Ayyuub yidaafiʼ le nafsah
13
1 Daahu kulla l‑chaafatah eeni
wa simʼatah adaani wa ana fihimtah.
2 Al‑intu taʼarfuuh,
ana kula naʼarfah
wa ana kula ma naagis minku !
3 Laakin nidoor nihajji le l‑Rabb al‑Gaadir
wa nidoor nidaafiʼ le nafsi giddaam al‑Rabb.
4 Kan leeku intu,
tahamtuuni be kidib !
Intu misil dakaatiir al‑ma naafʼiin !
5 Yaatu yagdar yisakkitku
le tabgo hakiimiin ?
6 Asmaʼo hujjiti
wa khuttu adaanku le kalaam lisaani.
7 Hal tahsubu intu tidaafuʼu
le l‑Rabb walla ?
Wa leyah hu,
tihajju
be khachch walla ?
8 Hal maʼaayah hu intu tilimmu walla ?
Walla le l‑Rabb intu tidaafuʼu ?
9 Wa adiil kan hu yijarribku intu walla ?
Walla tukhuchchuuh
misil tukhuchchu al‑naas ?
10 Akiid,
hu yuluumku
hatta kan tilimmu maʼaayah be sirr kula !
11 Wa azamatah ma tabhatku walla ?
Wa l‑khoof minnah ma yagaʼ foogku walla ?
12 Wa kalaamku khafiif
misil koom al‑rumaad
wa radduku ma gawi
misil durdur al‑tiine al‑layyin !
13 Askutu !
Ana bas nihajji
hatta kan yagaʼ leyi fi raasi kula !
14 Maala niʼarrid nafsi le l‑khatar
wa nichiil ruuhi fi iidi ?
15 Hatta kan yaktulni kula,
ana nukhutt achami foogah.
Laakin nidaafiʼ giddaamah hu
le derbi al‑chiltah.
16 Wa da bas al‑yagdar yinajjiini
achaan al‑kaafir ma yaji giddaamah.
17 Asmaʼo !
Asmaʼo kalaami !
Wa khuttu adaanku le hadiisi.
18 Daahu ana jahhazt le chariiʼti
wa naʼarif kadar nalga al‑hagg.
19 Yaatu madluum foogi ?
Kan ana khaati,
naskut wa numuut.
20 Ya Rabb !
Achya tineen ma tisawwiihum foogi
wa ana kula ma nillabbad minnak.
21 Arfaʼ minni iidak al‑titaʼʼibni
wa ma tabhatni wa la tikhawwifni ziyaada.
22 Wa khalaas,
naadiini wa ana nurudd leek
aw ana nihajji wa inta tikallim maʼaayi.
23 Kam khata wa zanib ana sawweethum ?
Arrifni jariimti wa zanbi !
24 Maala ma tiwajjih wijhak aleyi ?
Maala tajʼalni misil aduuk ?
25 Hal tirajjif warchaalaay
al‑chaayleeha al‑riih ?
Hal titaarid gechchaay
yaabse walla ?
26 Tathamni be tuhma murra
wa tiʼaakhibni be zunuub subaayi.
27 Wa tigayyidni be guyuud
wa tiraakhib kulla duruubi
wa tiraakhib khatwaati.
28 Laakin ana gidimt wa sawwast
wa bigiit misil khalag
al‑akalatah al‑itte.