Al‑ajaawiid gammo didd Danyaal
6
1 Wa l‑malik chaaf akheer yukhutt 120 wakiil achaan yimassuluuh fi kulla l‑mamlaka.
2 Wa fi raas al‑muwakkaliin dool,
yukhutt talaata waziir achaan al‑muwakkaliin yikallumuuhum be kulla cheyy al‑haasil.
Wa be da,
chokhol fasil ke ma yaji le l‑malik.
Wa l‑wuzara dool,
Danyaal kula waahid minhum.
3 Wa Danyaal faataahum le l‑wuzara wa l‑muwakkaliin be l‑agul al‑kabiir.
Wa l‑malik fakkar wa yidoor yukhuttah fi raas kulla l‑mamlaka.
4 Wa khalaas,
al‑wuzara wa l‑muwakkaliin gammo yifattuchu eeb fi khidimtah hana l‑mamlaka le yiʼayyubu beyah Danyaal.
Laakin ma ligo foogah ayyi eeb wa la khata achaan hu amiin wa yiraakhib adiil wa khata kula ma sawwaah.
5 Wa l‑rujaal dool gaalo :
« Danyaal da ma ligiina foogah ayyi eeb illa fi diinah. »
6 Khalaas al‑wuzara wa l‑muwakkaliin dool macho lammo ajala ke bakaan al‑malik wa gaalo :
« Ya malik Daariyuus,
Allah yansurak.
7 Aniina al‑wuzara wa l‑muhaafiziin wa l‑muwakkaliin wa l‑masaaʼiil wa ruʼasa al‑wulaayaat astafagna ambeenaatna.
Wa hassaʼ,
natulbu minnak inta al‑malik achaan tamrug marsuum wa tichiil kharaar al‑yamnaʼ ayyi insaan le muddit 30 yoom ma yigaddim talab le ilaah aw le insaan illa leek inta al‑malik.
Wa kan naadum aba ma karram al‑kharaar kamaan,
yazguluuh fi nugrat al‑diidaan.
8 Ya l‑malik,
hassaʼ da aktib al‑kharaar wa amda foogah achaan ma yilkhayyar wa yittabbag hasab al‑gaanuun hana l‑Maadiyiin wa l‑Faarisiyiin. »
9 Wa khalaas,
al‑malik Daariyuus katab wa mada al‑kharaar.
10 Wa wakit Danyaal simiʼ kadar al‑malik mada al‑kharaar da,
hu macha beetah.
Wa fi l‑khurfa al‑taaniye hana l‑gasir,
fiyah chabaabiik maftuuhiin ale Madiinat al‑Khudus wa hinaak Danyaal yarkaʼ talaata marraat fi l‑yoom.
Wa fi l‑yoom da,
hu salla le Allah wa hamadah misil hu gaaʼid yisawwiih daayman.
11 Wa be khafla,
khusmaan Danyaal lammo wa macho bakaanah wa ligooh gaaʼid yachhad Ilaahah wa yigaddim talabah.
12 Wa baʼad da,
tawwaali macho le l‑malik fi sabab al‑kharaar al‑hu maragah wa gaalo :
« Ya l‑malik,
inta ma madeet fi kharaar al‑yamnaʼ ayyi insaan le muddit 30 yoom ma yigaddim talab le ilaah aw le insaan illa leek inta al‑malik ?
Wa kan naadum aba ma yikarrim al‑kharaar,
ma yazguluuh fi nugrat al‑diidaan walla ?
» Wa l‑malik radda wa gaal :
« Al‑kalaam da akiid hasab al‑gaanuun hana l‑Maadiyiin wa l‑Faarisiyiin al‑abadan ma yilkhayyar. »
13 Wa humman gaalo le l‑malik :
« Ya l‑malik !
Danyaal al‑jaabooh min balad Yahuuza ma indah haaje beek inta wa la be kharaarak al‑inta madeetah.
Hu yigaddim talab le ilaahah talaata marraat fi l‑yoom. »
14 Wa wakit al‑malik simiʼ al‑kalaam da,
hu hizin chadiid wa chaal niiye achaan yinajji Danyaal.
Wa lahaddi l‑makhrib,
gaaʼid yihaawil le yinajjiih.
15 Wa laakin battaan al‑rujaal dool lammo wa jo le l‑malik wa gaalo leyah :
« Ya l‑malik,
aʼarif kadar gaanuun al‑Maadiyiin wa l‑Faarisiyiin buguul al‑kharaar wa l‑marsuum al‑mada foogah al‑malik ma yilkhayyar abadan. »
16 Wa khalaas,
al‑malik amar wa jaabo Danyaal wa ramooh fi nugrat al‑diidaan.
Wa l‑malik gaal le Danyaal :
« Khalli ilaahak al‑gaaʼid taʼabudah daayman da,
yinajjiik ! »
17 Wa jaabo hajar wa saddo beyah khachum al‑nugra.
Wa l‑malik khatta foogah khitmah wa khitim muwazzafiinah achaan ma yikhayyuru fikirhum fi chaan Danyaal.
18 Wa baʼad da,
al‑malik gabbal fi gasrah wa tuul al‑leel hu ma akal cheyy wa ma naada sirriiyaatah wa l‑noom kula aba eenah.
Danyaal niji min al‑diidaan
19 Wa be fajur badri,
al‑malik gamma wa macha ajala le nugrat al‑diidaan.
20 Wa wakit garrab le l‑nugra,
hu haznaan bilheen wa naadaah le Danyaal wa gaal :
« Ya Danyaal,
abd Allah al‑Hayy !
Ilaahak al‑inta gaaʼid taʼabudah daayman da gidir najjaak min al‑diidaan walla ? »
21 Wa tawwaali,
Danyaal radda le l‑malik wa gaal :
« Ya l‑malik,
Allah yansurak.
22 Aywa,
Ilaahi rassal malakah wa sadda khuchuum al‑diidaan.
Wa humman ma gidro sawwo leyi cheyy achaan hu yaʼarif ana bari.
Wa giddaamak inta al‑malik kula,
ana ma sawweet cheyy fasil. »
23 Wa fi l‑bakaan da,
al‑malik firih farha chadiide wa amar yamurgu Danyaal min al‑nugra.
Wa wakit marago Danyaal min al‑nugra,
ma chaafo foogah ayyi jiraah achaan hu aaman be Ilaahah.
24 Wa l‑malik amar yijiibu al‑rujaal al‑chako Danyaal.
Wa jaaboohum wa ramoohum fi nugrat al‑diidaan,
humman wa iyaalhum wa awiinhum.
Wa ma lihgo gaʼar al‑nugra ke bas,
al‑diidaan khatafoohum wa kassaro udaamhum.
25 Wa baʼad da,
al‑malik Daariyuus katab le kulla l‑naas min al‑chuʼuub wa l‑umam wa l‑lukhkhaat al‑saakniin fi kulla l‑ard wa gaal :
Al‑salaam aleekum.
26 Daahu ana naamur al‑naas fi kulla mamlakati.
Khalli yakhaafo min Ilaah Danyaal khoof chadiid.
Achaan hu bas Allah al‑Hayy,
al‑Daayim ila l‑abad.
Wa mamlakatah abadan ma tiddammar
wa mulkah kula ma yikammil.
27 Wa hu al‑yafzaʼ wa yinajji
wa hu al‑yisawwi alaamaat wa ajaayib
fi l‑sama wa fi l‑ard.
Wa hu bas al‑najja Danyaal
min daribiin al‑diidaan.
28 Wa Danyaal najah fi ayyaam hukum Daariyuus wa hukum Kuurach al‑Faarisi.*