Al‑aasi yilʼazzab
15
1 Wa khalaas,
Alifaaz al‑min balad Teemaan chaal al‑kalaam wa gaal :
2 Hal al‑hakiim yurudd be ilim
al‑jaayi min al‑riih walla ?
Wa yanfukh batnah
be riih al‑sabaah walla ?
3 Hu yidaafiʼ le nafsah be kalaam ma mufiid
wa be hije al‑ma indah faayde.
4 Inta zaatak battalt makhaafat al‑Rabb
wa tallaft al‑ibaada giddaamah.
5 Achaan khataak lazza khachmak yikallim
wa inta hajjeet be lisaan al‑najaada.
6 Wa khachmak bas sawwaak khaati,
ma ana !
Wa lisaanak bas chahad foogak !
7 Inta awwal naadum wildook walla ?
Inta jiit fi l‑dunya gabul al‑jibaal walla ?
8 Hal simiʼt sirr al‑Rabb walla ?
Hal chilt al‑hikma leek inta wiheedak walla ?
9 Chunu al‑inta taʼarfah
wa aniina ma naʼarfuuh ?
Chunu al‑inta fihimtah
wa aniina ma fihimnaah ?
10 Fi usutna,
fiyah naas
suufhum abyad wa chiyyaab
wa siniinhum ziyaada min siniin abuuk !
11 Sabbiriin al‑Rabb chiyya leek walla ?
Wa hannisiinna chiyya leek walla ?
12 Maala galbak yiwaddirak
wa l‑zaʼal yinchaaf fi uyuunak ?
13 Maala tiwajjih khadabak le l‑Rabb
wa tamrug al‑kalaam da min khachmak ?
14 Chunu Bani Adam,
lahaddi yuguul hu saafi ?
Hu al‑wildatah mara,
lahaddi yuguul hu saalih ?
15 Al‑Rabb ma yiʼaamin malaaʼikatah
wa l‑samaawaat kula giddaamah ma saafiyiin.
16 Kan misil da,
kikkeef al‑insaan
al‑yisawwi al‑haraam wa l‑rachwa
yabga saafi,
hu al‑yichiif al‑fasaala hayne leyah
misil charaab almi ?
17 Ana nikhabbirak,
asmaʼni !
Wa l‑ana chiftah,
niʼooriik beyah.
18 Al‑hakiimiin kallamo
wa ma labbado al‑cheyy al‑jaayi min juduudhum.
19 Leehum humman bas,
antaahum al‑balad
wa abadan ajnabi ma dakhal
fi usuthum.
20 Daahu al‑aasi yilʼazzab
fi kulla muddit hayaatah.
Aywa,
siniin siid al‑unuf
mahsuubiin.
21 Udneeyah yasmaʼo hiss mukhiif
wa fi wakt al‑salaam bas,
al‑mukharrib yaji leyah.
22 Al‑aasi ma yisaddig kadar yamrug min al‑dalaam,
wa l‑seef gaaʼid yiraakhibah.
23 Hu yabga maʼaach le l‑suguura
wa yaʼarif kharaabah muʼakkad fi yoom al‑dalaam.
24 Al‑diige wa l‑taʼab yabhatooh wa yakhlubuuh
misil malik yakhlib udwaanah.
25 Achaan hu dagga sadrah le l‑Rabb.
Aywa !
Gamma didd al‑Gaadir.
26 Hu gawwa raasah wa jara aleyah,
be daragatah al‑takhiine.
27 Achaan chuduugah waarmiin min al‑chaham
wa sulbah bigi ariid wa samiin.
28 Hu sakan fi mudun al‑mudammariin
aywa,
fi buyuut al‑kharbaaniin
al‑gariib yabgo koom hana turaab.
29 Wa laakin hu ma yakhna
wa khunaayah ma yitawwil
wa maalah ma yiziid fi l‑ard.
30 Hu ma yamrug min al‑dalaam
wa ambalbaala tiyabbis bizirtah
wa riih al‑Rabb tichiilah.
31 Khalli ma yiʼaamin be l‑kidib,
hu al‑yukhuchch nafsah,
achaan al‑kidib yabga maahiiytah.
32 Wa da yilhaggag
gabul ma yikammulu ayyaamah.
Hu misil chadara al‑firiʼha
abadan ma yikhaddir.
33 Wa hu misil chadarat inab
al‑yidaffugu iyaalha khudur
wa misil chadarat zaytuun
al‑nuwwaarha yidaffig.
34 Aywa,
mujtamaʼ al‑kuffaar
ma yijiibu iyaal
wa l‑naar taakul khiyam
siyaad al‑rachwa.
35 Al‑yakhlab be l‑taʼab yijiib al‑charr
wa yalda al‑khachch.