11
1 « Ya Danyaal,
ana zaati awwal wagaft maʼa Mikaayiil le nisaaʼidah wa nahmiih wa da fi awwal sana hana hukum Daariyuus al‑Maadi. »
Huruub al‑muluuk
2 Wa battaan hu gaal le Danyaal :
« Hassaʼ da,
daahu kalaam al‑hagg.
Fi mamlakat al‑Faarisiyiin,
talaata muluuk yittaabaʼo wa l‑raabiʼ al‑yaji baʼadhum yabga khani ziyaada minhum.
Wa be gudrat maalah,
hu yugumm didd mamlakat al‑Yuunaan.
3 « Wa fi l‑Yuunaan kula,
yarkab malik chadiid al‑yahkim be gudra wa yisawwi kulla cheyy al‑galbah bidoorah.
4 Wa laakin wakit mamlakatah usumha talaʼ khalaas,
tawwaali hu yumuut wa zurriiytah ma yawrusu mamlakatah.
Wa hi yigassumuuha arbaʼa mamaalik le naas aakhariin.
Wa l‑mamaalik dool ma yabgo gawiyiin misil al‑mamlaka al‑awwalaaniiye.
5 « Wa hu al‑yabga malik fi l‑junuub yaʼni fi balad Masir yabga chadiid.
Wa laakin waahid min khuyyaadah yabga chadiid minnah ziyaada wa yichiil al‑muluk wa yiwassiʼ al‑mamlaka.
6 Wa baʼad siniin,
malik Masir wa malik al‑munchaakh yaʼni balad Suuriya yisawwu alaakha ambeenaathum.
Wa malik Masir yijawwiz bineeytah le malik Suuriya achaan alaakhithum tabga adiile.
Wa laakin hi wa abuuha yiwadduru gudrithum wa darajathum.
Wa yisallumuuhum le l‑moot,
hi wa raajilha wa abuuha wa kulla musaaʼidiinha.
7 Wa waahid min aayilitha yichiil bakaan abuuha malik Masir.
Wa yugumm didd malik Suuriya.
Wa yahjimah hu wa deechah fi madiinithum al‑gawiiye wa yinnasir fooghum.
8 Wa hu yichiil ilaahaathum wa tamaasiilhum hana l‑hadiid wa kulla mawaaʼiinhum al‑khaaliyiin hana l‑dahab wa l‑fudda wa yiwaddiihum fi Masir misil kasiibe.
Wa hu yigaatiʼ malik Suuriya le muddit siniin.
9 « Wa baʼad da,
malik Suuriya yamchi ard malik Masir wa yigabbil baladah.
10 Wa awlaad malik Suuriya yijahhuzu le l‑harib wa yilimmu askar katiiriin.
Wa waahid min awlaad al‑malik be askarah yugumm le l‑harib wa yagtaʼ al‑huduud misil al‑seel.
Wa wakit mugabbil,
hu yahjim al‑madiina al‑gawiiye hana udwaanah.
11 « Wa malik Masir yazʼal zaʼal chadiid wa yamrug yihaarib al‑askar al‑katiiriin hana malik Suuriya wa yinnasir fooghum.
12 Wa yakrub al‑askar dool wa yaktul minhum acharaat al‑uluuf wa yugumm yikoolif wa laakin gudurtah di ma titawwil.
13 Wa baʼad siniin,
malik Suuriya yichiil silaah katiir wa askar katiiriin min al‑askar al‑awwal wa yamchi.
14 Wa fi l‑wakit da,
naas katiiriin yugummu didd malik Masir.
Wa l‑rujaal al‑muʼaaridiin min chaʼabak inta,
ya Danyaal,
kula yugummu didd malik Masir le yihaggugu al‑kalaam al‑awwal hajjooh leehum fi ruʼya.
Wa laakin yafchulu.
15 Wa wakit malik Suuriya yawsal fi Masir,
yihawwig durdur al‑madiina al‑gawiiye be radmiiye le yadkhul fi l‑madiina wa yichiilha.
Wa kulla askar malik Masir hatta askarah al‑furraas kula yafchulu achaan ma induhum gudra.
16 Wa malik Suuriya yisawwi kulla cheyy al‑galbah bidoorah achaan naadum waahid yagdar leyah ke ma fiih.
Hu yichiil al‑balad al‑jamiila* wa yijiib al‑damaar fiiha.
17 Wa malik Suuriya yichiil niiye yaji be khuwwaat mamlakatah le yichiil Masir.
Wa yisawwi maʼa l‑malik alaakha wa yanti bineeytah achaan yidammir Masir wa laakin khittitah di tafchul.
18 Wa hu yiwajjih ale l‑mudun al‑fi khachum al‑bahar wa yichiil minhum katiiriin.
Wa laakin khaayid waahid askari yugumm diddah wa yiʼayyibah.
Wa malik Suuriya ma yagdar yilkaffa foogah.
19 Wa baʼad fachal,
yigabbil fi l‑mudun al‑gawiyiin al‑fi baladah.
Wa hu yittartaʼ wa yagaʼ wa yiwaddir marra waahid.
20 Wa l‑malik al‑yarkab baʼadah yirassil naadum le yanhab majd al‑mamlaka.
Wa baʼad ayyaam,
al‑malik da yumuut be sirr ma fi harib. »
21 Wa gaal battaan le Danyaal :
« Yarkab fi balad Suuriya malik aakhar makruuh wa l‑naas ma yantuuh majd al‑malik.
Wa wakit al‑balad gaaʼide fi l‑salaam,
hu yaglaʼ al‑muluk be najaada.
22 Wa ayyi deech al‑yahjimah,
hu yahzimah wa yidammirah.
Wa yaktul waahid min kubaaraat al‑chaʼab al‑induhum muʼaahada maʼa Allah.
23 Wa l‑malik da yisawwi alaakha maʼa l‑naas le yukhuchchuhum.
Wa gudurtah tiziid kan naas al‑yitaabuʼuuh ma katiiriin kula.
24 Wa wakit al‑balad fi l‑salaam,
hu yadkhul fi l‑manaatig al‑yugumm fooghum al‑maʼaach be ziyaada wa yisawwi cheyy al‑abbahaatah wa juduudah abadan ma sawwooh.
Hu yanhab al‑balad wa yigassim al‑kasiibe le naasah.
Wa indah niiye fasle didd al‑mudun al‑gawiyiin wa laakin fiʼilah da ma yitawwil.
25 « Wa be deech katiir,
hu yugumm be kulla gudurtah wa fahaaliiytah wa yamchi yihaarib malik Masir.
Wa malik Masir kula yijahhiz deech gawi wa katiir marra waahid le yihaaribah.
Wa laakin malik Masir ma yagdar yinnasir achaan fiyah muʼaamara diddah.
26 Wa l‑muʼaamara di,
ajaawiidah yugummu yukhuunuuh.
Wa be da,
humman yakhsaro al‑harib wa katiiriin min askarah yumuutu.
27 Wa l‑muluuk al‑itneen dool yilimmu le yistafugu wa laakin ayyi waahid galbah malaan be l‑fasaala wa yihajju ambeenaathum be kalaam khachch.
Wa kalaamhum ma yijiib halal achaan ayyi cheyy yitimm fi l‑wakit al‑muhaddad.
28 Wa malik Suuriya yigabbil fi baladah be kasiibe katiire.
Wa wakit mugabbil,
yisawwi kulla cheyy fasil al‑galbah yidoorah fi l‑chaʼab al‑induhum muʼaahada mukhaddasa maʼa Allah.
Wa khalaas,
yiwassil baladah.
29 « Wa fi l‑wakit al‑muhaddad,
malik Suuriya battaan yugumm didd malik Masir wa laakin da ma yabga leyah misil awwal.
30 Wa wakit naas yaju diddah min al‑kharib be sufun,
hu achamah yingatiʼ wa yiʼarrid.
Wa wakit mugabbil,
yugumm didd al‑chaʼab al‑induhum muʼaahada mukhaddasa maʼa Allah.
Wa l‑yaabo al‑muʼaahada kamaan,
hu yistafig maʼaahum.
31 Hu yirassil askarah wa humman ma yihtarumu al‑beet al‑mukhaddas al‑gawi.
Yamnaʼo al‑dahiiye al‑yigaddumuuha kulla yoom wa yisawwu al‑haraam al‑yijiib al‑kharaab.
32 Wa l‑malik zaatah be kalaam khachch yilizz naas waahidiin le yaabo al‑muʼaahada al‑induhum maʼa Allah.
Wa laakin al‑naas al‑yaʼarfu Ilaahhum yugummu be chidde wa yasbutu.
33 « Wa l‑naas al‑induhum hikma yifahhumu katiiriin min naashum.
Wa laakin fi muddit chuhuur,
siyaad al‑hikma dool yaktuluuhum be l‑seef aw yiharruguuhum be naar aw yidissuuhum fi l‑sijin aw yichiilu maalhum.
34 Wa fi wakt al‑taʼab da,
ma yalgo musaaʼada adiile wa l‑naas al‑yindammo maʼaahum kula munaafikhiin.
35 Wa l‑naas al‑induhum hikma,
katiiriin minhum yumuutu wa moothum da yitahhir al‑chaʼab wa yisaffiihum wa yijahhizhum le l‑wakit al‑akhiir al‑muhaddad.
36 « Wa malik Suuriya yisawwi kulla cheyy al‑galbah bidoorah wa yistakbar.
Wa hu yichiif nafsah aali min kulla l‑ilaahaat wa yuguul kalaam kufur didd Allah Ilaah al‑ilaahaat.
Wa hu yanjah fi kulla cheyy al‑yisawwiih lahaddi khadab Allah yanzil foogah wa yitimm waktah achaan akiid Allah yihaggig kalaamah.
37 Wa l‑malik da ma indah haaje be ilaahaat juduudah wa la be l‑ilaah al‑yaʼabudannah al‑awiin wa la be ayyi ilaah aakhar achaan hu yichiif nafsah aali min kulla cheyy.
38 Wa fi badalhum,
hu yaʼabud al‑ilaah al‑yahmi al‑mudun al‑gawiyiin wa da ilaah al‑juduudah abadan ma yaʼarfuuh.
Wa hu yigaddim le l‑ilaah da dahab wa fudda wa hujaar khaaliyiin wa achya aakhariin khaaliyiin.
39 Wa be musaaʼadat al‑ilaah da,
hu yugumm didd al‑mudun al‑gawiyiin.
Wa yanti charaf le kulla l‑naas al‑yikarrumu al‑ilaah da wa yisawwiihum kubaaraat fi naas katiiriin.
Wa yigassim leehum ziraaʼa le yachkurhum.
40 « Wa fi l‑wakit al‑akhiir,
malik Masir yugumm le l‑harib wa laakin malik Suuriya yahjimah be khuwwa kabiire,
be arabaat harib wa siyaad kheel wa sufun katiiriin.
Wa misil al‑seel,
hu yadkhul fi kulla l‑buldaan.
41 Hu yadkhul fi l‑balad al‑jamiila wa yaktul naas katiiriin.
Wa laakin sukkaan Adoom wa Muwaab wa kubaaraat Bani Ammuun yanjo minnah.
42 Wa hu yistaʼmar buldaan katiiriin wa balad Masir kula ma tanja minnah.
43 Wa hu yichiil kulla maal Masir,
al‑dahab wa l‑fudda wa l‑achya al‑khaaliyiin.
Wa l‑Liibiyiin wa l‑Habachiyiin kula yitaabuʼuuh.
44 Wa laakin al‑akhbaar al‑yaju leyah min al‑sabaah wa l‑munchaakh yibarjuluuh wa be zaʼal chadiid,
hu yugumm wa yakhrib wa yaktul naas katiiriin.
45 Wa hu yutugg kheemaatah al‑malakiiye ambeen al‑bahar wa l‑jabal al‑mukhaddas al‑gaaʼid fi l‑balad al‑jamiila.
Wa baʼad da,
taji nihaaytah wa ma fi naadum al‑yisaaʼidah. »