Al‑malak baan le Danyaal
10
1 Wa fi l‑sana al‑taalta hana hukum Kuurach malik al‑Faarisiyiin,
Allah bayyan le Danyaal al‑binaaduuh Beltachaasar al‑achya al‑akiid yabgo wa minhum al‑taʼab al‑chadiid al‑yaji.
Wa be ruʼya,
Danyaal fihim maʼana al‑achya dool.
2 Wa fi l‑wakit da,
ana Danyaal hizint le muddit talaata usbuuʼ.
3 Wa ana ma akalt akil halu wa la laham wa la chiribt khamar.
Wa itir kula ma sabbeetah fi jismi lahaddi l‑talaata usbuuʼ dool kammalo.
4 Wa fi yoom 24 hana l‑chahar al‑awwal,
wakit ana gaaʼid fi khachum al‑bahar al‑kabiir al‑usmah Dijla,
5 ana rafaʼt raasi wa daahu chift raajil waahid baan leyi laabis khalag hana gumaach sameh wa fi sulbah,
hizaam min dahab saafi.
6 Wa jismah yiraari misil al‑hajar al‑khaali.
Wa wijhah yidawwi misil al‑barraaga wa uyuunah yidawwu misil machaahiib al‑naar wa iideenah wa rijileenah yiraaru misil al‑nahaas al‑saffooh.
Wa hissah misil haraka hana naas katiiriin marra waahid.
7 Wa ana Danyaal chift al‑ruʼya di wiheedi.
Al‑naas al‑gaaʼidiin maʼaayi ma chaafooha laakin khaafo khoof chadiid wa jaro allabbado.
8 Wa ana Danyaal faddalt wiheedi gaaʼid nichiif al‑ruʼya al‑ajiibe di.
Wa ana anbahat wa wijhi alkhayyar wa gudurti bigat ma fiiha.
9 Wa l‑raajil da gamma yikallim.
Wa wakit simiʼt hissah,
tawwaali khimirt wa wagaʼt be wijhi.
10 Wa khalaas,
fiyah iid karabatni wa gaʼʼadatni amburrooko wa ana gaaʼid narjif.
11 Wa gaal leyi :
« Ya Danyaal,
inta al‑Allah biriidak !
Afham al‑kalaam al‑nuguulah leek.
Gumm wa agiif be tuulak achaan hassaʼ Allah rassalaani leek.
» Wa wakit gaal leyi al‑kalaam da,
wagaft be tuuli wa gaaʼid narjif bas.
12 Wa gaal leyi :
« Ya Danyaal,
ma takhaaf achaan min awwal yoom inta chilt niiye le tafham wa maskant nafsak giddaam Ilaahak,
hu simiʼ kalaamak.
Wa fi sabab kalaamak da bas ana jiit.
13 Wa laakin al‑ruuh al‑mukallaf be mamlakat al‑Faarisiyiin sadda leyi al‑derib wa akhkharaani le muddit 21 yoom.
Wa waahid min kubaaraat al‑arwaah al‑usmah Mikaayiil ja wa saaʼadni wa be da,
ana gidirt dakhalt fi mamlakat al‑Faarisiyiin.
14 Wa hassaʼ,
jiit nifassir leek al‑cheyy al‑yukuun le chaʼabak baʼadeen achaan al‑ruʼya di tukhuss aakhir al‑wakit. »
15 Wa wakit gaaʼid yihajji leyi be l‑kalaam da,
ana dangart wa ma indi gudra le nihajji.
16 Wa laakin ja waahid bichaabih ibn al‑insaan limis chalaaliifi wa khalaas,
ana gidirt fataht khachmi.
Wa gult le l‑waagif giddaami :
« Ya sayyidi,
al‑ruʼya di barjalatni ziyaada wa battaan ma indi gudra.
17 Ya sayyidi,
kikkeef ana abdak nagdar nikallim leek kan gudurti ma fiiha wa ma nagdar ninaffis adiil ? »
18 Wa khalaas,
hu al‑bichaabih al‑insaan limisni battaan wa antaani gudra.
19 Wa gaal leyi :
« Ma takhaaf,
inta al‑Allah biriidak.
Aleek al‑salaam.
Chidd heelak wa abga gawi !
» Wa wakit gaaʼid yihajji leyi,
ana ligiit gudra wa gult :
« Kallim,
ya sayyidi,
achaan inta anteetni gudra. »
20‑21 Wa gaal :
« Taʼarif maala ana jiit leek ?
Jiit achaan nikhabbirak be l‑cheyy al‑maktuub fi kitaab al‑hagg.
Hassaʼ ana nigabbil achaan nihaarib al‑ruuh al‑mukallaf be l‑Faarisiyiin wa baʼad da,
yaji al‑ruuh al‑mukallaf be l‑Yuunaaniyiin.
Wa ma fi al‑yisaaʼidni didd al‑arwaah dool illa Mikaayiil al‑mukallaf be chaʼabak. »