Salaat Danyaal
9
1 Wa baʼad da,
Daariyuus wileed Achawiruuch min gabiilat al‑Maadiyiin bigi malik fi balad Baabil.
2 Wa fi awwal sana hana hukmah,
ana Danyaal fihimt min kutub al‑Anbiya kadar Allah hajja le l‑nabi Irmiya wa gaal kharaab Madiinat al‑Khudus yagood 70 sana* lahaddi l‑wakit da yitimm.
3 Wa fi l‑bakaan da,
tawwaali ana wajjaht le l‑Rabb Ilaahi wa chahadtah be l‑sala wa l‑siyaam.
Wa libist khalag al‑tooba wa sabbeet rumaad fi raasi.
4 Wa tawwaali ana gammeet salleet salaat al‑tooba wa gult le Allah Ilaahi :
« Ya Rabb,
inta al‑Ilaah al‑aziim wa l‑gaadir.
Wa inta daayman amiin fi muʼaahadatak le l‑naas al‑yihibbuuk wa yitaabuʼu wasiiyaatak.
5 Aniina aznabna wa khitiina wa sawweena al‑charr wa isiinaak wa khalleena wasiiyaatak wa chariiʼtak.
6 Wa ma simiʼna kalaam abiidak al‑anbiya.
Humman kallamo be usmak le muluukna wa kubaaraatna wa juduudna wa kulla chaʼab baladna.
7 Inta aadil,
ya Rabb,
wa l‑yoom al‑eeb foogna aniina naas balad Yahuuza wa sukkaan Madiinat al‑Khudus wa kulla Bani Israaʼiil al‑gaaʼidiin wa l‑muchattatiin fi kulla l‑buldaan.
Inta taradtuhum wa waddeethum fi l‑buldaan dool be sabab isyaanhum leek.
8 Aywa,
ya Allah,
al‑eeb foogna aniina wa foog muluukna wa kubaaraatna wa juduudna achaan aniina aznabna giddaamak.
9 Wa laakin,
ya Rabbina wa Ilaahna,
inta khafuur wa rahiim hatta kan aniina isiinaak kula.
10 Wa aniina ma simiʼna kalaamak,
inta Allah Ilaahna.
Wa ma taabaʼna churuut al‑Tawraat al‑kallamtina beehum be waasitat abiidak al‑anbiya.
11 Wa aniina Bani Israaʼiil kullina khaalafna churuut al‑Tawraat wa abeena ma simiʼna kalaamak.
Wa khalaas,
inta nazzalt foogna al‑laʼana wa l‑hukum al‑maktuub fi Tawraat Muusa abdak achaan aniina aznabna giddaamak.
12 « Wa inta haggagt kalaamak al‑gultah foogna aniina wa kubaaraatna wa nazzalt foogna masiibe kabiire.
Wa l‑masiibe al‑nazalat fi Madiinat al‑Khudus di abadan ma kaanat misilha fi l‑dunya.
13 Wa l‑masiibe di nazalat foogna misil maktuub fi Tawraat Muusa.
Wa be da kula,
ya Allah Ilaahna,
ma wajjahna aleek wa ma chahadnaak wa ma khalleena al‑khataaya al‑gaaʼidiin nisawwuuhum wa ma simiʼna kalaamak al‑hagg.
14 Ya Allah,
inta bas jahhazt al‑masiibe di hasab zunuubna wa nazzaltaha foogna.
Ya Allah Ilaahna,
inta daayman aadil fi kulla cheyy al‑tisawwiih laakin aniina ma simiʼna kalaamak.
15 « Ya Rabbina wa Ilaahna,
inta maragt chaʼabak min balad Masir be iidak al‑chadiide wa achaan da,
usmak maʼruuf lahaddi l‑yoom da fi kulla l‑ard.
Laakin aniina aznabna wa sawweena al‑charr.
16 Ya Rabb,
inta aadil.
Wa achaan da,
ma tinazzil khadabak al‑chadiid fi jabalak al‑mukhaddas al‑foogah madiintak.
Achaan be sabab zunuubna wa l‑khataaya al‑sawwoohum juduudna,
daahu al‑naas al‑hawaaleena gaaʼidiin yichchammato le Madiinat al‑Khudus wa leena aniina chaʼabak.
17 Wa hassaʼ da,
ya Ilaahna,
asmaʼ al‑sala wa l‑duʼa hana abdak.
Fi chaan usmak,
ya Rabb,
wajjih nuur wijhak ale beetak al‑mukhaddas al‑khirib.
18 Ya Ilaahi,
asmaʼ wa chiif al‑kharaab al‑ja fi madiintak al‑foogha usmak.
Wa aniina ma chahadnaak be sabab aniina saalihiin laakin achaan rahmatak inta wasiiʼe.
19 Ya Rabb,
asmaʼni !
Ya Rabb,
akhfir leena !
Ya Rabb,
asmaʼ duʼaayi wa afzaʼna bala taʼkhiir fi chaan usmak,
ya Ilaahi !
Achaan inta khassast al‑madiina di le tabga madiintak wa l‑chaʼab kula le yabga chaʼabak. »
Jibriil khabbar Danyaal be l‑yabga
20 Wa ana gaaʼid nisalli wa nutuub min zunuubi wa zunuub chaʼabi Bani Israaʼiil wa nachhad Allah Ilaahi fi chaan jabalah al‑mukhaddas.
21 Wa wakit ana gaaʼid nisalli,
chift al‑malak Jibriil wa da l‑malak al‑awwal ana chiftah fi l‑ruʼya.
Wa hu jaani taayir be surʼa fi wakit gaddimiin hadiiyat al‑achiiye.
22 Wa hajja leyi wa gaal :
« Ya Danyaal,
daahu ana jiit le niʼallimak wa nifahhimak.
23 Ya Danyaal,
min inta badeet tachhad Allah,
hu amaraani wa daahu ana jiit le nikhabbirak achaan inta da,
Allah biriidak.
Khutt baalak le l‑kalaam da wa afham al‑ruʼya di.
24 « Aʼarif kadar Allah kharrar wakit muhaddad le chaʼabak wa le Madiinat al‑Khudus.
Wa l‑adad da 70 fi 7 sana yaʼni 490 sana.
Wa haddad leehum al‑wakit da achaan yikhallu minhum al‑isyaan wa l‑zanib wa yalgo kaffaara le khataayaahum wa yiʼiichu daayman fi l‑adaala.
Wa l‑ruʼya wa kalaam al‑anbiya yilhaggago wa l‑beet al‑mukhaddas kula battaan yamsahooh le yikhassusuuh.
25 Aʼarif wa afham !
Al‑wakit al‑muhaddad da yilgaasam misil nuguulah leek.
Yamrug kharaar hana gabbiliin Bani Israaʼiil wa baniyiin Madiinat al‑Khudus battaan.
Wa min marigiin al‑kharaar da lahaddi jaayiin al‑naadum al‑masahooh wa darrajooh malik,
yisaawi 7 fi 7 sana yaʼni 49 sana.
Wa baʼad 62 fi 7 sana yaʼni 434 sana,
al‑madiina di yabnuuha battaan hi wa chawaariʼha wa yigawwu daraadirha hatta kan da wakt al‑diige kula.
26 Wa baʼad al‑urbuʼmiya wa talaatiin wa arbaʼa sana dool,
al‑naadum al‑masahooh wa darrajooh malik da yaktuluuh wa naadum yidaafiʼ leyah ke ma fiih.
Wa yaji malik aakhar be askarah wa yidammir al‑madiina wa l‑beet al‑mukhaddas.
Wa laakin al‑malik da,
nihaayat hukmah taji ajala misil al‑seel.
Wa fi l‑akhiir,
al‑harib wa l‑damaar al‑chadiid yabgo misil mukharrar.
27 Wa l‑malik da yajbur naas katiiriin le yisawwu maʼaayah muʼaahada le muddit 7 sana.
Wa baʼad nuss al‑mudda di,
al‑dahaaya wa l‑hadaaya al‑yigaddumuuhum daayman,
hu yamnaʼhum.
Wa ajala bas,
al‑mukharrib da yisawwi al‑haraam al‑yijiib al‑kharaab.
Wa fi l‑akhiir,
hu zaatah yiddammar misil mukharrar. »