa l‑naas biʼiitu wa buguulu :
« Angarʼu min al‑munajjasiin !
Angarʼu !
Angarʼu !
Ma tilammusuuhum. »
Humman jaariyiin
wa chaattiin fi lubb al‑umam
wa laakin al‑aakhariin buguulu :
« Ma yaskunu fi usutna. »
16 Allah ma yidoor yichiifhum.
Hu baan leehum wa chattataahum.
Wa l‑chaʼab kula ma ahtaramo rujaal al‑diin
wa ma karramo al‑chuyuukh.
17 Aniina nisanguʼu wa narfaʼo uyuunna.
Min ween al‑fazaʼ yajiina ?
Wa fi bakaanna hana l‑haraasa,
arrajjeena umma al‑ma najjatna.
18 Wa udwaanna chaalo deribna
lahaddi ma gidirna nuruukhu fi chawaariʼna.
Nihaayitna garrabat
wa ayyaamna anhasabo fi l‑asaabiʼ.
Aywa,
nihaayitna garrabat.
19 Wa udwaanna bigo ajiiliin
min suguura al‑sama.
Taaradoona fi l‑jibaal
wa karaso leena fi l‑kadaade.
20 Al‑malik al‑Allah masahah wa darrajah,
hu misil ruuhna
wa gulna niʼiichu tihtah maʼa l‑umam.
Wa laakin al‑adu ramaah fi l‑charak
wa karabah.
21 Aywa,
afrahe wa adhake,
ya Adoom al‑misil bineeye
al‑saakne fi balad al‑Uus.
Inti tacharbe min kaas al‑taʼab
wa taskare wa tagoodi aryaane.
22 Ya Sahyuun al‑misil bineeye,
ma indiki khata khalaas.
Battaan ma yiwadduuki fi l‑khurba.
Wa leeki inti,
ya Adoom al‑misil bineeye,
Allah yiʼaakhibki be khataaki
wa yakchif zunuubki.