Kitaab al‑Jaamiʼa
min Kutub al‑Hikma
Mugaddima
Kitaab al‑Jaamiʼa da, hu kitaab hana l‑Muʼallim. Hasab aadit al‑Yahuud, al‑Muʼallim da hu al‑malik Suleymaan wileed al‑malik Dawuud wa l‑kitaab da malaan be hikmatah. Wa l‑hikma al‑foogah misil al‑hikma al‑gaaʼide fi kitaab al‑Amsaal wa kitaab Ayyuub.
Fi bidaayit al‑kitaab, al‑Muʼallim wassaf nafsah kadar hu hakiim. Wa hu yifattich al‑maʼana hana l‑haya wa be da, jarrab chokhol katiir misil al‑hikma wa l‑tamaasa wa l‑khidme wa l‑farah wa achya aakhariin kula. Wa hu ligi kadar al‑haala ma madmuuna wa farah al‑insaan wa amalah yuzuulu ajala wa da misil al‑jari wara l‑riih. Wa da khalla al‑Muʼallim yasʼal nafsah kan al‑haya zaayle saakit walla la.
Al‑Muʼallim ooraana kadar al‑insaan ma yagdar yafham kikkeef Allah gaaʼid yahkim fi l‑aalam. Wa waajib al‑insaan yaʼarif kadar abchiyyeeb wa l‑moot gaaʼidiin yarjooh. Wa laakin al‑Rabb bas yirassil al‑kheer wa l‑charr wa ayyi cheyy al‑yisawwiih al‑Rabb jamiil fi waktah. Wa fi l‑akhiir, al‑Muʼallim gaal kadar al‑insaan al‑yakhaaf min al‑Rabb yalga al‑kheer achaan hu khaayif minnah.