8
1 Yaareet,
inta bigiit misil akhuuyi
al‑raddaʼatak ammi fi deedha.
Be da,
kan ana nalgaak fi l‑chaariʼ,
nihibbak wa l‑naas ma yiʼayyuruuni.
2 Ana nuguudak wa nidissak fi beet ammi
wa inta tiʼallimni al‑hubb.
Wa ana nazgiik asiir al‑inab be haraarah
wa asiiri hana l‑rummaan.
3 Wa iidah al‑isra gaaʼide tihit raasi
wa iidah al‑zeene hadanatni.
4 Ya banaat Madiinat al‑Khudus,
nihallifkan ma tigawwiman
wa la tiwaʼʼan al‑hubb gabul waktah.
Kalaam al‑banaat
5 Yaati al‑jaaye min al‑sahara
murrakkize fi habiibha ?
Kalaam al‑mahbuuba
Ya habiibi,
ana gawwamtak
tihit chadarat al‑tuffaah.
Wa da bas al‑bakaan al‑ammak taalagat beek,
al‑bakaan al‑wildatak foogah.
6 Khuttini fi galbak wa akhtim foogah
wa dissini misil khaatim fi usbaʼak.
Achaan al‑hubb chadiid misil al‑moot
wa l‑reede chadiide misil al‑khabur.
Wa naar al‑hubb
misil naar daribiin al‑raʼad
wa lahiibha
misil ambalbaala al‑jaaye min Allah.
7 Naar al‑hubb,
almi al‑wudyaan ma yaktulha
wa almi al‑seel ma yaakulha.
Al‑yahsib yibiiʼ al‑hubb be kulla khunaayah,
yalga illa l‑eeb wa l‑ihaana.
Kalaam al‑aakhariin
8 Aniina indina akhut sakhayre
wa deedha lissaaʼ ma gamma.
Nisawwu chunu le akhutna
gabul ma yichiiluuha aruus ?
9 Kan hi misil durdur,
nigawwuuha be buyuut muraakhaba hana fudda.
Wa kan misil baab,
nigawwuuha be hatab al‑arz.
Kalaam al‑mahbuuba
10 Ana misil durdur
wa duyuudi misil buyuut al‑muraakhaba.
Wa fi uyuun habiibi,
ana bas nabga leyah bakaan salaam.
Kalaam al‑mahbuub
11 Suleymaan indah jineenit inab
fi Baʼal Hamuun
wa hu ajjarha le l‑tujjaar
le yahfadooha.
Wa humman yikaffu leyah
taman fawaakihha alif hajar fudda.
12 Wa leek inta,
ya Suleymaan,
al‑alif hajar fudda.
Wa miiteen hajar kamaan,
nafaag le tujjaar inab jineentak.
Wa laakin jineenti ana,
ana bas nahfadha.
13 Inti al‑taskuni fi l‑jineene,
rafiigaatki simʼan hissiki.
Wa ana kula,
khalliini nasmaʼah.
Kalaam al‑mahbuuba
14 Ajri taʼaal ajala,
ya habiibi,
wa abga misil al‑khazaal
wa misil jidi al‑aryal
fi jibaal al‑dukhkhaan.