Al‑insaan kan maat, ma yaji battaan
14
1 Al‑insaan wildatah mara
wa umrah gisayyir wa chabʼaan be taʼab.
2 Hu misil al‑zuhuur,
yilfattah wa yiʼaffin
wa misil al‑dull al‑yufuut
ma yitawwil.
3 Wa be da kula,
inta gaaʼid tiraakhibah !
Wa tiwaddiini nichchaaraʼo maʼaak.
4 Yaatu yagdar yamrug al‑taahir min al‑nijis ?
Ma fi !
5 Al‑insaan umrah muhaddad
wa inta gattaʼt leyah chuhuur
wa anteetah wakit ma yagdar yufuutah.
6 Khalaas,
ma tiraakhibah !
Khalli yinjamma le yafrah
misil farhit al‑muʼajjar fi aakhir khidimtah.
7 Al‑chadara indaha acham.
Kan yagtaʼooha,
battaan tugumm wa tadrub.
8 Hatta kan uruugha tawwalo fi l‑ard
wa dumburha maat fi l‑turaab kula,
9 min hi chammat al‑almi,
tikhaddir wa tisawwi furuuʼ
misil chadara al‑gammat dahaabha.
10 Wa laakin al‑insaan yumuut wa yintahi
wa kan ruuhah maragat,
battaan ma fi cheyy !
11 Almi yikammil min al‑bahar
wa l‑bahar yaybas wa yijiff.
12 Al‑insaan kan maat,
ma yugumm.
Lahaddi al‑sama yabga ma fiih,
hu ma yilharrak
wa la yugumm min noomah.
13 Ana nitmanna tilabbidni fi l‑khabur
wa tukhuttini lahaddi
khadabak yufuut
wa tagtaʼ leyi wakit
al‑foogah tizzakkarni.
14 Achaan al‑insaan kan maat,
yaji walla ?
Fi kulla wakit taʼabi,
ana narja
lahaddi khidimti tikammil wa nufuut.
15 Khalaas,
inta tinaadiini
wa ana nurudd leek
wa inta tichtaag leyi
ana khidmit iideenak.
16 Hassaʼ,
inta gaaʼid tiraakhib khatwaati
wa laakin baʼadeen ma tichiif zanbi.
17 Wa tidiss isyaani fi balʼuum wa tarbutah
wa tastur khataayi.
18 Wa laakin al‑jabal yagaʼ wa yilfatfat
wa l‑hajar yilhawwal min bakaanah.
19 Almi yigaddim al‑hajar
wa l‑seel yichiil ajaaj al‑ard.
Wa be misil da,
inta tagtaʼ acham al‑insaan.
20 Wa inta takhlibah
wa hu yajri le l‑abad.
Inta tikhayyir wijhah
wa baʼad da,
taturdah.
21 Wa kan iyaalah induhum charaf,
hu ma yaʼarfah.
Wa kan humman aaybiin kula,
ma indah khabar.
22 Le nafsah bas hu yatʼab
wa le ruuhah bas hu yahzan.