Le kulla cheyy fi wakit munaasib
3
1 Le kulla cheyy fi zaman
wa le kulla cheyy tihit al‑sama,
fi wakit munaasib.
2 Fi wakit le l‑waaluuda
wa fi wakit le l‑moot.
Fi wakit le l‑magginiin
wa fi wakit le mallitiin al‑magan.
3 Fi wakit le l‑katil
wa fi wakit le l‑chifa.
Fi wakit le l‑haddimiin
wa fi wakit le l‑buna.
4 Fi wakit le l‑baki
wa fi wakit le l‑dihik.
Fi wakit le l‑nuwaah
wa fi wakit le l‑liʼib.
5 Fi wakit le zarrigiiin al‑hujaar
wa fi wakit le lammiin al‑hujaar.
Fi wakit le l‑muhaadana
wa fi wakit le khalliyiin al‑muhaadana.
6 Fi wakit le l‑fattichiin
wa fi wakit le l‑waddiriin.
Fi wakit le l‑hafadaan
wa fi wakit le l‑zagalaan.
7 Fi wakit le l‑charritiin
wa fi wakit le l‑khiyaata.
Fi wakit le l‑sukuut
wa fi wakit le l‑hije.
8 Fi wakit le l‑mahabba
wa fi wakit le l‑karaahiiye.
Fi wakit le l‑harib
wa fi wakit le l‑salaam.
9 Chunu al‑faayde
al‑yalgaaha al‑khaddaam min khidimtah ?
10 Ana chift al‑chakhala
al‑khattaaha al‑Rabb fi Bani Adam.
11 Kulla cheyy al‑sawwaah al‑Rabb
jamiil fi waktah
wa khatta acham al‑dawaam
fi guluubhum.
Laakin al‑insaan ma yagdar yaʼarif
al‑khidme al‑sawwaaha al‑Rabb
min al‑bidaaya le l‑nihaaya.
12 Ana naʼarfah ma fi cheyy adiil le l‑insaan
illa l‑farha wa l‑kheer fi hayaatah.
13 Wa waajib le ayyi insaan yaakul wa yachrab
wa yalga al‑kheer fi kulla khidimtah.
Wa di hadiiye min al‑Rabb.
14 Wa ana naʼarif kulla cheyy
al‑sawwaah al‑Rabb
da daayim.
Ma fi al‑yangusah
wa la yiziidah.
Wa l‑Rabb sawwa kulla cheyy
achaan yakhaafo minnah.
15 Al‑gaaʼid hassaʼ,
kaan min awwal
wa l‑yukuun kula,
kaan min zamaan.
Wa l‑Rabb yigabbil al‑cheyy al‑faat.
Ayyi makhluug hayy yumuut
16 Wa daahu battaan al‑cheyy al‑ana chiftah fi l‑ard.
Fi bakaan al‑adaala,
al‑zulum gaaʼid !
Wa fi bakaan al‑chariiʼa,
al‑zulum gaaʼid !
17 Wa ana gult fi nafsi :
« Al‑Rabb yihaasib al‑saalih
wa l‑aasi kula
achaan le kulla cheyy fi wakit munaasib
wa kulla amal be waktah. »
18 Wa ana gult fi nafsi :
« Kan le Bani Adam,
khalli al‑Rabb yijarribhum
le yaʼarfu
kadar humman zaathum misil bahaayim. »
19 Achaan al‑yukuun le Bani Adam,
yukuun le l‑bahaayim kula.
Al‑waahid yumuut
misil al‑aakhar.
Induhum nafs al‑ruuh
wa l‑insaan misil al‑bahiime.
Khalaas,
da kula zaayil saakit.
20 Kulluhum ke
yamchu le bakaan waahid.
Kulluhum min al‑turaab
wa yigabbulu fi l‑turaab.
21 Yaatu yaʼarif kan ruuh al‑insaan
tamchi foog fi l‑sama
wa kan ruuh al‑bahiime
tanzil tihit fi l‑ard ?
22 Wa ana chift kadar ma fi cheyy ahsan le l‑insaan
min yafrah be amalah
achaan da bas gismah.
Yaatu yihayyiih battaan
le yichiif al‑cheyy
al‑yukuun baʼad mootah ?