Kalaam al‑mahbuub
7
1 Ya bitt al‑muluuk,
rijileenki samhiin fi lubb niʼleeki.
Wa daayir dawaarijki
misil ribig al‑zaytuun
al‑laddamooh al‑naas al‑induhum khibra.
2 Wa fandoogki mudawwar
misil jarr asiir al‑inab be haraarah.
Wa batunki misil koom al‑gameh
al‑muhawwag be nuwwaar.
3 Wa duyuudki
misil tiimaan al‑khazaal.
4 Wa ragabatki tawiile wa samha
misil beet al‑muraakhaba
al‑mabni be aaj.
Wa uyuunki biraaru
misil uyuun almi Hachbuun
al‑jamb baab Beet Rabbiim.
Wa munkharki rigeeyge misil seef
wa adiile misil beet al‑muraakhaba hana Lubnaan
al‑muwajjih ale madiinat Dimachkh.
5 Wa raaski foog
misil jabal al‑Karmal.
Wa chaʼarki azrag kurum
wa ana malikki madfuur fi muchaatki.
6 Inti jamiile wa haluuwe,
ya habiibti al‑bitt al‑laziize.
7 Inti tawiile misil tamuraay
wa duyuudki misil anaagiid al‑tamur.
8 Ana gult :
« Ana natlaʼ fi l‑tamuraay
wa nilammis tamurha ! »
Wa khalli duyuudki yabgo leyi
misil anaagiid al‑inab
wa nafaski yinchamma halu
misil riihit al‑tuffaah
9 wa khachumki yabga laziiz
misil asiir al‑inab al‑ahsan.
Aywa,
al‑asiir da yisiil be suhuula
fi l‑chalaaliif wa l‑sunuun.
Kalaam al‑mahbuuba
10 Ana le habiibi
wa hu indah chahwa leyi.
11 Taʼaal,
ya habiibi,
namchu fi l‑kadaade,
nunuumu tihit chadarat al‑hinne.
12 Wa be fajur badri,
namchu fi jineenit al‑inab
wa nichiifu kan al‑inab nawwar
wa kan nuwwaarah alfattah
wa kan al‑rummaan nawwar
wa fi l‑bakaan daak,
ana nantiik nafsi.
13 Al‑zuhuur al‑haluwiin,
riihithum tinchamma.
Wa min foog leena,
fi fawaakih laziiziin,
al‑fawaakih al‑jadiidiin wa l‑gaddimiin
al‑ana hafadtuhum leek,
ya habiibi.