Allah yaktul Luyaataan
27
1 Wa fi l‑yoom da,
Allah yiʼaakhib
Luyaataan al‑daabi al‑muʼarrid
be seefah al‑tariin wa kabiir wa chadiid.
Wa hu Luyaataan al‑daabi al‑aʼwaj
aywa,
hu yaktul al‑khuul al‑fi l‑bahar.
Al‑Rabb wa jineentah hana l‑inab
2 Wa fi l‑yoom da,
khannu
le jineenit al‑inab al‑laziize.
3 Ana Allah bas haarisha
wa nazgiiha fi kulla wakit.
Wa fi chaan ma yadkhulu foogha,
ana gaaʼid nahrisha leel wa nahaar.
4 Ana battaan ma indi
ayyi khadab diddaha.
Laakin kan ligiit chook
wa andireesa gaaʼidiin yiwaajuhuuni,
ana nuruukh fooghum
wa nahrighum kulluhum.
5 Kan yidooru yisawwuuni maljaʼhum,
khalli yisawwu maʼaayi salaam
aywa,
yisawwu maʼaayi salaam.
Allah yamha khata chaʼabah
6 Wa fi l‑mustakhbal,
zurriiyit Yaakhuub
yisawwu uruug.
Bani Israaʼiil yabgo misil chadara,
yikhadduru wa yinawwuru
wa yamlo al‑aalam be fawaakihhum.
7 Wa Allah ma darabaahum
misil darab al‑naas al‑daraboohum.
Wa ma katalaahum
misil katal al‑naas al‑kataloohum.
8 Wa laakin wakit Allah aakhabaahum,
hu taradaahum wa maragaahum
wa gachchaahum be nafkha chadiide
fi yoom hana riih al‑jaaye min sabaah.
9 Wa be misil da,
yingachcha khata Yaakhuub
wa daahu natiijat khufraan zanbah.
Yaakhuub yikassir hujaar al‑madbah
wa yisawwiihum misil al‑dagiig al‑marhuuk.
Wa l‑iidaan al‑khazzoohum le ibaadat Achiira
wa makhaabir al‑bakhuur,
kulluhum yabgo ma fiihum.
10 Al‑madiina al‑gawiiye bigat maʼzuula
wa bigat misil al‑marʼa al‑abooh
wa khallooh misil kadaade.
Al‑ajjaal yaju yasraho foogha
wa yaakulu warag chadarha
wa yinjammo foogha.
11 Wa wakit al‑furuuʼ yabgo yaabsiin,
al‑awiin yikassiranhum
wa yiʼoogidanhum naar.
Achaan al‑chaʼab dool ma induhum maʼrafa
wa l‑khalagaahum ma rahamaahum
wa l‑kawwanaahum ma hanna fooghum.
Al‑gabbiliin fi Madiinat al‑Khudus
12 Wa fi l‑yoom da,
Allah yihitt al‑chadar
min bahar al‑Furaat lahaddi waadi Masir.
Wa yilaggutuuku al‑waahid baʼad al‑aakhar,
ya Bani Israaʼiil !
13 Wa fi l‑yoom da,
yadurbu al‑buug al‑kabiir.
Wa khalaas,
yaju al‑waddaro fi balad Achuur
wa l‑muchattatiin fi balad Masir.
Wa humman yasjudu giddaam Allah
fi l‑jabal al‑mukhaddas,
fi Madiinat al‑Khudus.