Kitaab Danyaal
min Kutub al‑Anbiya
Danyaal wa rufgaanah fi beet al‑malik
1
1 Wa fi l‑sana al‑taalta hana hukum Yahuuyakhim malik mamlakat Yahuuza,
khalaas ja Nabuukhadnasar malik Baabil wa haasar Madiinat al‑Khudus.*
2 Wa l‑Rabb sallam Yahuuyakhim malik Yahuuza fi iideen Nabuukhadnasar.
Wa Nabuukhadnasar karab al‑malik wa chaal min al‑mawaaʼiin al‑gaaʼidiin fi beet Allah wa waddaahum fi Baabil fi beet ilaahaatah.
Wa khatta al‑mawaaʼiin dool fi l‑makhazan hana beet ilaahaatah.
3 Wa baʼad da,
al‑malik Nabuukhadnasar amar kabiir khaddaamiinah al‑usmah Achfinaaz achaan yijiib leyah subyaan min Bani Israaʼiil min zurriiyit al‑malik aw min iyaal al‑naas al‑muhimmiin fi l‑balad.
4 Wa l‑subyaan dool yukuunu ma induhum ayyi eeb wa yaʼajubu al‑een wa induhum hikma wa maʼrafa katiire.
Wa yagdaro yafhamo wa yilʼallamo wa muwaafgiin le l‑khidme fi gasir al‑malik.
Wa yiʼallumuuhum lukhkhat al‑Baabiliyiin wa kutubhum.
5 Wa l‑malik gataʼ leehum akil yoomi wa kulla yoom,
yantuuhum akil wa khamar min tarabeezit al‑malik.
Wa yiʼallumuuhum talaata sana wa baʼad da,
yukuunu fi khidimtah.
6 Wa min been al‑subyaan dool,
fiyah subyaan min gabiilat Yahuuza wa humman Danyaal wa Hananya wa Michayiil wa Azarya.
7 Wa kabiir al‑khaddaamiin khatta leehum asaame aakhariin.*
Le Danyaal sammaah Beltachaasar wa le Hananya sammaah Chadraak wa le Michayiil sammaah Michaak wa le Azarya sammaah Abdalnagu.
8 Wa Danyaal chaal niiye ma yinajjis nafsah be l‑akil wa l‑khamar al‑yantuuh leehum min tarabeezit al‑malik.
Wa talab min kabiir al‑khaddaamiin achaan ma yajburah fi l‑cheyy al‑yinajjisah.
9 Wa l‑Rabb antaah le Danyaal al‑rida wa l‑rahma hana kabiir al‑khaddaamiin.
10 Wa be da kula,
al‑kabiir da gaal le Danyaal :
« Ana khaayif min siidi al‑malik achaan hu bas al‑gataʼ leeku al‑akil wa l‑charaab.
Wa kan yichiifku intu baatliin ziyaada min al‑subyaan al‑aakhariin al‑gadurku,
hu yagtaʼ raasi be sababku intu. »
11 Wa kabiir al‑khaddaamiin khatta muraakhib foog Danyaal wa Hananya wa Michayiil wa Azarya.
Wa Danyaal hajja leyah wa gaal :
12 « Ya sayyidi,
min fadlak jarrib abiidak le muddit achara yoom.
Antiina naakulu min al‑khudrawaat bas wa almi nacharbo.
13 Wa baʼad da,
chiif al‑faraga ambeenna aniina wa l‑subyaan al‑aakhariin al‑gaaʼidiin yaakulu akil al‑malik.
Wa khalaas,
sawwi maʼa abiidak misil inta chiftah. »
14 Wa l‑muraakhib khassad be l‑kalaam da wa jarrabaahum le muddit achara yoom.
15 Wa baʼad achara yoom,
Danyaal wa rufgaanah sihhithum anchaafat samha wa bigo sumaan min kulla l‑subyaan al‑aakhariin al‑gaaʼidiin yaakulu akil al‑malik.
16 Wa khalaas,
al‑muraakhib baddal al‑akil wa l‑khamar al‑magtuuʼ leehum be khudrawaat bas.
17 Wa l‑Rabb antaahum le l‑subyaan al‑arbaʼa dool maʼrafa wa agul fi kulla l‑kutub wa l‑hikma.
Wa Danyaal yaʼarif yifassir al‑ruʼya wa l‑hilim kula.
18 Wa wakit al‑waʼad al‑yigaabulu foogah al‑malik tamma khalaas,
kabiir al‑khaddaamiin waddaahum wa gaddamaahum le l‑malik Nabuukhadnasar.
19 Wa l‑malik kallam maʼaahum wa fi kulla l‑subyaan,
ma ligi naas induhum maʼrafa misil Danyaal wa Hananya wa Michayiil wa Azarya.
Wa hu chaalaahum maʼaayah wa antaahum masʼuuliiye.
20 Wa wakit al‑malik saʼalaahum min ayyi cheyy,
ligaahum induhum fihim wa hikma achara marraat ziyaada min kulla l‑sahhaariin wa l‑chawwaafiin al‑gaaʼidiin fi mamlakatah.
21 Wa Danyaal gaʼad lahaddi l‑sana al‑ja foogha al‑malik Kuurach wa chaal al‑muluk.