Al‑farah zaayil
2
1 Wa ana gult le nafsi :
« Yalla !
Nijarribki be l‑farah
wa tichiifi al‑kheer. »
Wa khalaas,
da kula zaayil saakit.
2 Wa fi l‑dihik,
ana gult :
« Da jahal ! »
Wa fi l‑farah,
ana gult :
« Da yanfaʼ chunu ? »
3 Wa ana kharrart
nifarrih nafsi be l‑khamar.
Wa nuguud nafsi be l‑hikma
wa ninrabit fi l‑tamaasa kula.
Be da,
nichiif kikkeef
waajib al‑insaan yiʼiich adiil fi tihit al‑sama,
fi kulla muddit ayyaam hayaatah.
4 Wa ana sawweet achya kubaar.
Baneet buyuut
wa maggant jineenaat inab.
5 Wa sawweet jineenaat
wa ziraaʼa kubaar.
Wa fooghum,
maggant kulla nafar hana chadar
al‑indah fawaakih.
6 Wa sawweet khazzaanaat
achaan be almiihum,
nazgi magan al‑chadar.
7 Ana chareet abiid wa khadiim
wa humman wildo iyaalhum fi beeti.
Indi battaan bagar wa khanam be katara,
ziyaada min kulla l‑hakamo gubbaali fi Madiinat al‑Khudus.
8 Ana lammeet battaan fudda wa dahab
wa kanz min muluuk wa buldaan.
Ligiit khannaayiin wa khannaayaat
wa indi sirriiyaat be katara le chahwaati
wa da misil chahwat kulla l‑rujaal.
9 Ana bigiit aziim wa khani ziyaada
min kulla l‑hakamo gubbaali
fi Madiinat al‑Khudus
wa ana gaaʼid daayman be hikmati.
10 Ana chilt kulla l‑cheyy al‑wagaʼ fi eeni
wa ma abeet ayyi cheyy al‑yifarrih galbi.
Aywa,
galbi firih be kulla khidimti.
Wa da bas gismi al‑ligiitah
min kulla khidimti di.
11 Wa ana fakkart le kulla cheyy al‑sawwooh iideeni,
fakkart le l‑khidme al‑tiʼibt foogha.
Wa da kula zaayil saakit
misil al‑jari wara l‑riih
wa ma indah faayde fi l‑ard.
Nihaayat al‑hikma wa l‑tamaasa
12 Wa ana gabbalt wa fakkart fi l‑hikma
wa l‑jahal wa l‑tamaasa.
Khalaas,
chunu yisawwi al‑raajil
al‑yidarruju malik baʼadi ?
Yisawwi misil al‑sawwooh awwal bas !
13 Daahu al‑ana iriftah.
Al‑hikma indaha faayde ziyaada min al‑tamaasa
misil al‑nuur indah faayde ziyaada min al‑dalaam.
14 Al‑hakiim yichiif baʼiid
wa l‑matmuus yuruukh fi l‑dalaam.
Wa laakin be da kula,
ana naʼarif kadar
nafs al‑cheyy yukuun leehum humman al‑itneen.
15 Wa ana gult fi nafsi :
« Al‑yukuun le l‑matmuus,
yukuun leyi ana kula.
Wa kan misil da,
chunu faaydit hikmati ? »
Wa khalaas,
ana gult :
« Da kula zaayil saakit. »
16 Achaan al‑hakiim,
ma yizzakkarooh daayman.
Hu kula misil al‑matmuus.
Fi l‑mustakhbal,
humman al‑itneen,
yansoohum !
Wa khalaas,
al‑hakiim wa l‑matmuus
yumuutu nafs al‑moot !
Al‑khidme zaayle
17 Khalaas,
ana kiriht al‑haya
achaan khidmit al‑insaan fi l‑ard di,
ana nichiifha fasle.
Achaan da kula zaayil saakit
misil al‑jari wara l‑riih.
18 Wa ana kiriht kulla l‑khidme
al‑ana sawweetha fi l‑ard.
Wa di l‑khidme al‑nikhalliiha
le l‑naadum al‑yaji min baʼadi.
19 Wa yaatu yaʼarif kan al‑naadum da
yukuun hakiim
aw fikrah mahduud ?
Be da kula,
hu yabga siid al‑khidme
al‑ana sawweetha be hikma fi l‑ard.
Wa da kula zaayil saakit.
20 Ana nidimt wa achami angataʼ
fi chaan kulla l‑khidme al‑sawweetha fi l‑ard.
21 Achaan fi naadum khadam
be hikma wa maʼrafa wa najaah.
Wa be da kula,
daahu yantu natiijat khidimtah
le naadum al‑ma khadam cheyy !
Wa da kula zaayil saakit
wa di masiibe kabiire.
22 Wa kan misil da,
chunu al‑yalgaah al‑insaan
min kulla juhdah
wa khidimtah al‑sawwaaha fi l‑ard ?
23 Achaan ayyaam hayaatah kulluhum taʼab
wa chakhalatah kullaha hizin.
Hatta be leel kula,
galbah ma raagid.
Wa da kula zaayil saakit.
24 Wa l‑adiil le l‑insaan
yaakul wa yachrab
wa yichiif al‑halu fi khidimtah.
Wa ana chift da kula
yaji min al‑Rabb.
25 Wa bala izin al‑Rabb,
yaatu yagdar yaakul
wa yitmattaʼ fi hayaatah ?
26 Achaan al‑Rabb yanti al‑hikma wa l‑maʼrafa wa l‑farah le l‑naadum al‑adiil giddaamah.
Wa laakin le l‑muznib,
al‑Rabb yantiih chakhala hana fattichiin wa lammiin le yijiibah wa yantiih le l‑naadum al‑adiil giddaam al‑Rabb.
Wa da kula zaayil saakit misil al‑jari wara l‑riih.