12
1 Wa hu gaal battaan le Danyaal :
« Fi l‑wakit da,
yugumm Mikaayiil al‑mukallaf be chaʼabak.
Wa da yabga fi wakit hana taʼab al‑abadan ma bigi mislah min al‑umma di gaaʼide lahaddi l‑wakit da.
Wa be da kula,
yanja ayyi waahid min chaʼabak al‑usmah maktuub fi kitaab al‑haya.
2 Wa katiiriin min al‑naas al‑maytiin yabʼaso wa waahidiin minhum yalgo al‑haya al‑abadiiye wa waahidiin yalgo al‑eeb wa l‑ihaana ila l‑abad.
3 Wa l‑naas al‑induhum hikma yidawwu misil deyy al‑nahaar achaan allamo al‑adaala le naas katiiriin.
Wa humman yabgo misil nujuum al‑sama al‑yidawwu daayman.
4 « Wa laakin inta,
ya Danyaal,
al‑kalaam da sirr,
ahfadah.
Wa khutt fi l‑kitaab da khitim achaan ma yaftahooh abadan lahaddi l‑wakit al‑akhiir yitimm.
Wa achaan da,
naas katiiriin yifattuchuuh jaay wa jaay le yiziidu maʼrafathum. »
Al‑wakit al‑akhiir
5 Wa ana Danyaal fi l‑ruʼya di chift itneen aakhariin,
al‑waahid waagif be hini wa l‑aakhar waagif be hinaak le l‑bahar.
6 Wa waahid minhum saʼal al‑raajil al‑laabis khalag hana gumaach sameh al‑gaaʼid foog min almi al‑bahar wa gaal :
« Mata yaji akhiir al‑ajaayib dool ? »
7 Wa l‑naadum al‑laabis al‑khalag hana gumaach sameh al‑gaaʼid foog min almi al‑bahar da rafaʼ iideenah al‑itneen ale l‑sama wa gaal :
« Nahlif be usum Allah al‑Hayy al‑Daayim,
akhiir al‑achya dool fi talaata sana wa nuss.
Wa da,
baʼad tiddammar gudrat al‑chaʼab al‑saalihiin hana Allah. »
8 Wa ana simiʼt kalaamah wa laakin ma fihimt maʼanaatah wa gult :
« Ya sayyidi,
kikkeef tukuun nihaayat al‑ajaayib dool ? »
9 Wa hu gaal leyi :
« Ya Danyaal,
al‑kalaam da khalliih achaan hu sirr wa makhtuum ma yaftahooh lahaddi l‑wakit al‑akhiir.
10 Wa naas katiiriin al‑taʼab yitahhirhum wa yisaffiihum wa yinaddifhum.
Wa l‑induhum hikma yafhamo.
Wa laakin al‑aasiyiin yisawwu al‑charr wa waahid minhum kula ma yafham.
11 Wa min wakit manaʼo al‑dahiiye al‑yigaddumuuha kulla yoom wa gammo sawwo al‑haraam al‑yijiib al‑kharaab,
induhum 1 290 yoom.*
12 Wa mabruuk le l‑naadum al‑yasbur lahaddi 1 335 yoom.
13 Wa kan leek inta,
ya Danyaal,
asbur lahaddi tumuut.
Wa fi l‑akhiir,
tugumm wa talga ajrak. »