Aliihu yatham Ayyuub
34
1 Wa battaan Aliihu chaal al‑kalaam wa gaal :
2 Ya l‑hukama,
asmaʼo kalaami !
Ya intu al‑faahimiin,
khuttu adaanku le l‑nuguulah.
3 Achaan al‑adaan tifassil al‑kalaam
misil al‑lisaan yifarrig al‑taʼaam.
4 Wa misil da,
khalli naʼazulu al‑adaala
wa ambeenaatna,
khalli naʼarfu al‑sahiih.
5 Wa simiʼna Ayyuub buguul :
« Ana saalih
wa l‑Rabb bas daharaani min huguugi.
6 Wa fi chariiʼti,
ma yuguul al‑sahiih.
Wa ana ma sawweet khata
wa jarahaani jiraah hana moot. »
7 Yaatu misil Ayyuub ?
Al‑sawwiyiin al‑chamaate,
hayyin leyah misil charaab almi !
8 Hu muchtarik maʼa l‑yisawwu al‑charr
wa yuruukh daayman maʼa l‑fasliin.
9 Achaan hu gaal :
« Chunu faaydit al‑insaan
kan yafrah be l‑Rabb ? »
Al‑Rabb aadil
10 Wa khalaas asmaʼooni,
ya l‑naas al‑faahimiin !
Al‑Rabb yisawwi al‑charr ?
La !
Al‑Gaadir yisawwi al‑zulum ?
Abadan !
11 Achaan hu yijaazi al‑insaan hasab amalah
wa yikaafiih hasab tariigah al‑yichiilah.
12 Al‑Rabb yugumm be l‑fasaala walla ?
La !
Al‑Gaadir yiʼawwij al‑chariiʼa walla ?
Abadan !
13 Ma fi naadum al‑wakkal al‑Rabb be l‑ard
wa khattaah foog kulla l‑aalam.
14 Kan hu kharrar wa chaal ruuhah
wa nafasah al‑antaah le l‑makhluugiin,
15 khalaas kulluhum yumuutu
wa l‑insaan yigabbil fi l‑turaab.
16 Kan inta indak fihim,
khalaas asmaʼ !
Wa khutt adaanak le kalaami.
17 Kan al‑Rabb yakrah al‑adaala,
yagdar yahkim walla ?
Al‑Saadikh wa l‑Chadiid,
tuguul hu khaati walla ?
18 Hal le l‑malik nuguulu :
« Inta ma naafiʼ » ?
Hal le l‑masaaʼiil nuguulu :
« Intu aasiyiin » ?
19 Al‑Rabb ma yichiif al‑masaaʼiil
wa ma yifarrig al‑khani min al‑fagri
achaan kulluhum,
hu bas khalagaahum.
20 Humman yumuutu be l‑leel be khafla
wa l‑chaʼab yibarjulu wa yumuutu
wa l‑jaayir yitarrufuuh be suhuula.
21 Achaan al‑Rabb yiraakhib fi duruub al‑insaan
wa yichiif kulla khatwaatah.
22 Wa ma fi dalaam wa la dalaam haalik
al‑yillabbado foogah siyaad al‑fasaala.
23 Wa l‑Rabb ma muhtaaj le yinaadi al‑naas
le muhaakama khaassa.
24 Hu yidammir al‑chudaad bala ma yihaggig
wa yukhutt aakhariin fi badalhum.
25 Achaan hu yaʼarif amalhum
wa yinrahku be leel wa yifajjukhuuhum.
26 Hu yadrubhum fi bakaan al‑aasiyiin
al‑yiʼaakhubuuhum foogah giddaam kulla l‑naas.
27 Wa da achaan humman baʼʼado minnah
wa ma taabo duruubah,
28 wa daayago al‑daʼiif lahaddi
yikoorik le l‑Rabb
aywa,
al‑Rabb simiʼ
korooraak al‑miskiin.
29 Kan al‑Rabb yaskut,
yaatu yisawwiih khaltaan ?
Wa kan aba ma yiwajjih aleehum,
yaatu yagdar yichiifah ?
Wa la l‑umam wa la l‑naas.
30 Wa ma yikhalli al‑kaafir yahkim
wa la yabga charak le l‑chaʼab.
Ayyuub yikallim bala agul
31 Akuun naadum yuguul le l‑Rabb :
« Ana himilt ikhaabi
wa ma nisawwi battaan cheyy fasil.
32 Al‑cheyy al‑ana ma chiftah,
wassifah leyi
wa kan sawweet khata kula,
battaan ma nisawwiih. »
33 Hal hasab fikrak inta bas,
al‑Rabb yiʼaakhib al‑naadum da ?
Hal al‑Rabb yikaafiik hasab fikrak,
wakit inta abeet ma tutuub ?
Inta bas waajib taʼazil,
ma ana !
Wa l‑taʼarfah,
guulah !
34 Wa l‑naas al‑faahimiin
wa l‑hakiim al‑gaaʼid yasmaʼni yuguulu :
35 « Ayyuub yikallim bala maʼrafa
wa kalaamah kula ma indah maʼaana. »
36 Khalaas,
khalli Ayyuub yagood
daayman tihit al‑tajriba !
Achaan hu yurudd
misil al‑naas al‑fasliin.
37 Achaan hu yiziid al‑isyaan fi zanbah
wa yisaffig fi lubbina be hugra
wa yihajji katiir didd al‑Rabb.