2
1 Guulu le akhwaanku :
« Intu chaʼabi. »
Wa guulu le akhwaatku :
« Narhamhin. »
Bani Israaʼiil misil mara charmuuta
2 « Achku ammuku Israaʼiil.
Aywa,
achkuuha !
Achaan battaan hi ma marti
wa ana kula ma raajilha.
Khalli hi tamrug alaamaat charmatatha min wijihha
wa alaamaat zinaaha min been duyuudha.
3 Kan ma maragathum,
ana nisallibha wa tagood aryaane
wa nikhalliiha misil wildooha.
Nisawwiiha misil sahara
wa misil ard jafaaf
wa naktulha be l‑atach.
4 Wa iyaalha ma narhamhum
achaan humman iyaal zina.
5 Ammuhum achcharmatat.
Aywa,
hi al‑wildathum alkhattat be l‑eeb
wakit gaalat :
‹ Ana najri wara sudgaani
al‑yantuuni akil wa almi
wa suuf khanam wa gumaach
wa dihin wa charaab. ›
6 Wa fi chaan da,
daahu ana nukhutt chook fi deribha
wa nisiddah be durdur
wa ma talga derib battaan.
7 Hi tajri wara sudgaanha
wa laakin ma talhaghum.
Hi tifattichhum
wa ma talgaahum.
Wa hi tuguul :
‹ Ana nigabbil le raajli al‑awwal
achaan ana murtaaha maʼaayah ziyaada min hassaʼ. ›
8 « Wa hi ma irfat kadar da ana bas al‑gaaʼid nantiiha
al‑gameh wa l‑khamar wa l‑dihin.
Ana kattart al‑fudda wa l‑dahab
wa laakin hi astaʼmalathum le ibaadat Baʼal.
9 Wa fi chaan da,
ana naji wa nichiil
gamhi fi wakt al‑gatiʼ
wa khamari fi wakt al‑darat.
Wa naglaʼ minha suuf al‑khanam wa l‑gumaach
al‑taksi beehum nafisha min al‑ire.
10 Hassaʼ,
nakchif eebha giddaam sudgaanha
wa ma fi al‑yinajjiiha min iidi.
11 Wa niwaggif farahha hana ayyi iid
wa hana awwal yoom fi kulli chahar
wa hana kulli yoom sabt
wa hana kulli aazuuma.
12 Wa nakhrib jineenaat inabha
wa chadar tiinha
al‑be sababhum hi gaalat :
‹ Dool hadaaya al‑antoohum leyi sudgaani. ›
Ana nisawwiihum kadaade
al‑yartaʼo foogha al‑haywaanaat.
13 Ana niʼaakhibha be sabab al‑ayyaam
al‑hi harragat fooghum bakhuur le asnaam Baʼal.
Hi aljammalat be chinifha wa ziinitha
wa jarat wara sudgaanha
wa khalaas,
nisatni. »
Wa da kalaam Allah.
Allah yarham Israaʼiil battaan
14 « Wa be da kula,
nihajji le Israaʼiil be kalaam halu
wa niwaddiiha fi l‑kadaade
wa nikallim leeha be hubb.
15 Hinaak,
nigabbil leeha
jineenaatha hana l‑inab
wa waadi Akuur* al‑hu waadi al‑fasaala
yabga leeha baab
al‑yaji beyah al‑acham.
Hinaak,
hi titaabiʼni
misil fi ayyaam subaaha
wa misil fi wakit hi maragat min balad Masir. »
16 Daahu kalaam Allah :
« Fi l‑yoom da,
inti tinaadiini raajilki
wa battaan ma tinaadiini Baʼal siidki.
17 Ana namrug min khachumki usum asnaam Baʼal
wa battaan ma tinaadi usumhum.
18 Fi l‑yoom da,
nisawwi le chaʼabi Bani Israaʼiil alaakha
maʼa haywaanaat al‑kadaade
wa tuyuur al‑sama wa zawaahif al‑ard.
Wa fi l‑balad,
nikassir al‑nubbaal wa l‑seef
wa niwaggif al‑harib
achaan chaʼabi yunuumu be amaan.
19 Ya Israaʼiil,
nakrub raaski
wa inti tabge misil marti ila l‑abad.
Nakrub raaski be l‑adaala wa l‑hagg
wa be l‑kheer wa l‑rahma.
20 Wa nakrub raaski be sidikh
wa inti taʼarfi kadar ana bas Allah.
21 Wa fi l‑yoom da,
ana nakhbal talab al‑sama
wa l‑sama takhbal talab al‑ard.
Wa da kalaam Allah.
22 Wa l‑ard takhbal talab al‑gameh
wa chadar al‑inab wa l‑zaytuun.
Wa humman yakhbalo talab waadi Yazraʼiil
al‑bakaan al‑ana Allah nazraʼ foogah.
23 Wa nazraʼ leyi ziraaʼa fi l‑ard
wa narham al‑umma al‑naadooha Ma Narhamha.
Wa nuguul leehum al‑naadoohum Ma Chaʼabi :
‹ Intu chaʼabi ›
wa humman yuguulu leyi :
‹ Inta Ilaahna.
› »