Al‑malik azal mara le tabga malika
2
1 Wa baʼad da,
zaʼal al‑malik Achawiruuch dalla wa fakkar fi l‑malika Wachti wa fi l‑cheyy al‑sawwatah wa l‑kharaar al‑hu chaalah diddaha.
2 Wa l‑subyaan al‑gaaʼidiin yakhdumu leyah gaalo :
« Khalli nifattuchu le l‑malik banaat udriiyaat wa jamiilaat.
3 Wa khalli al‑malik yukhutt mukallafiin fi kulla l‑wulaayaat hana mamlakatah achaan yijiibu kulla l‑banaat al‑udriiyaat wa jamiilaat fi beet al‑awiin fi madiinat Chuucha al‑gawiiye.
Wa yagoodan tihit masʼuuliiyit Higaay khaddaam al‑malik al‑mukallaf be l‑awiin.
Wa hu yantiihin al‑dihin al‑waajib yiljammalan beyah.
4 Wa l‑bineeye al‑taʼajib al‑malik,
hi bas tabga malika fi badal Wachti.
» Wa l‑kalaam da ajab al‑malik wa khalaas bigi misil gaalooh.
5 Wa fi madiinat Chuucha al‑gawiiye,
fiyah raajil waahid Yahuudi usmah Mardakaay wileed Yayiir wileed Chimʼi wileed Khiich.
Wa hu min gabiilat Banyaamiin.
6 Wa l‑raajil da,
hu min naas Madiinat al‑Khudus al‑chaalaahum Nabuukhadnasar malik Baabil wa waddaahum fi l‑khurba* maʼa Yuyakiin malik mamlakat Yahuuza.
7 Wa Mardakaay,
hu kaliif Hadassa al‑binaaduuha Astiir achaan wa la indaha amm wa la abu.
Wa hi jamiile wa daggaha sameh.
Wa hi bineeyit immah wa min moot ammaha wa abuuha,
Mardakaay bas chaalaaha misil bineeytah wa rabbaaha.
Astiir fi gasir al‑malik
8 Wa baʼad simʼo kharaar al‑malik wa gaanuunah,
jaabo banaat katiiriin fi madiinat Chuucha al‑gawiiye tihit masʼuuliiyit Higaay.
Wa Astiir kulla waddooha fi l‑gasir tihit masʼuuliiyit Higaay al‑mukallaf be l‑awiin.
9 Wa l‑bineeye di ajabatah wa ligat ridaayah.
Wa tawwaali,
antaaha gisimha min al‑akil wa min al‑dihin al‑yiljammalo beyah.
Wa battaan antaaha sabʼa banaat khaddaamaat min al‑khaddaamaat al‑ahsan hana gasir al‑malik.
Wa baʼad da,
waddaaha hi wa l‑khaddaamaat deel fi l‑bakaan al‑adiil fi beet al‑awiin.
10 Wa Astiir ma oorathum wa la be ahalha wa la kadar hi Yahuudiiye achaan Mardakaay daharha ma tiʼooriihum.
11 Wa kulla yoom,
Mardakaay yamchi giddaam fadaayit beet al‑awiin achaan yalga aafiyit Astiir wa yaʼarif kikkeef gaaʼidiin yiʼaamuluuha.
12 Wa le ayyi waahide min al‑banaat deel,
baʼad 12 chahar,
doorha yaji wa l‑bineeye tamchi bakaan al‑malik Achawiruuch.
Wa hasab al‑nizaam hana l‑awiin deel,
yilmassahan be dihin al‑sibir le muddit 6 chahar wa be itir wa dihin al‑awiin le muddit 6 chahar.
13 Wa daahu kikkeef al‑bineeye tamchi bakaan al‑malik.
Yantuuha kulla cheyy al‑hi tidoor tichiilah maʼaaha min beet al‑awiin le gasir al‑malik.
14 Wa be achiiye,
hi tamchi.
Wa be fajur,
tigabbil fi beet al‑awiin al‑taani tihit masʼuuliiyit Chaʼachgaaz khaddaam al‑malik al‑mukallaf be l‑sirriiyaat.
Wa hi battaan ma tamchi bakaan al‑malik illa kan al‑malik dawwarha wa naadaaha be usumha.
Astiir bigat malika
15 Wa ja doorha le Astiir bineeyit Abihaayil immah le Mardakaay,
hi al‑Mardakaay rabbaaha.
Wa wakit ja doorha le tamchi bakaan al‑malik,
Astiir ma talabat cheyy ziyaada illa l‑wassafah leeha Higaay khaddaam al‑malik al‑mukallaf be l‑awiin.
Wa Astiir ligat rida min kulla l‑naas al‑yichiifuuha.
16 Wa jo waddo Astiir fi gasir al‑malik Achawiruuch fi l‑sana al‑saabʼe hana hukmah,
fi l‑chahar al‑usmah Tibit.
17 Wa l‑malik habbaaha le Astiir ziyaada min kulla l‑awiin.
Wa hi ligat ridaayah wa kheerah ziyaada min kulla l‑banaat al‑udriiyaat.
Wa hu dassa leeha fi raasha taaj al‑mamlaka wa sawwaaha malika fi badal Wachti.
18 Wa l‑malik sawwa aazuuma kabiire le kulla masaaʼiilah wa khaddaamiinah wa l‑aazuuma di tukhuss Astiir.
Wa amar ma yichiilu miiri min sukkaan al‑wulaayaat wa gassam hadaaya be juud al‑mamlaka.
Mardakaay najja hayaat al‑malik
19 Wa wakit lammo al‑banaat al‑udriiyaat le taani marra,
Mardakaay gaaʼid fi khachum baab gasir al‑malik.
20 Wa Astiir ma oorathum wa la be ahalha wa la kadar hi Yahuudiiye achaan Mardakaay daharha ma tiʼooriihum.
Wa Astiir gaaʼide titabbig kalaamah misil awwal wakit hi gaaʼide tihtah.
21 Wa fi l‑wakit da,
wakit Mardakaay gaaʼid fi khachum baab gasir al‑malik,
khaddaamiin itneen hurraas hana madkhal gasir al‑malik humman Bigtaan wa Tarach ziʼilo didd al‑malik Achawiruuch wa gaaʼidiin yifattuchu tariiga le yaktuluuh.
22 Wakit Mardakaay simiʼ be l‑khitta di,
hu khabbarha le l‑malika Astiir.
Wa Astiir ooratah le l‑malik wa gaalat kadar al‑khabar da jaayi min Mardakaay.
23 Wa fattacho gaʼar al‑kalaam da wa ligooh sahiih.
Wa khalaas,
chanago al‑khaddaamiin al‑itneen dool.
Wa l‑cheyy da,
katabooh giddaam al‑malik fi kitaab al‑taariikh hana l‑mamlaka.