Kitaab al‑Jaamiʼa
min Kutub al‑Hikma
Al‑haya ma indaha maʼana
Al‑haya zaayle !
Zaayle saakit !
Kulla cheyy zaayil !
3 Chunu al‑faayde al‑yalgaaha al‑insaan
min kulla khidimtah
al‑gaaʼid yatʼab foogha fi l‑ard ?
4 Zurriiye tufuut wa zurriiye taji baʼadha
laakin al‑ard daayman mawjuuda.
5 Al‑harraay tatlaʼ wa l‑harraay tagaʼ
wa battaan tajri le bakaanha
al‑awwal talaʼat minnah.
6 Al‑riih tamchi ale wati
wa tigabbil ale munchaakh.
Al‑riih tuduur wa tuduur
wa battaan tigabbil
le dawaraanha al‑awwal.
7 Kulla l‑buhuur yusubbu
fi l‑bahar al‑muhiit
laakin al‑bahar al‑muhiit
ma yinmali.
Wa battaan ayyi bahar yigabbil
ale l‑bakaan al‑saal minnah.
8 Da gaaʼid yukuun daayman
wa faayit fikir al‑insaan.
Al‑een ma tarwa min al‑choof
wa l‑adaan ma taʼaya min al‑samaʼ.
9 Al‑kaan,
battaan yukuun
wa l‑sawwooh,
battaan yisawwuuh.
Ma fi cheyy jadiid fi l‑ard !
10 Hal nagdaro nuguulu :
« Chiifu !
Daahu cheyy jadiid. »
La !
Da kula gaaʼid min zamaan,
gubbaalna aniina.
11 Al‑naas hana hassaʼ ma yizzakkaro
al‑naas al‑aacho gubbaalhum.
Wa l‑naas al‑lissaaʼ ma wildoohum,
al‑naas al‑yaju baʼadhum kula
ma yizzakkaroohum.
Fattichiin al‑hikma jari wara l‑riih
12 Ana Muʼallim
wa hakamt fi Bani Israaʼiil
fi Madiinat al‑Khudus.
13 Ana chilt niiye
wa fattacht wa kachaft be hikma
fi ayyi cheyy al‑gaaʼid yukuun tihit al‑sama.
Wa di chakhala tagiile
al‑antaaha al‑Rabb le Bani Adam le yisawwiiha.
14 Wa ana chift kulla l‑khidme
al‑gaaʼidiin yisawwuuha fi l‑ard.
Wa da kula zaayil saakit
misil al‑jari wara l‑riih.
15 Al‑aʼwaj ma binʼadil
wa l‑ma fi,
ma binlagi.
16 Wa ana gult fi nafsi :
« Ana kibirt wa indi hikma ziyaada
min kulla l‑hakamo gubbaali
fi Madiinat al‑Khudus.
Wa hafadt fi galbi
hikma wa maʼrafa be ziyaada. »
17 Ana chilt niiye le naʼarif al‑hikma
wa le naʼarif al‑jahal wa l‑tamaasa.
Wa baʼad da,
ana irift
kadar da kula jari wara l‑riih.
18 Achaan katarat al‑hikma,
tikattir al‑hizin
wa ziyaadat al‑ilim,
tiziid al‑taʼab.