Kitaab Azra
min Kutub Taariikh Bani Israaʼiil
Mugaddima
Kitaab al‑nabi Azra maʼa kitaab al‑nabi Nahamya, humman dool kataboohum fi nafs al‑wakit maʼa l‑kutub al‑usumhum Akhbaar al‑Ayyaam. Wa fi l‑wakit daak, kitaab Azra wa kitaab Nahamya kataboohum kitaab waahid bas wa laakin baʼad da, faragoohum kutub itneen.
Wakit Nabuukhadnasar malik Baabil ja dammar Madiinat al‑Khudus, hu chaal min naasha wa waddaahum fi l‑khurba fi balad Baabil. Wa waahidiin minhum kamaan, khallaahum fi balad Yahuuza. Wa baʼad 70 sana, malik Faaris ja wa chaal mamlakat Baabil.
Wa baʼad da, Kuurach malik balad Faaris anta izin le naas Bani Israaʼiil al‑gaaʼidiin fi l‑khurba fi balad Baabil achaan yigabbulu fi baladhum. Wa da le yabnu min jadiid beet Allah wa Madiinat al‑Khudus al‑awwal deech Baabil kassarhum. Wa naas al‑balad abo wa daharoohum al‑buna. Wa laakin humman gawwo raashum wa be izin hana l‑malik, kammalo al‑buna. Wa baʼad da, malik balad Faaris rassal Azra raajil al‑diin le Madiinat al‑Khudus. Wa hinaak, Azra ballakh be kalaam Allah wa chajjaʼ al‑naas achaan yitabbuguuh.