Nadaamit Ayyuub
42
1 Wa khalaas,
Ayyuub radda le Allah wa gaal :
2 Ana naʼarif
inta tagdar tisawwi kulla cheyy
wa ma fi waahide min afkaarak
al‑ma tilhaggag.
3 Inta saʼaltini wa gult :
« Yaatu al‑ma yikhalli niiyti tabga waadhe bala maʼrafa ? »
Sahiih,
ana bala fihim gult achya ajiibiin
al‑yufuutuuni wa ma naʼarifhum.
4 Inta saʼaltini wa gult :
« Asmaʼni,
ana nikallim leek
wa nasʼalak wa inta turudd leyi. »
5 Ana simiʼtak be adaani
wa chiftak be eeni.
6 Fi chaan da,
ana nidimt le kalaami wa tubt
wa sabbeet fi raasi turaab wa rumaad.
Al‑rufgaan yigaddumu dahiiye
7 Wa baʼad Allah gaal al‑kalaam da le Ayyuub,
hu wajjah kalaamah le Alifaaz min balad Teemaan wa gaal :
« Khadabi bigi chadiid diddak inta wa didd rufgaanak al‑itneen achaan intu ma hajjeetu beyi be kalaam sahiih misil kalaam abdi Ayyuub.
8 Wa be sabab da,
chiilu sabʼa toor wa sabʼa kabich wa amchu algooh le abdi Ayyuub wa gaddumu al‑bahaayim dool dahiiye muharraga.
Wa abdi Ayyuub yasʼal leeku.
Wa fi chaanah hu bas,
ana ma nisawwi foogku hasab tamaasitku.
Wa intu ma hajjeetu beyi be kalaam sahiih misil kalaam abdi Ayyuub. »
9 Wa khalaas,
Alifaaz min balad Teemaan wa Bildad min Chuuha wa Suufar min Naʼama macho wa sawwo misil Allah al‑Rabb amaraahum beyah.
Wa Allah khibil suʼaal Ayyuub.
Allah baarak Ayyuub battaan
10 Wa wakit Ayyuub saʼal Allah fi chaan rufgaanah,
Allah gabbal leyah kulla khumaamah misil awwal da,
marrateen.
11 Wa kulla akhwaanah wa akhwaatah wa naas maʼrafatah al‑zamaan jo zaarooh.
Humman akalo maʼaayah fi beetah wa hanno foogah wa kaffaro leyah min kulla l‑bala al‑nazzalah foogah Allah.
Wa ayyi waahid minhum antaah le Ayyuub hajar fudda wa khaatim hana dahab.
12 Wa Allah baarak al‑siniin al‑akhiiriin hana Ayyuub ziyaada min siniinah al‑awwal wa hu ligi 14 000 khanam wa 6 000 jumaal wa 2 000 jooz hana bagar wa 1 000 hamiir anaati.
13 Wa battaan wilid wa jaab sabʼa awlaad wa talaata banaat.
14 Al‑awwal sammaaha Yamiima wa l‑taani sammaaha Khasiiʼa wa l‑taalit sammaaha Garn Hafuuk.
15 Wa fi kulla l‑balad,
ma fi awiin jamiilaat misil banaat Ayyuub wa abuuhin antaahin warasa maʼa akhwaanhin.