Aliihu yidoor Ayyuub yidaafiʼ le nafsah
33
1 Wa hassaʼ da,
asmaʼ gooli,
ya Ayyuub
wa khutt adaanak le kulla kalaami.
2 Daahu !
Ana nufukk khachmi
wa lisaani yantug.
3 Kalaam galbi kulla adaala
wa lisaani yikallim be maʼrafa sahiihe.
4 Be ruuhah,
al‑Rabb khalagaani
wa nafas al‑Gaadir hayyaani.
5 Ya Ayyuub !
Kan tagdar,
rudd leyi !
Gumm !
Agiif giddaami
wa daafiʼ le nafsak !
6 Giddaam al‑Rabb,
ana zaati mislak inta.
Hu khalagaani ana kula
min al‑tiine bas.
7 Wa be misil da,
ma waajib takhaaf minni
achaan ana ma nidammirak.
Al‑Rabb ma yikallim be tariiga waahide
8 Laakin inta hajjeet giddaami,
aywa,
ana simiʼtak wakit inta gult :
9 « Ana saafi,
ma indi khata.
Ana nadiif,
ma indi zanib.
10 Wa daahu al‑Rabb gaaʼid yihaarijni
wa yajʼalni misil aduuh.
11 Hu dassa rijileeni fi guyuud
wa yiraakhibni fi kulla duruubi. »
12 Wa ana nuguul leek,
ya Ayyuub,
inta ma indak hagg fi l‑kalaam da
achaan al‑Rabb kabiir min al‑insaan.
13 Maala inta tachki min al‑Rabb
wakit hu ma radda leek fi kalaamak ?
14 Laakin al‑Rabb yikallim be tariiga waahide aw aakhara
wa l‑insaan ma yaʼarfah.
15 Hu yihajji fi hilim wa fi l‑ruʼya be l‑leel
wakit al‑insaan naayim noom chadiid fi furaachah.
16 Wa khalaas,
al‑Rabb yikallim
le l‑naas fi udneehum
wa yihazzirhum
wa yikhawwifhum marra waahid.
17 Wa da le yibaʼʼidhum min amalhum al‑cheen
wa yahfad al‑insaan min al‑istikbaar.
18 Wa da le yahfadah min al‑moot
wa yadhar ruuhah ma tamrug be l‑seef.
19 Al‑Rabb yihazzir al‑insaan be taʼab fi furaachah
wakit udaamah yarjufu min al‑wajaʼ.
20 Khalaas,
hu yaaba al‑akil.
Hatta al‑akil al‑halu kula,
yikhalliih.
21 Wa laham jildah yikammil tak,
yifaddil illa l‑udaam.
22 Ruuhah tigarrib le l‑khabur
wa hayaatah le l‑moot.
Al‑malak al‑wasiit
23 Wa laakin kan yalga leyah malak wasiit,
waahid min been al‑alif
al‑yikhabbir al‑insaan be l‑tariig al‑adiil,
24 khalaas,
al‑Rabb yihinn foogah
wa yuguul :
« Najjiih !
Achaan ma yanzil fi l‑khabur,
ana ligiit al‑fidya al‑ninajjiih beeha. »
25 Wa be da,
jismah yalga gudrat chabaabah
wa yigabbil le ayyaam subaayah.
26 Hu yachhad al‑Rabb
wa l‑Rabb yarda beyah
wa yichiif wijh al‑Rabb be farah.
Wa l‑Rabb yajʼal al‑insaan da
saalih giddaamah battaan.
27 Hu yikhanni giddaam al‑naas
wa yuguul :
« Ana aznabt wa awwajt al‑adaala
wa laakin al‑Rabb ma jaazaani misil waajib leyi.
28 Wa najja ruuhi min al‑khabur
wa nichiif nuur al‑haya battaan. »
29 Wa daahu kulla cheyy al‑sawwaah al‑Rabb
marrateen wa talaata maʼa l‑insaan
30 le yigabbil ruuhah min al‑moot
wa yinawwirah be nuur al‑hayyiin.
31 Khutt baalak,
ya Ayyuub,
wa asmaʼni !
Askut wa ana bas nikallim.
32 Kan indak kalaam,
rudd leyi !
Kallim achaan nidoor nibarriik.
33 Wa kan ma fi,
askut wa asmaʼni
wa ana niʼallimak al‑hikma.