Al‑malik amar yaʼabudu al‑sanam
3
1 Wa baʼad da,
al‑malik Nabuukhadnasar sawwa sanam hana dahab tuulah 60 duraaʼ wa urdah 6 duraaʼ.
Wa khattaah fi l‑sahale al‑usumha Duura fi wulaayat Baabil.
2 Wa l‑malik azam kulla l‑muwakkaliin wa l‑muhaafiziin wa ruʼasa al‑wulaayaat wa l‑mustachaariin wa l‑muwakkaliin be hafidiin al‑maal wa l‑gudiya wa naas al‑chariiʼa wa kulla l‑masaaʼiil hana l‑manaatig achaan yaju yahdaro fi l‑aazuuma hana l‑malik al‑tukhuss al‑sanam.
3 Wa khalaas,
kulla l‑muwakkaliin wa l‑muhaafiziin wa ruʼasa al‑wulaayaat wa l‑mustachaariin wa l‑muwakkaliin be hafidiin al‑maal wa l‑gudiya wa naas al‑chariiʼa wa kulla l‑masaaʼiil hana l‑manaatig jo fi l‑aazuuma di wa wagafo giddaam al‑sanam al‑khattaah al‑malik Nabuukhadnasar.
4 Wa l‑munazzim hana l‑aazuuma naada be hiss aali wa gaal :
« Ya l‑naas al‑laammiin min al‑chuʼuub wa l‑umam wa l‑lukhkhaat,
daahu al‑amur buguul ke :
5 ‹ Min simiʼtu hiss al‑buug wa l‑suffaara wa l‑jigindiiye wa amsibeybe wa l‑gitaar wa kulla nafar hana aalaat al‑musiikha,
waajib tidanguru wa tasjudu giddaam al‑sanam hana l‑dahab al‑khattaah al‑malik Nabuukhadnasar.
6 Wa ayyi naadum al‑aba ma yidangir wa yasjud le l‑sanam da,
tawwaali yichiiluuh wa yarmuuh fi naar amlahiib al‑chadiide.
› »
7 Wa fi chaan da,
kulla l‑naas min al‑chuʼuub wa l‑umam wa l‑lukhkhaat wakit simʼo hiss al‑buug wa l‑suffaara wa l‑jigindiiye wa amsibeybe wa l‑gitaar wa kulla nafar hana aalaat al‑musiikha,
khalaas dangaro wa sajado le l‑sanam hana l‑dahab al‑khattaah al‑malik Nabuukhadnasar.
Rufgaan Danyaal abo ma yasjudu
8 Wa fi nafs al‑wakit da bas,
naas waahidiin min al‑Baabiliyiin jo wa gaddamo chakwa didd al‑Yahuud.
9 Wa humman gaalo le l‑malik Nabuukhadnasar :
« Allah yansurak !
10 Ya l‑malik,
inta anteet amur le ayyi naadum al‑simiʼ hiss al‑buug wa l‑suffaara wa l‑jigindiiye wa amsibeybe wa l‑gitaar wa kulla nafar hana aalaat al‑musiikha,
waajib yidangir wa yasjud le l‑sanam hana l‑dahab.
11 Wa kan naadum aba ma yidangir wa yasjud le l‑sanam,
yichiiluuh wa yarmuuh fi naar amlahiib al‑chadiide.
12 Ya l‑malik,
daahu fiyah naas waahidiin min al‑Yahuud al‑inta anteethum al‑idaara hana wulaayat Baabil wa humman Chadraak wa Michaak wa Abdalnagu.
Wa l‑rujaal dool ma karramo amrak wa ma abado ilaahaatak wa ma sajado le sanamak hana l‑dahab al‑inta khatteetah. »
13 Wa fi l‑bakaan da,
al‑malik Nabuukhadnasar ziʼil zaʼal chadiid wa amar yijiibu leyah Chadraak wa Michaak wa Abdalnagu.
Wa khalaas,
jaaboohum giddaam al‑malik.
14 Wa l‑malik saʼalaahum wa gaal :
« Sahiih ke intu Chadraak wa Michaak wa Abdalnagu ma gaaʼidiin taʼabudu ilaahaati wa ma tasjudu le l‑sanam hana l‑dahab al‑ana khatteetah walla ?
15 Wa hassaʼ da kan intu jaahiziin,
min simiʼtu hiss al‑buug wa l‑suffaara wa l‑jigindiiye wa amsibeybe wa l‑gitaar wa kulla nafar hana aalaat al‑musiikha,
tawwaali danguru wa asjudu le l‑sanam hana l‑dahab al‑ana al‑malik Nabuukhadnasar khatteetah.
Wa kan abeetu ma taʼabuduuh kamaan,
tawwaali yichiiluuku wa yarmuuku fi l‑naar amlahiib al‑chadiide di.
Wa nichiif al‑ilaah al‑yagdar yamrugku min iidi ana ! »
16 Wa Chadraak wa Michaak wa Abdalnagu raddo wa gaalo le l‑malik :
« Aniina ma nagdaro nihajju leek cheyy fi l‑kalaam da.
17 Wa laakin,
ya l‑malik,
Ilaahna al‑aniina gaaʼidiin naʼabuduuh yagdar yinajjiina min al‑naar amlahiib al‑chadiide wa min iidak inta kula.
18 Wa kan ma najjaana kula,
aʼarif ya l‑malik,
aniina ma naʼabudu ilaahaatak wa la nasjudu le sanamak hana l‑dahab al‑inta khatteetah. »
19 Wa wakit al‑malik Nabuukhadnasar simiʼ al‑kalaam da,
ziʼil zaʼal chadiid wa wijhah alkhayyar.
Wa gamma didd Chadraak wa Michaak wa Abdalnagu wa amar yihammu al‑naar di sabʼa marraat ziyaada min awwal.
20 Wa battaan amar waahidiin min askarah al‑chudaad yirabbutu Chadraak wa Michaak wa Abdalnagu wa yarmuuhum fi l‑naar amlahiib al‑chadiide.
21 Wa tawwaali,
rabbatoohum le l‑rujaal dool wa ramoohum fi l‑naar amlahiib al‑chadiide be jalaaliibhum wa saraawiilhum wa tawaagiihum wa kulla lubaashum.
22 Wa min chiddit amur al‑malik,
al‑naar hammooha ziyaada lahaddi akalat al‑askar al‑ramoohum le Chadraak wa Michaak wa Abdalnagu.
23 Wa kan le l‑naas al‑talaata al‑humman Chadraak wa Michaak wa Abdalnagu,
ramoohum murabbatiin fi ust al‑naar amlahiib al‑chadiide.
Allah najja al‑rufgaan min al‑naar
24 Wa tawwaali,
al‑malik Nabuukhadnasar anbahat wa saʼal masaaʼiilah wa gaal :
« Ma rameena talaata naas murabbatiin fi ust al‑naar walla ?
» Wa humman raddo leyah wa gaalo :
« Aywa,
ya l‑malik. »
25 Wa l‑malik radda leehum wa gaal :
« Daahu ana gaaʼid nichiif arbaʼa naas mufartagiin wa raaykhiin fi ust al‑naar wa cheyy waahid kula ma sawwaahum.
Wa l‑raabiʼ da bichaabih ibn al‑ilaahaat ! »
26 Wa l‑malik garrab le khachum al‑naar amlahiib al‑chadiide wa naada wa gaal :
« Ya Chadraak wa Michaak wa Abdalnagu,
ya abiid Allah al‑Aali !
Amurgu min al‑naar wa taʼaalu !
» Wa khalaas,
Chadraak wa Michaak wa Abdalnagu marago min ust al‑naar wa jo.
27 Wa kulla l‑muwakkaliin wa l‑muhaafiziin wa ruʼasa al‑wulaayaat wa l‑masaaʼiil hana l‑malik jo hawwagoohum wa chaafo kadar al‑naar ma akalat jisimhum wa suufaay waahide min ruuseehum kula ma hirgat.
Wa khulgaanhum kula ma khayyaro wa riihit al‑naar kula fooghum ma tinchamma.
28 Wa Nabuukhadnasar gaal :
« Baarak Allah Ilaah Chadraak wa Michaak wa Abdalnagu al‑rassal malakah achaan yinajji abiidah al‑humman atwakkalo aleyah.
Wa khaalafo amri ana al‑malik wa khassado be l‑moot kula akheer leehum min yaʼabudu wa yasjudu le ilaah aakhar al‑ma Ilaahhum.
29 Asmaʼo,
ya l‑naas !
Min baʼad al‑yoom,
ayyi naadum min ayyi chaʼab aw umma aw lukhkha kan gaal kalaam didd Ilaah Chadraak wa Michaak wa Abdalnagu,
nigattiʼah lahamaay lahamaay wa nidammir beetah wa yabga misil dungus achaan ma fi Ilaah aakhar al‑yagdar yinajji be tariiga misil di. »
30 Wa baʼad da,
al‑malik anta khiima le Chadraak wa Michaak wa Abdalnagu fi wulaayat Baabil.