Kitaab al‑Zabuur
min Kutub al‑Hikma
Mugaddima
Kitaab al‑Zabuur hu kitaab hana chiʼir wa khine al‑yachkuru beyah Allah wa marraat yikhannuuh be aalaat al‑musiikha. Wa l‑chiʼir wa l‑khine dool, katiiriin minhum hana l‑malik Dawuud. Wa chiyya minhum hana Suleymaan ibn Dawuud wa Asaaf wa Khuurah. Wa waahidiin minhum al‑katabaahum ma maʼruuf. Wa humman mugassamiin waahidiin hana chakwa wa waahidiin hana nuwaah wa waahidiin hana sala wa waahidiin hana chukur wa waahidiin hana taliʼiin le beet Allah fi wakt al‑hajj.
Al‑kitaab da mugassam ale khamsa juzu. Wa tarjamaat waahidiin yinfargu fi l‑nimar hana l‑fusuul wa da fi chaan yitaabuʼu tarjamaat gudaam chig chig.
Fusuul waahidiin yabdo be mugaddima sakhayre al‑indaha usum hana l‑naadum al‑katab al‑chiʼir da walla l‑wakit al‑hu katab foogah walla wasiiye le kabiir al‑khannaayiin. Wa be l‑tarjamaat al‑faransaawiiye, al‑mugaddima di tabga awwal aaya hana l‑chiʼir. Wa laakin fi l‑tarjamaat al‑arabiiya, al‑mugaddima ma indaha nimra hana l‑aaya. Laakin ma zaad wa la nagas cheyy illa l‑nimar bas albaddalo.
Fi kitaab al‑Zabuur, nalgo achya katiiriin al‑yaju le l‑insaan misil al‑farha wa l‑khoof wa l‑amaan wa l‑zaʼal wa gillit al‑acham wa l‑acham zaatah. Kitaab al‑Zabuur yibayyin leena kadar al‑sala hi misil harib wa beeha, al‑muʼmin yiwassif kadar fi taʼabah fi l‑dunya, hu yisabbit alaakhtah maʼa Rabbah. Wa l‑chukur wa l‑chakwa humman muhimmiin fi l‑alaakha maʼa Allah. Wa kitaab al‑Zabuur, hu misil een almi al‑yawrud leeha ayyi insaan le yalga al‑kalaam al‑beyah yagdar yachhad wa yachkur Allah.