Kitaab Ayyuub
min Kutub al‑Hikma
Mugaddima
Kitaab Ayyuub yihajji be Ayyuub al‑raajil al‑indah hikma kabiire. Wa l‑kaatib hu min Bani Israaʼiil wa usmah ma maʼruuf. Wa katabah be l‑lukhkha al‑ibraaniiye wa be kalimaat waahidiin min al‑araamiiye wa l‑kanʼaaniiye. Wa l‑wakit al‑katabo foogah al‑kitaab da, kula ma maʼruuf. Naas waahidiin buguulu al‑kitaab da katabooh fi wakit gadiim marra waahid, hawaale 2 000 sana gubbaal waaluudit Isa al‑Masiih. Wa aakhariin buguulu katabooh baʼad waddo naas mamlakat Yahuuza fi l‑khurba fi Baabil, hawaale 550 sana gubbaal waaluudit Isa al‑Masiih.
Wa l‑kitaab da yihajji be taariikh Ayyuub. Wa Ayyuub hu naadum saalih wa khaayif min Allah wa indah maal katiir wa iyaal. Wa aayich fi l‑raaha fi balad Uus, sabaah le balad Israaʼiil wa sabaah le bahar al‑Urdun. Wa da yiwassif kadar Ayyuub ma min Bani Israaʼiil. Yoom waahid, Allah anta fursa le Ibliis le yijarrib Ayyuub. Wa be da, Ibliis yaʼarif kan Ayyuub saalih walla la. Wa fi chaan da, Ayyuub waddar kulla maalah wa iyaalah wa hu zaatah mirid marad chadiid wa tiʼib ziyaada. Wa fi l‑wakit da kula, Ayyuub ma irif al‑sabab al‑khallaah yatʼab wa gaaʼid tihit al‑tajriba.
Yoom waahid, rufgaanah al‑talaata jo leyah. Wa humman gaalo kadar kulla l‑azaab da ja foogah achaan hu ma saalih wa aznab wa gamma didd al‑Rabb Ilaahah. Gaalo kan awwal Ayyuub ma kafar, ma yilʼazzab misil da. Wa Ayyuub ma khassad be kalaamhum wa wassaf kadar hu bari. Wa laakin hu yasʼal nafsah maala hu gaaʼid yatʼab wa saʼal al‑Rabb kula. Be da kula, Ayyuub ma khalla derib Allah wa daayman gaaʼid gawi fi iimaanah wa alaakhtah maʼa Ilaahah kula adiile. Wa fi l‑akhiir, Allah gaal kadar rufgaan Ayyuub al‑talaata khaatiyiin. Wa khalaas, Allah gabbal le Ayyuub maal wa iyaal ziyaada min al‑awwal wa antaah al‑sihha wa l‑salaam. Wa hu aach be amaan.
Wa l‑kitaab da yiʼallimna achya itneen kubaar. Khalli naʼarfu kadar al‑taʼab yaji le ayyi naadum fi l‑dunya wa laakin waajib nasburu wa niʼaamunu be adaalit Allah.