Kitaab Astiir
min Kutub Taariikh Bani Israaʼiil
Aazuumit al‑malik Achawiruuch
1
1 Al‑taariikh da bigi fi wakit al‑malik Achawiruuch.
Wa Achawiruuch da hakam fi 127 wulaaya min balad al‑Hind lahaddi balad al‑Habacha.
2 Wa fi l‑wakit da bas,
al‑malik Achawiruuch gaʼad fi gasir al‑mamlaka wa hakam fi madiinat Chuucha al‑gawiiye.
3 Wa fi l‑sana al‑taalta hana hukmah,
hu sawwa aazuuma kabiire wa lamma kulla masaaʼiilah wa khaddaamiinah wa askar al‑Faarisiyiin wa l‑Maadiyiin wa l‑hukkaam wa kubaaraat al‑wulaayaat.
4 Wa fi muddit 180 yoom,
hu wassaf leehum al‑khuna al‑katiir hana mamlakatah wa khiimtah al‑kabiire.
5 Wa baʼad al‑ayyaam dool kammalo,
al‑malik azam fi l‑aazuuma kulla l‑naas al‑saakniin fi madiinat Chuucha al‑gawiiye min al‑khani lahaddi l‑fagri.
Wa humman gaʼado sabʼa yoom fi l‑fadaay hana jineenit gasir al‑malik.
6 Wa l‑bakaan da mujammal be sataayir hana gumaach abyad wa garadi.
Wa allagoohum be hubaal buyud wa humur tchu fi khawaatim hana fudda wa rabatoohum fi raas amad hana rukhaam.
Wa khatto saraayir hana dahab wa fudda fi l‑ard al‑jammalooha be rukhaam abyad wa azrag wa hajar sameh.
7 Wa l‑naas gaaʼidiin yacharbo be mawaaʼiin hana dahab nafarhum chig chig.
Wa l‑malik gaddam leehum khamar katiir marra waahid be juud al‑mamlaka.
8 Wa ayyi waahid yachrab hasab niiytah achaan al‑malik amar kulla khaddaamiinah yantu le ayyi naadum al‑cheyy al‑yidoorah.
9 Wa l‑malika Wachti,
hi kulla sawwat aazuuma le l‑awiin fi gasir al‑malik Achawiruuch.
Hugrat al‑malika Wachti
10 Wa fi l‑yoom al‑saabiʼ wakit al‑malik Achawiruuch chirib al‑khamar wa bigi farhaan,
hu naada khaddaamiinah Mahumaan wa Bizta wa Harbuuna wa Bigta wa Abagta wa Ziitar wa Karkas,
dool al‑khaddaamiin al‑sabʼa al‑gaaʼidiin yakhdumu tihtah.
11 Wa l‑malik amar yijiibu giddaamah al‑malika Wachti be taajha hana l‑mamlaka le yiwassif jamaalha le l‑chaʼab wa le masaaʼiilah achaan hi jamiile marra waahid.
12 Wa laakin al‑malika Wachti abat ma taji hasab amur al‑malik al‑gaalah leeha be waasitat khaddaamiinah.
Wa khalaas,
al‑malik khidib khadab chadiid wa l‑zaʼal da harrag galbah.
13 Wa l‑malik hajja maʼa l‑ulama wa l‑munajjimiin achaan ayyi cheyy al‑bukhuss al‑mamlaka,
yigaddimah giddaam al‑naas al‑yaʼarfu al‑gaanuun wa l‑chariiʼa.
14 Wa l‑naas dool al‑jamb al‑malik,
humman Karchana wa Chitaar wa Admaata wa Tarchiich wa Maras wa Marsana wa Mamuukaan,
dool al‑sabʼa masaaʼiil hana l‑Faarisiyiin wa l‑Maadiyiin.
Wa humman dool gaaʼidiin fi l‑daraja al‑awwal hana l‑mamlaka wa yichiifu al‑malik fi ayyi wakit.
15 Wa l‑malik gaal leehum :
« Hasab al‑gaanuun,
nisawwi chunu didd al‑malika Wachti ?
Achaan hi ma tabbagat amri ana al‑malik Achawiruuch al‑gultah leeha be waasitat khaddaamiini. »
16 Wa Mamuukaan chaal al‑kalaam giddaam al‑malik wa masaaʼiilah wa gaal :
« Ya l‑malik !
Wachti al‑malika ma hagaratak inta wiheedak bas laakin hi hagarat kulla l‑masaaʼiil wa l‑chaʼab hana kulla wulaayaat al‑malik Achawiruuch.
17 Wa kalaam al‑malika da,
kulla l‑awiin yasmaʼannah wa yahgiran rujaalhin wa yuguulan :
‹ Al‑malik Achawiruuch zaatah gaal yijiibu al‑malika Wachti giddaamah laakin hi abat ma taji. ›
18 Wa min al‑yoom al‑mayaarim hana l‑Faarisiyiin wa l‑Maadiyiin simʼan be hugrat al‑malika,
hinna kula yahgiran rujaalhin masaaʼiil al‑malik.
Wa l‑hugra di tijiib al‑zaʼal.
19 Ya siidi al‑malik !
Kan adiil leek,
khalli yamrug kharaar malaki al‑yaktubuuh fi gaanuun al‑Faarisiyiin wa l‑Maadiyiin al‑abadan ma yilkhayyar.
Wa khalli yuguul :
‹ Abadan al‑malika Wachti ma taji giddaam al‑malik Achawiruuch.
Wa hu yanti darajatha hint al‑malika le mara aakhara akheer minha. ›
20 Wa wakit kharaar al‑malik da yanchuruuh fi kulla l‑mamlaka,
khalaas kulla l‑awiin yikarriman rujaalhin min al‑khani lahaddi l‑fagri kula. »
21 Wa l‑kalaam da bigi adiil le l‑malik wa le masaaʼiilah wa l‑malik tabbag wasiiyat Mamuukaan.
22 Wa l‑malik rassal jawaabaat fi kulla wulaayaat al‑mamlaka,
le ayyi wulaaya hasab kitaabitha wa le ayyi chaʼab hasab lukhkhitah,
wa kharrar kadar ayyi raajil yabga masʼuul fi beetah.
Wa l‑jawaabaat dool le ayyi chaʼab hasab lukhkhitah.