Kitaab Nachiid al‑Anchaad
min Kutub al‑Hikma
1
1 Al‑khine al‑aziim hana l‑malik Suleymaan.
Kalaam al‑mahbuuba
2 Hibbini !
Min fadlak,
hibbini !
Achaan hubbak halu min asiir al‑inab.
3 Itrak yinchamma halu
wa usmak chattat misil riihit al‑itir.
Fi chaan da,
al‑banaat bihibbannak.
4 Chiilni maʼaak.
Yalla najru !
Ya maliki,
waddiini fi khurfitak
wa hinaak,
nalʼabo wa nafraho sawa.
Wa nizzakkaro hubbak al‑halu min asiir al‑inab.
Al‑bihibbannak indihin hagg !
5 Ya banaat Madiinat al‑Khudus,
ana samra wa laakin jamiile,
zarga misil khiyam al‑sayyaara
wa jamiile misil sitaarat beet Suleymaan.
6 Ma tichiifanni achaan ana samra.
Di l‑harraay bas galabat looni.
Awlaad ammi ziʼilo diddi
wa sawwooni haarisat jineenit inab.
Wa laakin jismi al‑misil jineenti,
ana ma harastah.
7 Guul leyi,
inta al‑ana nihibbak,
ween tisarrih khanamak ?
Ween bakaan tigayyil foogah ?
Wassifni achaan ma nifattich wa nuruuh
wa nagaʼ fi diiraan jiiraanak.
Kalaam al‑ruʼyaan
8 Ma taʼarfiih,
inti al‑ajmal min al‑awiin ?
Taabʼi derib khanamah
wa asrahe be inzeeki
jamb dara aniina al‑ruʼyaan.
Kalaam al‑mahbuub
9 Ya habiibti,
inti misil faras arabat Firʼoon malik Masir.
10 Khuduudki jamiiliin
ambeenaat khuruuski
wa ragabatki samha
fi usut ribig zaytuunki.
11 Nisawwu leeki khuruus hana dahab
wa ziina hint fudda.
Kalaam al‑mahbuuba
12 Wakit maliki gaaʼid fi usut rufgaanah,
riihit itri anchammat.
13 Habiibi misil balʼuumi hana sandal al‑muʼallag fi ragabati
wa yargud fi sadri be l‑leel.
14 Habiibi misil nuwwaar al‑hinne
fi jineenit inab fi Een Jidi.
Kalaam al‑mahbuub
15 Inti jamiile,
ya habiibti.
Aywa,
inti jamiile
wa uyuunki samhiin
misil al‑hamaam.
Kalaam al‑mahbuuba
16 Inta jamiil,
ya habiibi.
Inta kula halu.
Wa narugdu fi goozna al‑akhdar.
17 Narugdu tihit chadar al‑arz misil chiʼab beetna
wa tihit furuuʼ al‑sarwi misil amadah.