Al‑malik riʼi be l‑chadara
4
1 *Wa yoom waahid,
al‑malik Nabuukhadnasar wajjah kallam le kulla l‑naas min al‑chuʼuub wa l‑umam wa l‑lukhkhaat al‑gaaʼidiin fi kulla l‑ard wa gaal :
« Al‑salaam aleekum.
2 Ana farhaan nikhabbirku be l‑alaamaat wa l‑ajaayib al‑Allah al‑Aali bayyanaahum leyi.
3 Wa alaamaatah kubaar
wa ajaaybah gawiyiin.
Wa mulkah yuduum ila l‑abad
wa sultitah tagood min zurriiye le zurriiye.
4 « Ana Nabuukhadnasar aayich tamaam wa murtaah fi gasri.
5 Wa laakin yoom waahid,
ana chift hilim al‑khawwafaani wa barjalt min al‑fikir al‑jaani fi raasi wa l‑ruʼya al‑chiftaha wakit ana naayim fi furaachi.
6 Wa amart yijiibu giddaami kulla l‑mustachaariin hana Baabil achaan yifassuru leyi al‑maʼana hana l‑hilim da.
7 Wa khalaas,
kulla l‑sahhaariin wa l‑chawwaafiin wa l‑munajjimiin wa l‑khattaatiin jo giddaami.
Wa ana hajjeet leehum be l‑hilim da wa laakin humman ma gidro yifassuru leyi maʼanaatah.
8 Wa fi l‑akhiir,
ja giddaami Danyaal al‑sammooh Beltachaasar hasab usum ilaahi.
Wa hu,
ruuh al‑ilaahaat al‑khudduusiin gaaʼide foogah.
Wa ana hajjeet leyah be l‑hilim wa gult leyah :
9 ‹ Ya Beltachaasar kabiir al‑sahhaariin,
ana naʼarif kadar ruuh al‑ilaahaat al‑khudduusiin gaaʼide foogak wa sirr gaasi leek inta ke ma fiih.
Daahu hilmi al‑ana hilimt beyah.
Antiini tafsiirah.
10 « ‹ Wa di hi al‑ruʼya al‑ana chiftaha wakit naayim fi furaachi.
Ana chift giddaami chadara tawiile bilheen gaayme fi ust al‑ard.
11 Wa l‑chadara di kibrat wa addaggagat wa tuulha lihig lahaddi l‑sama wa tinchaaf min ayyi bakaan fi l‑ard.
12 Wa waragha sameh wa iyaalha katiiriin wa indaha akil le kulla l‑makhluugiin.
Wa haywaanaat al‑kadaade yagoodu fi dullaha wa tuyuur al‑sama yaskunu fi furuuʼha wa kulla l‑makhluugiin aaychiin minha.
13 « ‹ Wa wakit ana naayim fi furaachi,
ana chift waahid min malaaʼikat Allah al‑muraakhibiin naazil min al‑sama.
14 Wa gaal be hiss aali :
“Agtaʼo al‑chadara di wa kassuru furuuʼha wa mallutu warchaalha wa chattutu iyaalha.
Wa khalli al‑haywaanaat yiʼarrudu min tihitha wa l‑tuyuur kula yiʼarrudu min furuuʼha.
15 Wa laakin khallu dumburha be uruugah yagood fi l‑ard fi ust al‑gechch wa janzuruuh be jinziir hana hadiid wa nahaas.
Wa l‑chadara di timassil insaan.
Wa khalluuh yinballa be l‑karany al‑yanzil foogah min al‑sama wa yaakul al‑gechch maʼa l‑haywaanaat.
16 Wa aglah yibadduluuh min agul insaan le agul haywaan wa yagood misil da lahaddi sabʼa sana.
17 Wa l‑hukum da,
hu kharaar wa amur jaayi min malaaʼikat Allah al‑muraakhibiin achaan kulla l‑naas yaʼarfu kadar Allah al‑Aali,
hu bas siid al‑muluk.
Wa yanti mulkah le l‑naadum al‑hu yidoorah hatta kan miskiin kula.”
18 « ‹ Wa da l‑hilim al‑ana al‑malik Nabuukhadnasar hilimt beyah.
Wa inta Beltachaasar,
ooriini al‑maʼana hana l‑hilim da achaan kulla l‑mustachaariin hana mamlakati ma gidro yifassuruuh leyi.
Wa laakin inta bas tagdar tifassirah achaan ruuh al‑ilaahaat al‑khudduusiin gaaʼide foogak.
› »
Danyaal fassar al‑ruʼya
19 Wa Danyaal al‑bisammuuh Beltachaasar anbahat le wakit chiyya wa fikrah barjalah.
Wa l‑malik gaal leyah :
« Ya Beltachaasar,
khalli al‑hilim wa tafsiirah ma yibarjuluuk.
» Wa Beltachaasar radda leyah wa gaal :
« Ya siidi al‑malik,
yaareet al‑hilim da kan bigi fi udwaanak wa tafsiirah bigi fi khusmaanak !
20 Al‑chadara al‑inta chiftaha kabiire wa muddaggige wa tuulha lihig al‑sama wa tinchaaf min ayyi bakaan fi l‑ard.
21 Wa waragha sameh wa iyaalha katiiriin wa indaha akil le kulla l‑makhluugiin.
Wa haywaanaat al‑kadaade yagoodu tihitha wa tuyuur al‑sama yaskunu fi furuuʼha.
22 Wa l‑chadara di,
hi inta ya l‑malik !
Inta kibirt wa bigiit gawi misilha wa azamatak bigat kabiire lahaddi lihgat al‑sama wa sultitak lihgat kulla l‑ard.
23 « Ya l‑malik,
battaan inta chift fi ruʼyitak waahid min malaaʼikat Allah al‑muraakhibiin naazil min al‑sama wa gaal :
‹ Agtaʼo al‑chadara di wa dammuruuha.
Wa laakin khallu dumburha be uruugah yagood fi l‑ard fi ust al‑gechch wa janzuruuh be jinziir hana hadiid wa nahaas.
Wa khalluuh yinballa be l‑karany al‑yanzil foogah min al‑sama wa yaakul al‑gechch maʼa haywaanaat al‑kadaade.
Wa yagood misil da lahaddi sabʼa sana. ›
24 « Wa daahu tafsiir al‑ruʼya,
ya l‑malik.
Da hukum Allah al‑Aali leek inta,
ya siidi al‑malik.
25 Yaturduuk min ust al‑naas wa tiʼiich maʼa haywaanaat al‑kadaade wa taakul gechch misil toor wa tinballa be karany al‑yanzil foogak min al‑sama.
Wa misil da,
tagood sabʼa sana lahaddi taʼarif kadar Allah al‑Aali,
hu bas siid al‑muluk wa yanti mulkah le l‑naadum al‑hu yidoorah.
26 Wa laakin khallo dumbur al‑chadara wa uruugah fi l‑ard.
Wa da yiwassif kadar mamlakatak tigabbil leek kan inta allamt kadar Allah Rabb al‑samaawaat,
hu bas siid al‑muluk.
27 « Fi chaan da,
ya l‑malik,
min fadlak kan gaasi leek kula,
asmaʼ kalaami.
Khalli minnak al‑zanib wa sawwi al‑adaala wa khalli al‑khataaya wa arham al‑masaakiin.
Wa be da,
nafsak tukuun murtaaha daayman. »
Al‑ruʼya alhaggagat fi l‑malik
28 Wa kulla l‑kalaam al‑fassarah Danyaal baʼadeen bigi fi l‑malik Nabuukhadnasar.
29 Wa fi muddit 12 chahar baʼad hu fassar al‑hilim,
yoom waahid al‑malik gaaʼid yuruukh foog fi raas al‑gasir hana mamlakat Baabil.
30 Wa gaal :
« Di ma Baabil al‑kabiire al‑ana baneetha achaan tabga aasima le mamlakati walla ?
Wa ana baneetha be gudurti wa khuwwiti wa charafi wa majdi. »
31 Wa wakit al‑malik Nabuukhadnasar gaaʼid yikallim ke bas,
tawwaali hiss min al‑sama radda leyah wa gaal :
« Ya l‑malik Nabuukhadnasar,
asmaʼ !
Mulkak marag min iideenak khalaas.
32 Wa yaturduuk min ust al‑naas wa tiʼiich maʼa haywaanaat al‑kadaade wa taakul gechch misil toor.
Wa misil da,
tagood sabʼa sana lahaddi inta allamt kadar Allah al‑Aali,
hu bas siid al‑muluk wa yanti mulkah le l‑naadum al‑hu yidoorah. »
33 Wa tawwaali,
al‑hukum tamma fi Nabuukhadnasar.
Wa khalaas,
taradooh min ust al‑naas wa akal gechch misil toor.
Wa jismah anballa be l‑karany al‑nazal min al‑sama lahaddi suufah bigi tuwaal misil riich al‑tuyuur wa khanaafrah bigo misil khanaafir al‑suguura.
Al‑malik taab wa chakar Allah
34 Wa Nabuukhadnasar gaal :
« Baʼad al‑sabʼa siniin al‑muhaddadiin,
ana rafaʼt uyuuni le l‑sama wa agli ja foogi battaan.
Wa khalaas,
ana chakart Allah al‑Aali wa khanneet be usmah wa majjadtah hu Allah al‑Hayy al‑Daayim.
Hu yamluk daayman wa ila l‑abad
wa mulkah gaaʼid min zurriiye le zurriiye.
35 Wa kulla sukkaan al‑ard
ma yitimmu cheyy fi giddaamah.
Wa hu yisawwi kulla cheyy al‑yidoorah
fi sukkaan al‑sama
wa sukkaan al‑ard.
Wa ma fi waahid yagdar yamnaʼah
wa la yuguul leyah :
‹ Sawweet chunu ? ›
36 « Wa wakit agli ja foogi,
tawwaali ligiit charaf mulki wa majdi wa khuwwiti.
Wa l‑masaaʼiil wa l‑muwazzafiin hana mamlakati dawwarooni wa ana bigiit malik battaan wa azamati zaadat marra waahid.
37 Hassaʼ da,
ana Nabuukhadnasar nikhanni be usmah wa nachkurah wa nimajjid Allah malik al‑samaawaat al‑kulla amalah sahiih wa kulla duruubah induhum adaala.
Wa hu gaadir yizill al‑mustakbiriin. »