Kitaab Yuwiil
min Kutub al‑Anbiya
Al‑hacharaat wa l‑yabaas jaayiin
1
1 Daahu kalaam Allah al‑gaalah le Yuwiil wileed Fatuwiil.
2 Asmaʼo,
ya l‑chuyuukh,
khuttu adaanku kulluku,
ya sukkaan al‑balad !
Cheyy misil da awwal kaan fi zamanku walla ?
Aw kaan fi wakit abbahaatku ?
3 Hajju beyah le iyaalku
wa iyaalku yihajju beyah le iyaalhum
wa iyaalhum yihajju beyah le zurriiyithum.
4 Al‑faddalatah ambukbuk,
al‑jaraad akalah
wa l‑faddalah al‑jaraad,
amkachool akalatah
wa l‑faddalatah amkachool,
saar al‑leel akalah.
5 Ya l‑sakkaara,
gummu wa abku !
Ya charraabiin al‑khamar,
abku be hizin
achaan al‑khamar angataʼ minku.
6 Hacharaat gammo
misil askar didd baladi
wa humman gawiyiin
wa ma yinhasbu min al‑katara.
Wa sunuunhum misil sunuun al‑duud
wa fawaatirhum misil fawaatir mart al‑duud.
7 Wa humman dammaro jineenit inabi
wa kassaro chadar tiini.
Wa marago girfah wa ramooh
wa yabbaso furuuʼah.
8 Abku misil mara sabiiye
al‑rabatat chuwaal misil farde min al‑hizin
achaan tabki le raajilha hana chabaabha.
9 Hadaaya al‑dagiig wa hadaaya al‑charaab,
ma yigaddumuuhum battaan fi beet Allah
wa rujaal al‑diin khaddaamiin Allah hizno.
10 Wa l‑ziraaʼa addammarat
wa l‑ard yibsat misil mara haznaane.
Achaan al‑gameh addammar
wa l‑khamar kammal
wa l‑dihin bigi ma fiih.
11 Ahzano,
ya l‑harraatiin !
Wa abku,
ya siyaad jineenaat al‑inab !
Achaan ma tagtaʼo al‑gameh al‑ahmar
wa lammiin al‑gameh al‑abyad bigi ma fiih.
12 Wa jineenaat al‑inab yibso
wa chadar al‑tiin jaffa.
Wa kulla chadar al‑yanti iyaal yibis
aywa,
al‑rummaan wa l‑nakhal wa l‑tuffaah.
Wa l‑farah waddar min guluub al‑naas.
Yuwiil talab al‑tooba wa l‑siyaam
13 Ya rujaal al‑diin,
albaso khulgaan al‑hizin wa nuuhu
wa abku,
ya intu al‑khaddaamiin fi l‑madbah.
Taʼaalu ahzano tuul al‑leel be khulgaan al‑hizin,
ya khaddaamiin Ilaahi.
Hadaaya al‑dagiig wa hadaaya al‑charaab
ma yigaddumuuhum battaan fi beet Allah Ilaahku.
14 Khassusu yoom hana siyaam
wa kharruru malamma khaassa.
Limmu al‑chuyuukh
wa kulla sukkaan al‑balad
fi beet Allah Ilaahku
wa kooruku leyah.
Yoom Allah yoom al‑damaar
15 Ya l‑salaam !
Kikkeef al‑yoom da !
Yoom Allah garrab
wa da jaayi min al‑Gaadir be damaar.
16 Wa min giddaamna,
al‑maʼaach angataʼ
wa min beet Allah,
al‑farha wa l‑suruur angataʼo.
17 Al‑teeraab yibis fi lubb al‑ard
wa l‑dabangaat alhaddamo.
Wa l‑makhaazin fido
achaan al‑maʼaach yibis.
18 Asmaʼo,
al‑bahaayim gaaʼidiin yaguntu
wa l‑bagar aayriin fi ayyi bakaan.
Achaan ma induhum gechch
wa l‑khanam kula taʼbaaniin.
Salaat al‑nabi
19 Nasrakh leek inta,
ya Allah,
achaan al‑naar akalat gechch al‑kadaade
wa l‑hariige akalat kulla chadar al‑khala.
20 Wa haywaanaat al‑kadaade kula
wajjaho leek
achaan kulla l‑ruhuud yibso
wa l‑naar akalat gechch al‑kadaade.