Danyaal riʼi be l‑haywaanaat al‑arbaʼa
7
1 Wa fi awwal sana hana hukum Balchaasar malik Baabil,
Danyaal chaaf ruʼya wakit hu naayim fi furaachah.
Wa baʼad da,
hu katab al‑ruʼya di.
Wa di hi ruʼyat Danyaal.
2 Wakit ana naayim be l‑leel,
ana chift fi l‑ruʼya di riih badat tusuug min al‑jiihaat al‑arbaʼa wa hazzat al‑bahar al‑kabiir.
3 Wa khalaas,
arbaʼa haywaanaat kubaar nafarhum chig chig marago min al‑bahar da.
4 Wa l‑haywaan al‑awwalaani,
hu misil al‑duud wa indah janaahe hana sagur.
Wa wakit ana gaaʼid nichiif foogah,
mallato janaaheeh wa gawwamooh wa waggafooh be rijileenah misil naadum wa antooh agul hana insaan.
5 Wa l‑haywaan al‑taani,
hu misil marfaʼiin.
Gamma gaʼad be nussah.
Wa chaayil fi khachmah talaata udaam hana saff ambeenaat sunuunah wa gaalo leyah :
« Gumm.
Amchi aktul wa aakul laham katiir. »
6 Wa baʼad da,
chift battaan haywaan aakhar taalit wa hu misil al‑nimir wa indah janaahe arbaʼa fi daharah misil janaahe al‑tuyuur.
Wa l‑haywaan da indah arbaʼa raas wa antooh sulta le yahkim.
7 Wa baʼad da fi nafs al‑ruʼya di,
chift al‑haywaan al‑raabiʼ.
Hu yabhat wa yikhawwif wa indah gudra chadiide.
Wa indah sunuun kubaar hana hadiid wa beehum yaakul wa yicharrit wa l‑fadle yifajjikhha be rijileenah.
Wa l‑haywaan da bigi chig min al‑haywaanaat al‑talaata al‑awwalaaniyiin.
Wa hu indah achara guruun.
8 Wa wakit ana gaaʼid nichiif fi l‑guruun dool,
chift garin aakhar sakhayyar gamma ambeenaathum wa talaata guruun min al‑achara al‑awwalaaniyiin maragoohum le yikhallu leyah al‑bakaan.
Wa l‑garin al‑sakhayyar da indah uyuun misil uyuun al‑insaan wa indah khachum al‑yihajji be istikbaar.
Mamlakat Allah taji
9 Wa battaan ana chift karaasi
al‑khattoohum le majlas al‑gudiya.
Wa chaayib waahid kabiir sinn ja
wa gaʼad fi archah
wa khalagah abyad karr
misil al‑gamar
wa chaʼar raasah
misil gutun al‑nadiif.
Wa archah naar amlahiib
wa rijle archah naar mugargire.
10 Wa bahar hana naar jaari
wa faayit giddaamah.
Wa uluuf al‑aalaaf yakhdumu leyah
wa malaayiin waagfiin giddaamah.
Wa naas majlas al‑gudiya gaʼado
wa fataho al‑kutub.
11 Wa ana chift wa simiʼt al‑garin al‑sakhayyar gaaʼid yihajji be istikbaar.
Wa chift al‑haywaan al‑raabiʼ al‑gaaʼid foogah al‑garin da,
katalooh wa gattaʼo jismah wa harragooh fi l‑naar.
12 Wa kan le l‑haywaanaat al‑talaata al‑aakhariin kamaan,
chaalo minhum sultithum.
Wa laakin zaado leehum umurhum le wakit muhaddad.
13 Wa be l‑leel fi ruʼyiti,
ana chift waahid bichaabih ibn al‑insaan
jaayi fi lubb al‑sahaab.
Wa wassal bakaan al‑chaayib kabiir al‑sinn
wa gaddamooh leyah.
14 Wa anto le ibn al‑insaan da
sulta wa majd wa muluk
achaan yaʼabuduuh
kulla l‑naas min al‑chuʼuub
wa l‑umam wa l‑lukhkhaat.
Wa sultitah hi sulta daayme
wa mamlakatah abadan ma tiddammar.
Tafsiir al‑ruʼya al‑Danyaal chaafha
15 Wa ana Danyaal hammeet ziyaada.
Wa l‑ruʼya al‑chiftaha di barjalatni.
16 Wa garrabt le waahid min al‑naas al‑waagfiin fi l‑bakaan da wa saʼaltah chunu al‑maʼana al‑akiid hana kulla cheyy al‑ana chiftah.
Wa hu antaani al‑tafsiir wa gaal :
17 « Al‑haywaanaat al‑kubaar al‑arbaʼa dool yimassulu muluuk arbaʼa al‑yaju baʼadeen.
18 Wa laakin al‑saalihiin naas Allah al‑Aali yalgo al‑mamlaka wa yichiiluuha marra waahid ila l‑abad. »
19 Wa ana Danyaal dawwart naʼarif hagiigat maʼana al‑haywaan al‑raabiʼ.
Hu chig min al‑haywaanaat al‑aakhariin.
Hu bikhawwif marra waahid wa indah sunuun hana hadiid wa khanaafir hana nahaas wa yaakul wa yicharrit wa l‑fadle yifajjikhha be rijileenah.
20 Wa dawwart battaan naʼarif maʼana hana l‑guruun al‑achara al‑gaaʼidiin fi raasah.
Wa dawwart naʼarif maʼana hana l‑garin al‑sakhayyar al‑gamma wa l‑guruun al‑talaata al‑maragoohum le yikhallu leyah al‑bakaan.
Wa da l‑garin al‑indah uyuun wa indah khachum al‑yihajji be istikbaar wa binchaaf chadiid ziyaada min al‑aakhariin.
21 Wa ana chift al‑garin da gamma yihaarib al‑saalihiin naas Allah wa annasar fooghum.
22 Laakin al‑chaayib kabiir al‑sinn ja wa hakam wa saaʼad al‑saalihiin naas Allah al‑Aali.
Wa misil da khalaas,
wakt al‑saalihiin ja wa humman chaalo al‑mamlaka.
23 Wa l‑naadum da fassar leyi al‑maʼana wa gaal :
« Al‑haywaan al‑raabiʼ da,
hu yimassil al‑mamlaka al‑raabʼe fi l‑ard.
Wa hi chig min al‑mamaalik al‑aakhariin wa tichiil kulla l‑ard wa tifajjikhha wa ticharritha.
24 Wa l‑guruun al‑achara kamaan,
humman yimassulu achara muluuk al‑yamurgu min al‑mamlaka di.
Wa yaji baʼadhum malik aakhar chig min al‑muluuk al‑jo gubbaalah wa yarmi al‑muluuk al‑talaata dool.
25 Wa hu yuguul kalaam didd Allah al‑Aali wa yidaayig naasah al‑saalihiin wa yidoor yikhayyir ayyaam al‑aʼyaad wa Tawraat Allah.
Wa l‑saalihiin yagaʼo fi iideenah muddit talaata sana wa nuss.
26 Wa laakin majlas al‑gudiya yilimm wa yichiilu min al‑malik da sultitah wa yikassuru mamlakatah wa yidammuruuha marra waahid.
27 Wa l‑muluk wa l‑sulta wa l‑azama hana kulla l‑mamaalik al‑gaaʼidiin fi l‑ard,
yantuuhum le l‑chaʼab al‑saalihiin hana Allah al‑Aali.
Wa mamlakat Allah tagood ila l‑abad wa kulla l‑naas al‑induhum sulta yaʼabudu Allah wa yasmaʼo kalaamah. »
28 Wa khalaas,
al‑ruʼya di kammalat.
Wa ana Danyaal afkaari khawwafooni marra waahid wa wijhi alkhayyar wa gaaʼid nifakkir fi l‑ruʼya di.