Kitaab Nahamya
min Kutub Taariikh Bani Israaʼiil
Mugaddima
Kitaab al‑nabi Azra maʼa kitaab al‑nabi Nahamya, humman dool kataboohum fi nafs al‑wakit maʼa l‑kutub al‑usumhum Akhbaar al‑Ayyaam. Wa fi l‑wakit daak, kitaab Azra wa kitaab Nahamya kataboohum kitaab waahid bas wa laakin baʼad da, faragoohum kutub itneen.
Wakit Azra maʼa Nahamya gaaʼidiin biʼiichu, da baʼad Nabuukhadnasar malik Baabil chaal Madiinat al‑Khudus wa wadda waahidiin min naas mamlakat Yahuuza fi l‑khurba fi baladah. Wa waahidiin minhum kamaan, khallaahum fi balad Yahuuza. Wa baʼad siniin, malik Faaris ja wa chaal mamlakat Baabil. Wa baʼadeen, Artahachta malik balad Faaris ligi al‑muluk fi l‑balad di.
Wa Nahamya da, hu naadum min Bani Israaʼiil al‑bigi masʼuul kabiir fi bakaan al‑malik Artahachta. Wa Nahamya saʼal al‑malik yikhalliih yamchi yabni durdur Madiinat al‑Khudus al‑daffag. Wa l‑malik antaah izin wa gamma rassal maʼaayah askar le yiʼadduuh. Wa fi balad Yahuuza, Nahamya nazzam al‑chaʼab wa bado yabnu al‑durdur. Ligo suʼuubaat wa muʼaarada katiiriin wa laakin be da kula, humman gidro kammalo buna al‑durdur fi muddit chahareen.
Wa Azra gara kitaab al‑Tawraat le l‑chaʼab wa fi l‑wakit da, al‑chaʼab taabo wa jaddado muʼaahadathum maʼa Allah. Wa baʼad da, sawwo iid kabiir fi chaan durdur al‑madiina al‑banooh le Allah. Wa kitaab Nahamya da yiwassifna kadar kan al‑insaan yutuub le Allah, Allah kula yisaamihah.