Wasiiye le l‑malik Lamuwiil
31
1 Daahu kalaam al‑gaalooh le l‑malik Lamuwiil
wa di l‑wasiiye al‑ammah antatha leyah.
2 « Chunu nuguul leek,
ya wileedi ?
Chunu nuguul leek,
ya wileed musraani ?
Chunu nuguul leek,
ya wileed natiijat muʼaahadati ?
3 Ya wileedi,
ma tanti gudurtak le l‑awiin
wa ma tikhalli al‑yiwaddiran al‑muluuk yuguudannak.
4 Asmaʼ,
ya Lamuwiil.
Al‑khamar ma adiil le l‑muluuk
wa l‑mariise ma adiile le l‑salaatiin.
5 Achaan kan chirbo,
yanso al‑gawaaniin
wa yaglaʼo huguug al‑taʼbaaniin.
6 Wa l‑mariise di tiwaafig le l‑gariib yumuut
wa l‑khamar le l‑hayaatah murra.
7 Kan yachrabha,
yansa fagrah
wa abadan ma yizzakkar taʼabah.
8 Aftah khachmak wa daafiʼ le l‑abkam
wa adman huguug hana kulla l‑daʼiifiin.
9 Aftah khachmak wa chaariʼ be l‑hagg
wa daafiʼ le huguug al‑fagraaniin wa l‑taʼbaaniin. »
Al‑mara al‑indaha charaf
10 *Al‑mara al‑indaha charaf,
yaatu yalgaaha ?
Khiimitha ziyaada
min al‑dahab al‑saafi.
11 Raajilha muʼaaminha marra waahid
wa maʼaaha hi ma yigassir leyah cheyy.
12 Hi ma tisawwi leyah cheyy fasil illa l‑kheer
fi kulla muddit hayaatha.
13 Hi tifattich gutun wa suuf khanam
wa be niiye waahide titirruhum.
14 Hi misil safiinit al‑tujjaar
daayman hi tijiib akilha min baʼiid.
15 Tugumm be fajur badri
wa tijahhiz akil le naas beetha
wa tigassim al‑amal le khaddaamaatha.
16 Hi tifattich zereʼ wa tachriih
wa be gurusha halaalha,
timaggin jineenit inab.
17 Tarbut sulubha
wa tichajjiʼ nafisha fi khidmitha.
18 Hi muʼakkide kadar tarbah fi tijaaritha
wa faanuusha hayy lahaddi ust al‑leel.
19 Be kaffeenha titirr al‑gutun
wa be asaabiʼha tiliff al‑mutraar.
20 Hi tisaaʼid al‑taʼbaaniin
wa timidd iidha le l‑masaakiin.
21 Hi ma tihimm le naas beetha min al‑barid
achaan ayyi waahid laabis khalag takhiin.
22 Hi tisawwi le nafisha khattaayaat samhiin
wa talbas khulgaan hana gutun khaaliyiin.
23 Wa raajilha mukarram fi hillitah
wakit yagood maʼa chuyuukh gabiiltah.
24 Wa hi tikhayyit khulgaan
wa tisaawighum
wa tadfur karraabaat
wa le l‑tujjaar,
tibiiʼhum.
25 Hi maʼruufa be l‑izz wa l‑charaf
wa farhaane achaan indaha acham fi l‑mustakhbal.
26 Tihajji be hikma
wa tiwassi al‑naas be l‑kheer.
27 Daayman tiraakhib fi beetha
wa l‑kasal abadan ma yakrubha.
28 Wa iyaalha yugummu wa yuguulu :
« Mabruuk aleeki ! »
Wa raajilha kula yachkurha
wa yuguul :
29 « Katiir min al‑awiin wassafan charafhin
wa laakin kullihin ke,
inti futtiihin ! »
30 Samaah al‑mara yukhuchch
wa jamaalha yuzuul.
Wa laakin al‑khaayfe min Allah,
hi bas yachkuruuha.
31 Kaffuuha taʼabha fi chaan khidmitha
wa achkuruuha giddaam naas hillitha.