Khine al‑madiina al‑gawiiye
26
1 Wa fi l‑yoom da,
yikhannu al‑khine da fi balad Yahuuza :
« Aniina indina madiina gawiiye.
Wa Allah antaana al‑naja
wa yahmiina misil daraadirha al‑gawiyiin.
2 Aftaho al‑biibaan
achaan tadkhul al‑umma al‑saalhe wa haafde amaanha.
3 Ya Rabb !
Le l‑naadum al‑saabit,
inta tijiib al‑salaam
achaan hu yitwakkal aleek.
4 Atwakkalo ale Allah daayman.
Aywa !
Allah al‑Rabb
hu al‑jabal al‑daayim.
5 Achaan hu rama sukkaan al‑hille al‑fi l‑jabal.
Hu rama al‑hille al‑gaaʼide foog.
Hu ramaaha fi l‑ard wa darabaaha
lahaddi wagaʼat fi l‑turaab.
6 Wa hi yifajjukhuuha be l‑rijle
tihit rijle al‑masaakiin
wa tihit gadam al‑daʼiifiin. »
Salaat al‑acham fi Allah
7 Ya Rabb,
derib al‑saalih yamchi adiil
aywa,
inta tiʼaddil derib al‑saalih.
8 Aywa fi tariig adaaltak,
nukhuttu achamna foogak,
ya Allah !
Aniina muchtaagiin le ninaadu usmak
wa nizzakkarook.
9 Wa nafsi tagram leek be l‑leel
wa ruuhi fi daakhili tifattichak.
Achaan wakit adaaltak tagood fi l‑ard,
khalaas sukkaan al‑aalam yilʼallamo al‑hagg.
10 Laakin kan yihinnu fi l‑aasi,
hu ma yilʼallam al‑adaala.
Fi balad al‑hagg kula,
hu yisawwi al‑fasaala
wa ma yichiif azamat Allah.
11 Ya Allah !
Iidak marfuuʼa foog
wa humman ma chaafooha.
Yichiifu mahabbitak al‑chadiide le chaʼabak
wa l‑eeb yakrubhum
wa l‑naar al‑jahhaztaha le udwaanak
taakulhum.
12 Ya Allah,
inta bas sabbatt leena al‑salaam
achaan kulla aʼmaalna,
inta bas tihaggighum leena.
13 Ya Allah Ilaahna,
siyaad aakhariin balaak inta
malako foogna
laakin usmak inta wiheedak bas,
aniina nazkuruuh.
14 Al‑maytiin dool ma yahyo battaan
al‑naas al‑atwaffo ma yugummu.
Achaan inta dammartuhum
wa aakhabtuhum
wa gachcheet kulla zikirhum.
15 Ya Allah,
inta kattart al‑umma
aywa,
inta kattart ummatak
wa wassaft majdak
wa wassaʼt kulla huduud al‑balad.
16 Ya Allah,
fi l‑diige humman fattachook
wa alkhaalo be duʼaahum tihit tihit
wakit inta aakhabtuhum.
17 Misil mara al‑khalbaane al‑garrabat le l‑waaluuda
gaaʼide tittanna wa tasrakh min wajaʼ al‑talaga,
di bas haalitna aniina
giddaamak inta,
ya Allah.
18 Aniina khilibna wa l‑talaga karabatna
laakin da misil wilidna al‑riih bas.
Ma jibna al‑naja fi l‑ard
wa la jibna sukkaan jadiidiin fi l‑aalam.
19 Ya Allah !
Khalli maytiinak yahyo
wa janaazaathum yabʼaso.
Gummu wa zakhrutu,
ya intu al‑saakniin fi lubb al‑ard !
Achaan Allah yinazzil al‑nuur misil al‑karany
wa beyah al‑maytiin yabʼaso.
Allah yihaasib sukkaan al‑ard
20 Amchu,
ya chaʼabi,
gabbulu buyuutku
wa siddu biibaanku.
Wa allabbado chiyya
lahaddi al‑zaʼal da yufuut.
21 Achaan daahu Allah maarig min bakaanah
wa yihaasib sukkaan al‑ard be sabab khataahum.
Wa l‑ard tibayyin al‑damm al‑daffag foogha
wa ma tilabbid al‑maktuuliin.