Ruʼyat Danyaal be l‑kabich wa l‑tees
8
1 Wa fi l‑sana al‑taalta hana hukum al‑malik Balchaasar,
ana Danyaal riʼiit battaan wa di l‑ruʼya al‑taaniye.
2 Wa fi l‑ruʼya di,
ana chift nafsi gaaʼid fi madiinat Chuucha al‑gawiiye fi balad Ilaam wa ana waagif fi khachum bahar Ulaay.
3 Wa fi l‑ruʼya,
ana rafaʼt raasi wa daahu chift kabich waagif fi khachum al‑bahar.
Wa l‑kabich da indah itneen guruun tuwaal.
Wa l‑guruun al‑itneen dool,
al‑waahid bigi tawiil min al‑aakhar laakin al‑garin al‑tawiil da,
hu bas al‑gamma wara.
4 Wa chift al‑kabich darab be guruunah ale l‑kharib wa l‑munchaakh wa l‑wati.
Wa haywaan waahid kula ma gidir yagiif giddaamah wa waahid al‑gidir yanja minnah kula ma fiih.
Wa hu sawwa kulla cheyy al‑galbah bidoorah wa gudurtah gaaʼide tiziid marra waahid.
5 Wa wakit ana gaaʼid nifakkir foogah,
tawwaali chift tees jaari jaayi min al‑kharib wa chagga kulla l‑buldaan wa min chiddit surʼitah misil ma gaaʼid yilammis al‑ard.
Wa l‑tees da indah garin kabiir ambeenaat uyuunah.
6 Wa l‑tees jara le l‑kabich al‑indah guruun itneen al‑ana chiftah waagif jamb al‑bahar.
Wa l‑tees da jara aleyah be zaʼal chadiid.
7 Wa chift al‑tees da hajam al‑kabich be zaʼal wa darabah wa kassar guruunah al‑itneen.
Wa l‑kabich ma gidir leyah wa l‑tees da ramaah wa fajjakhah wa cheyy al‑yagdar yinajji al‑kabich minnah kula ma fiih.
8 Wa l‑tees da bigi kabiir marra waahid wa laakin wakit ligi gudra be ziyaada,
garnah al‑kabiir da ankasar wa fi gaddah,
gammo arbaʼa guruun kubaar muwajjihiin ale l‑jiihaat al‑arbaʼa.
9 Wa waahid min al‑guruun dool gawwam garin waahid sakhayyar marra waahid.
Wa kibir ziyaada ale l‑wati wa l‑sabaah wa ale l‑balad al‑jamiila.
10 Wa l‑garin da zaad lahaddi lihig khuwwaat al‑sama wa l‑nujuum.
Wa rama minhum waahidiin fi l‑ard wa fajjakhaahum.
11 Wa ma khalla khaayidhum kula.
Wa hu manaʼ al‑dahiiye al‑gaaʼidiin yigaddumuuha kulla yoom le Allah wa kassar al‑beet al‑mukhaddas lahaddi asaasah.
12 Wa fi chaan isyaan al‑naas le Allah,
sallamoohum le l‑garin wa manaʼoohum al‑dahiiye al‑yigaddumuuha kulla yoom.
Wa l‑garin aba al‑hagg wa najah fi kulla cheyy al‑yisawwiih.
13 Wa ana Danyaal simiʼt malak waahid saʼal malak aakhar wa gaal :
« Le mata yagoodu al‑achya al‑kallamoohum fi l‑ruʼya di ?
Wa mata yagiif gaddimiin al‑dahiiye al‑yigaddumuuha kulla yoom ?
Wa le mata yagood al‑isyaan al‑yijiib al‑kharaab wa yisallumu al‑beet al‑mukhaddas wa l‑khuwwaat le yifajjukhuuhum tihit al‑rijle ? »
14 Wa l‑malak al‑aakhar radda leyah wa gaal :
« Al‑cheyy da yagood lahaddi adad al‑ayyaam al‑yisaawi 2 300 dahiiye hana fajur wa achiiye.
Wa baʼad da,
al‑beet al‑mukhaddas kula yiʼadduluuh min jadiid. »
Jibriil fassar al‑ruʼya le Danyaal
15 Wa wakit ana Danyaal gaaʼid nifakkir fi l‑ruʼya wa nidoor nafham maʼanaatha,
tawwaali chift cheyy waagif giddaami yichaabih naadum.
16 Wa simiʼt hiss insaan yinaadi min ale l‑bahar Ulaay wa gaal le l‑naadum al‑waagif giddaami da :
« Ya Jibriil,
fassir al‑ruʼya di le l‑raajil da. »
17 Wa khalaas,
Jibriil garrab le l‑bakaan al‑ana Danyaal gaaʼid foogah wa wakit ja leyi,
ana khuft khoof chadiid wa wagaʼt be wijhi fi l‑turaab.
Wa laakin Jibriil gaal leyi :
« Ya ibn Adam,
aʼarif kadar al‑ruʼya di hi tukhuss al‑wakit al‑akhiir. »
18 Wa wakit hu gaaʼid yihajji leyi,
ana khimirt wa wagaʼt be wijhi.
Wa laakin karabaani wa waggafaani be rijileeni.
19 Wa baʼad da,
Jibriil gaal leyi :
« Daahu niʼarrifak al‑cheyy al‑yukuun wakit khadab Allah yanzil wa da fi l‑wakit al‑muhaddad al‑yaji fi l‑akhiir.
20 Wa l‑kabich al‑inta chiftah al‑indah guruun itneen,
hu yimassil muluuk al‑Maadiyiin wa l‑Faarisiyiin.
21 Wa l‑tees kamaan yimassil malik al‑Yuunaaniyiin.
Wa l‑garin al‑kabiir al‑gamma ambeenaat uyuunah da yimassil malikhum al‑awwal.
22 Wa l‑garin da ankasar wa arbaʼa guruun aakhariin gammo fi gaddah wa dool yiwassufu arbaʼa mamaalik al‑yamurgu min al‑Yuunaaniyiin.
Wa laakin ma yalgo gudra misil gudrat al‑malik al‑awwal.
23 Wa wakit hukum al‑muluuk dool garrab yikammil wa l‑aasiyiin zunuubhum faato al‑huduud,
yamrug fi usuthum malik waahid mustakbir wa kaddaab.
24 Wa khuwwatah tiziid laakin ma be gudurtah halaalah.
Wa yisabbib kharaab ajiib wa yanjah fi kulla cheyy al‑yisawwiih.
Wa yaktul al‑naas al‑induhum gudra wa chaʼab Allah al‑saalihiin kula.
25 Wa be najaadtah,
yanjah wa be kidbah,
yistakbar ziyaada wa yidammir naas katiiriin al‑aaychiin fi l‑salaama.
Wa yugumm didd sultaan al‑salaatiin.
Wa yiddammar bala ma limsatah iid.
26 Wa kan le l‑ruʼya al‑inta chiftaha al‑tukhuss adad al‑dahiiye hana fajur wa achiiye di,
hi sahiiha.
Laakin al‑ruʼya di sirr.
Ma tikallim be l‑ruʼya di achaan hi tukhuss wakit lissaaʼ jaayi baʼiid. »
27 Wa ana Danyaal diʼift wa miridt muddit ayyaam.
Wa baʼadeen ligiit al‑aafe wa gammeet nisawwi khidmit al‑malik.
Wa be da kula,
ana hammeet ziyaada min al‑ruʼya al‑chiftaha wa ma fihimt maʼanaatha.