Matarat al‑kharaab fi l‑Saamira
28
1 Al‑azaab le madiinat al‑Saamira,
hi misil taaj al‑istikbaar
hana sakkaara Afraayim.
Al‑azaab leeha hi,
al‑jamaalha wa ziinitha
misil zuhuur al‑yaabsiin.
Al‑madiina di fi raas al‑waadi al‑akhdar,
wa da bakaanku intu al‑khimirtu min al‑khamar.
2 Daahu yaji raajil gaadir wa chadiid min al‑Rabb
al‑bichaabih matarat barad
wa riih chadiide al‑tidammir.
Wa hu misil matara al‑indaha almi chadiid al‑yakhrig
wa be chidde,
kulla cheyy yiraggidah fi l‑ard.
3 Wa l‑madiina al‑misil taaj al‑istikbaar
hana sakkaara Afraayim,
hu yifajjikhha tihit rijileenah.
4 Wa l‑madiina al‑gaaʼide
fi raas al‑waadi al‑akhdar,
hi al‑jamaalha wa ziinitha
misil zuhuur al‑yaabsiin,
hi tabga misil al‑tiin al‑yalda ajala
wa yanjad gubbaal waktah.
Al‑yichiifhum yichiilhum
wa yazruthum tchutt !
5 Wa fi l‑yoom da,
Allah al‑Gaadir
yabga misil taaj jamiil
wa kadmuul hana charaf
le l‑faddalo min chaʼabah.
6 Wa Allah yanti ruuh al‑adaala
le l‑yisawwu al‑chariiʼa.
Wa yanti al‑gudra le l‑yihaarubu al‑adu
wa yadharooh min biibaan al‑madiina.
Kalaam al‑sakkaara
7 Wa laakin al‑naas dool,
humman kula yittartaʼo be sabab al‑khamar
wa yiwadduru be sabab al‑mariise.
Wa rujaal al‑diin wa l‑anbiya
yittartaʼo be sabab al‑mariise
wa yibarjulu be sabab al‑khamar.
Wa yiwadduru be sabab al‑mariise
wa yikhalbutu al‑ruʼya
wa yittartaʼo fi l‑chariiʼa.
8 Aywa,
kulla l‑taraabiiz malaaniin
be l‑gadiif wa l‑wasaakha
wa ma fi bakaan waahid nadiif.
9 Wa humman yuguulu :
« Le yaatu
Ichaʼya yidoor yiwassif al‑maʼrafa ?
Wa le yaatu
yifahhim kalaamah al‑simʼah ?
Le l‑atfaal al‑mafruudiin walla ?
Aywa,
le l‑atfaal al‑khallo al‑ridaaʼa walla ?
10 Asmaʼo,
hu buguul kalaam bala maʼana :
‹ La la la la la,
da da da da da,
ke ke ke ke ke.
› »
11 Tamaam !
Be kalaam ma mafhuum
wa be lisaan ma maʼruuf,
al‑Rabb yihajji le chaʼabah.
12 Hu gaal leehum :
« Daahu bakaan al‑jumma,
jummu al‑ayyaan !
Wa daahu bakaan al‑raaha ! »
Wa laakin humman
ma dawwaro yasmaʼooh.
13 Wa be da,
kalaam Allah yabga leehum :
« La la la la la,
da da da da da,
ke ke ke ke ke. »
Khalaas wakit maachiin,
yagaʼo be gafaahum
wa yikassuru salabaahum
wa yagaʼo fi charak wa yakurbuuhum.
Allah khatta hajar al‑zaawiye
14 Wa fi chaan da,
asmaʼo kalaam Allah,
ya l‑chammaatiin,
intu al‑gaaʼidiin tahkumu fi l‑chaʼab da fi Madiinat al‑Khudus.
15 Tuguulu :
« Aniina sawweena alaakha maʼa l‑moot
wa istifaag maʼa l‑khubuur.
Wakit al‑waba yilwassaʼ kula,
ma yalhagna.
Achaan be l‑kidib,
sawweena bakaan al‑yahmiina
wa be l‑khachch,
sawweena bakaan al‑yilabbidna. »
16 Wa fi chaan da,
daahu Allah al‑Rabb gaal :
Ana khatteet hajar fi Sahyuun
wa da hajar zaawiye khaali wa mujarrab
le yisawwi al‑asaas gawi.
Wa ayyi naadum al‑yiʼaamin beyah
abadan ma yagaʼ.
17 Wa nisawwi al‑adaala misil miizaan
wa l‑hagg misil mikyaal.
Wa laakin al‑barad yuguchch
al‑bakaan al‑yahmi al‑kidib
wa almi yakhrig
al‑bakaan al‑mullabbid foogah al‑khachch.
18 Wa alaakhitku maʼa l‑moot tafchul
wa istifaag maʼa l‑khubuur kula yabga ma fiih.
Wa wakit al‑waba yilwassaʼ,
yakhribku.
19 Fi ayyi wakit hu yufuut,
yakrubku
achaan al‑waba yufuut kulla yoom,
fajur wa achiiye.
Wa wakit tasmaʼo be khabarah,
khoof chadiid yakrubku.
20 Wa da misil al‑masal al‑buguul :
« Al‑sariir yabga gisayyir le l‑mattitiin
wa l‑khattaay tabga dayge le l‑khita. »
Tahziir le l‑chammaatiin
21 Be akiid,
Allah yugumm
misil gamma fi jabal Faraasiim*
wa yakhdab
misil khidib fi waadi Gibʼuun.*
Wa da le yisawwi khidimtah
wa hi khidimtah al‑ajiibe
wa yihaggig amalah
wa hu amalah al‑khariib.
22 Wa hassaʼ,
ma tichchammato
achaan ma tidaayugu foogku guyuudku.
Achaan damaar kulla l‑balad
alkharrar khalaas.
Ana simiʼtah
min Allah al‑Rabb al‑Gaadir.
Al‑teeraab wa l‑gatiʼ
23 Aftaho udneeku wa asmaʼo kalaami !
Khuttu baalku wa asmaʼo al‑nuguulah !
24 Wakit al‑harraati yidoor yiteerib,
ma yichaglib al‑ard ayyi wakit
wa yisaawiiha walla ?
Wa kulla yoom yisawwi leeha
majaari walla ?
25 La !
Baʼad saawa al‑ard bas,
yichattit habb al‑kussubarra wa l‑kammuun
wa yimaggin al‑gameh al‑ahmar be sufuuf
wa l‑gameh al‑abyad fi bakaanah
wa gameh al‑kadaade fi khachum al‑zereʼ.
26 Rabbah bas allamah al‑khidme di
wa wassafah kikkeef yisawwiiha.
27 Wa l‑kussubarra ma yudugguuh
be mudgaaga hana hadiid
wa l‑kammuun ma yifajjukhuuh
be rijle al‑araba.
Laakin be asa bas
yuduggu al‑kussubarra
wa be mitraga
yuduggu al‑kammuun.
28 Al‑gameh yarhakooh
laakin ma yudugguuh katiir.
Yifajjukhuuh be rijle al‑araba wa l‑kaarro
laakin ma lahaddi yarhakooh marra waahid.
29 Wa da kula,
jaayi min Allah al‑Gaadir
hu siid al‑choora al‑ajiibe
wa l‑hikma al‑kabiire.