Kitaab Huuchaʼ
min Kutub al‑Anbiya
1
1 Daahu kalaam Allah al‑gaalah le Huuchaʼ wileed Biiri.
Wa da fi ayyaam hukum Uzziiya wa Yuutaam wa Ahaaz wa Hizkhiiya muluuk mamlakat Yahuuza wa fi ayyaam hukum Yarubaʼaam wileed Yahuʼaach malik mamlakat Israaʼiil.
Huuchaʼ yaakhud mara charmuuta
2 Daahu bidaayit kalaam Allah al‑gaalah be waasitat al‑nabi Huuchaʼ.
Allah gaal le Huuchaʼ :
« Amchi aakhud leek mara charmuuta
wa alda minha iyaal zina.
Achaan naas al‑balad achcharmato maʼa l‑asnaam
wa abooni ana Allah. »
3 Wa khalaas,
Huuchaʼ macha akhad Guumar bineeyit Diblaayim wa hi bigat khalbaane wa wildat leyah wileed.
4 Wa Allah gaal le Huuchaʼ :
« Sammi wileedak Yazraʼiil
achaan baʼad wakit chiyya,
ana natlub min zurriiyit Yaahu
al‑damm al‑jidduhum Yaahu
daffagah fi waadi Yazraʼiil.*
Wa nuguchch mamlakat Israaʼiil.
5 Wa fi l‑yoom da,
naksir nubbaal deech Israaʼiil
fi waadi Yazraʼiil. »
6 Wa marit Huuchaʼ battaan bigat khalbaane wa wildat bineeye.
Wa Allah gaal le Huuchaʼ :
« Sammi bineeytak Ma Narhamha
achaan battaan ana ma narham Bani Israaʼiil
wa ma nakhfir leehum abadan.
7 Laakin narham Bani Yahuuza
wa ana Allah Ilaahhum,
ninajjiihum.
Aywa,
ninajjiihum bala nubbaal wa la seef wa la harib
wa bala kheel wa la siyaad kheel. »
8 Wa marit Huuchaʼ faradat Ma Narhamha.
Wa baʼad da,
battaan bigat khalbaane wa wildat wileed.
9 Wa Allah gaal :
« Sammi wileedak Ma Chaʼabi
achaan intu ma chaʼabi
wa ana kula ma Ilaahku. »
Allah anta acham le chaʼabah
10 *Adad Bani Israaʼiil yabga misil ramla hana khachum al‑bahar
al‑ma tinwazin wa la tinhasib.
Wa fi l‑bakaan al‑awwal Allah gaal foogah :
« Intu ma chaʼabi »,
fi nafs al‑bakaan,
hu yuguul leehum :
« Intu iyaali ana Allah al‑Hayy. »
11 Bani Yahuuza wa Bani Israaʼiil yilimmu sawa
wa yidarruju naadum waahid kabiir fooghum.
Wa yaktaro fi arduhum
fi yoom kabiir al‑binaaduuh Yazraʼiil
(maʼanaatah Allah yazraʼ).