Kitaab Ichaʼya
min Kutub al‑Anbiya
Mugaddima
Kitaab Ichaʼya hu min Kutub al‑Anbiya. Wa be l‑lukhkha al‑asliiye, kilmit Ichaʼya di maʼanaatha Allah yinajji. Wa Ichaʼya hu nabi Allah al‑gaaʼid yitnabbaʼ le naas mamlakat Yahuuza.
Al‑gisim al‑awwal hana l‑kitaab da yamchi min fasul 1 le fasul 39. Naas mamlakat Yahuuza dawwaro al‑naja min udwaanhum. Laakin Allah dawwar yijiib leehum naja wasiiʼe wa yinajjiihum min ibaadat al‑asnaam wa zunuubhum wa ikhaabah. Wa da, waajib yikhayyuru haalhum wa yikhallu al‑amal al‑fasil. Fi l‑wakit daak, deech balad Achuur chaal khalaas mamlakat Israaʼiil. Wa askar Achuur gammo yihaarubu mamlakat Yahuuza wa haasaro Madiinat al‑Khudus wa laakin ma gidro foogha.
Wa l‑gisim al‑taani yamchi min fasul 40 le fasul 55. Wa l‑gisim da yikallim be kikkeef al‑Baabiliyiin chaalo kulla l‑buldaan al‑mujaawiriinhum. Wa fi l‑wakit daak, mamlakat Yahuuza kula anhazamat giddaam al‑Baabiliyiin wa waddo chaʼabha fi l‑khurba fi Baabil. Wa hinaak gaʼado le muddit 70 sana. Wa fi l‑mudda di, Bani Yahuuza yahsubu Allah Ilaahhum abaahum. Wa laakin al‑nabi ballakh leehum kadar Allah gaadir yamrughum min Baabil wa yigabbilhum fi baladhum. Wa l‑gisim da yihajji battaan be abd al‑Rabb al‑baʼadeen Allah yirassilah. Hu yatʼab katiir laakin fi l‑akhiir, yinajji chaʼab Allah.
Wa l‑gisim al‑taalit yamchi min fasul 56 le fasul 66. Wa l‑gisim da yikallim be mamlakat Faaris al‑jaat wa chaalat al‑hukum fi Baabil. Wa Kuurach malik Faaris saaʼad Bani Yahuuza le yigabbulu fi baladhum. Wakit gabbalo, bado yabnu aasimathum Madiinat al‑Khudus battaan. Wa laakin Bani Yahuuza galibhum ma waahid. Waahidiin gammo battaan yaʼabudu al‑asnaam. Wa laakin al‑nabi hajja leehum be ibaadat Allah wa chajjaʼaahum wa antaahum acham.
Wa kulla l‑kitaab da yikallim leena be gudrat Allah fi taariikh Bani Israaʼiil. Wa da yiʼallimna kadar Allah hu bas al‑Ilaah al‑Waahid wa Rabb kulla l‑makhluugiin.