Aazuumit Balchaasar
5
1 Wa fi ayyaam muluk Balchaasar,
hu sawwa aazuuma kabiire le alif min muwazzafiinah wa chirib maʼaahum khamar.
2 Wa wakit hu gaaʼid yachrab al‑khamar da,
hu amar yijiibu al‑mawaaʼiin hana l‑dahab wa l‑fudda al‑abuuh Nabuukhadnasar chaalaahum wa jaabaahum min beet Allah al‑gaaʼid fi Madiinat al‑Khudus.
Wa da achaan al‑malik wa muwazzafiinah wa awiinah wa sirriiyaatah yacharbo beehum.
3 Wa khalaas,
humman jaabo al‑mawaaʼiin hana l‑dahab al‑awwal chaaloohum min beet Allah al‑gaaʼid fi Madiinat al‑Khudus wa l‑malik wa muwazzafiinah wa awiinah wa sirriiyaatah chirbo beehum.
4 Humman chirbo al‑khamar wa khanno le ilaahaathum al‑min dahab wa fudda wa nahaas wa hadiid wa khachab wa hujaar.
5 Wa tawwaali,
baano jamb al‑faanuus asaabiʼ hana iid insaan wa gaaʼidiin yaktubu fi bayaad al‑durdur hana gasir al‑malik.
Wa l‑malik chaaf al‑iid al‑gaaʼide taktib.
6 Khalaas al‑malik wijhah alkhayyar wa khaaf wa heelah barad wa rijileenah gaaʼidiin yarjufu.
7 Wa l‑malik naada be hiss chadiid wa gaal yijiibu giddaamah kulla l‑chawwaafiin wa l‑munajjimiin wa l‑khattaatiin al‑humman mustachaariin hana Baabil.
Wa gaal leehum :
« Ayyi naadum minku al‑gidir gara al‑kitaaba di wa fassarha leyi,
nilabbisah khalag khaali al‑yalbasooh al‑muluuk wa nidiss leyah silsila hana dahab fi ragabatah wa nidarrijah taalit rajul fi l‑mamlaka. »
8 Wa wakit kulla l‑mustachaariin jo le l‑malik,
ma gidro garo al‑kitaaba wa la gidro fassarooha leyah.
9 Al‑malik Balchaasar khaaf ziyaada wa wijhah alkhayyar marra waahid wa muwazzafiinah kula barjalo.
Al‑malik naada Danyaal
10 Wa wakit al‑malika amm al‑malik simʼat be l‑cheyy al‑kaan le l‑malik wa muwazzafiinah,
jaat wa dakhalat fi bakaan al‑aazuuma wa gaalat :
« Al‑malik,
Allah yansurak.
Ma takhaaf wa wijhak kula khalli ma yilkhayyar.
11 Achaan fiyah raajil fi mamlakatak al‑ruuh al‑ilaahaat al‑khudduusiin gaaʼide foogah.
Wa fi wakit abuuk,
al‑raajil da maʼruuf be l‑ilim wa l‑fihim wa l‑hikma misil hikmat al‑ilaahaat.
Wa abuuk al‑malik Nabuukhadnasar fi zamanah khattaah kabiir al‑sahhaariin wa l‑chawwaafiin wa l‑munajjimiin wa l‑khattaatiin.
12 Wa l‑raajil da usmah Danyaal wa l‑malik sammaah Beltachaasar.
Wa hu indah agul kabiir wa maʼrafa wa fihim al‑beehum yifassir al‑hilim wa yaʼarif al‑hije al‑indah maʼana gawi wa yihill al‑machaakil al‑gaasiyiin.
Hassaʼ da,
naadi Danyaal wa hu yifassir leek al‑kitaaba di. »
13 Wa khalaas,
jaabo Danyaal giddaam al‑malik wa l‑malik saʼalah wa gaal :
« Inta bas Danyaal walla ?
Inta min al‑naas al‑abuuyi karabaahum wa jaabaahum min balad Yahuuza ?
14 Ana simiʼt kadar ruuh al‑ilaahaat gaaʼide foogak wa inta maʼruuf be l‑ilim wa l‑fihim wa l‑hikma al‑ziyaada.
15 Wa jaabo giddaami kulla l‑mustachaariin wa l‑chawwaafiin achaan yagru leyi al‑kitaaba di wa yifassuruuha wa laakin ma gidro yifassuruuha.
16 Wa ana simiʼt kadar inta tifassir al‑hilim wa tihill al‑machaakil al‑gaasiyiin.
Wa kan gidirt gareet al‑kitaaba di wa fassartaha leyi,
ana nilabbisak khalag khaali al‑yalbasooh al‑muluuk wa nidiss leek silsila hana dahab fi ragabatak wa nidarrijak taalit rajul fi l‑mamlaka. »
17 Wa Danyaal radda le l‑malik wa gaal :
« Khalli hadaayaak yagoodu leek inta.
Wa kan tanti,
anti al‑aakhariin.
Wa laakin ana kamaan nagri al‑kitaaba di wa nifassirha leek.
18 Ya l‑malik,
Allah al‑Aali anta abuuk Nabuukhadnasar muluk wa azama wa charaf wa majd.
19 Wa min chiddit al‑azama al‑antaaha leyah,
kulla l‑naas min al‑chuʼuub wa l‑umam wa l‑lukhkhaat yarjufu giddaamah min al‑khoof.
Al‑hu yidoor yaktulah,
yaktulah wa l‑yidoor yikhalliih,
yikhalliih.
Wa l‑yidoor yarfaʼah,
yarfaʼah wa l‑yidoor yarmiih,
yarmiih.
20 Wa laakin wakit galbah gamma wa achchaddad wa astakbar,
khalaas al‑mamlaka maragat minnah wa charafah kula chaalooh minnah.
21 Wa taradooh min ust al‑naas wa aglah albaddal min agul insaan le agul haywaan.
Wa aach maʼa hamiir al‑kadaade wa akal gechch misil toor.
Wa jismah anballa be karany al‑nazal foogah min al‑sama lahaddi allam kadar Allah al‑Aali,
hu bas siid al‑muluk wa yanti mulkah le l‑naadum al‑hu yidoorah.
22 « Ya Balchaasar,
inta wileedah wa taʼarif kulla cheyy al‑kaan le abuuk Nabuukhadnasar.
Wa laakin ma maskant nafsak.
23 Inta gammeet didd Allah Rabb al‑samaawaat wa jaabo leek mawaaʼiin beetah wa chiribtu beehum al‑khamar,
inta wa muwazzafiinak wa awiinak wa sirriiyaatak.
Wa khanneet le ilaahaatak al‑min dahab wa fudda wa nahaas wa hadiid wa khachab wa hujaar.
Wa humman ilaahaat al‑ma yichiifu wa la yasmaʼo wa la yaʼarfu cheyy.
Wa be da kula,
inta abeet ma timajjid Allah al‑antaak al‑haya wa gaaʼid yiraakhib derbak.
24 Wa fi chaan da,
Allah rassal al‑iid al‑katabat al‑kalaam da.
25 « Wa daahu al‑kalaam al‑maktuub.
‹ Mana Mana Tagil wa Faarsiin ›.
26 Wa daahu tafsiirah.
‹ Mana › yaʼni hasab.
Maʼanaatah Allah hasab ayyaam mulkak
wa khalaas,
mulkak kammal.
27 ‹ Tagil › yaʼni wazin.
Maʼanaatah wazanook fi l‑miizaan
wa waznak ma tagiil.
28 ‹ Faarsiin › yaʼni kassarooh.
Maʼanaatah mulkak ankasar
wa mamlakatak antooha
le mamlakat al‑Maadiyiin wa l‑Faarisiyiin. »
29 Wa khalaas,
Balchaasar amar yilabbusu Danyaal khalag khaali al‑yalbasooh al‑muluuk wa yidissu leyah silsila hana dahab fi ragabatah wa yidarrujuuh taalit rajul fi l‑mamlaka.
30 Wa laakin fi nafs al‑leele di,
Balchaasar malik Baabil,
katalooh.
31 *Wa khalaas,
ja al‑malik Daariyuus min balad al‑Maadiyiin wa chaal al‑mamlaka.
Wa fi l‑wakit daak,
umrah 62 sana.