Kitaab Azra
min Kutub Taariikh Bani Israaʼiil
Maktuub Kuurach malik balad Faaris
1
1 Fi l‑sana al‑awwal hana hukum Kuurach malik balad Faaris,
Allah gamma yihaggig kalaamah al‑awwal gaalah be khachum al‑nabi Irmiya.*
Wa Allah anta fikir le Kuurach malik balad Faaris wa be da,
Kuurach kharrar fi kulla mamlakatah wa katab maktuub wa gaal :
2 Daahu kalaami ana Kuurach malik balad Faaris.
Allah Rabb al‑samaawaat antaani kulla mamaalik al‑ard wa kallafaani achaan nabni leyah beet fi Madiinat al‑Khudus fi balad Yahuuza.
3 Khalli ayyi waahid min chaʼabah yamchi fi Madiinat al‑Khudus fi balad Yahuuza wa Ilaahah yukuun maʼaayah wa hinaak yabni beet Allah Ilaah Bani Israaʼiil.
Wa hu al‑Ilaah al‑yaʼabuduuh fi Madiinat al‑Khudus.
4 Wa fi ayyi bakaan al‑saakniin foogah chaʼab Bani Israaʼiil fi l‑khurba,
khalli al‑naas yisaaʼuduuhum wa yantuuhum fudda wa dahab wa maal wa bahaayim wa hadaaya wa da yantuuh be niiyithum le beet Allah fi Madiinat al‑Khudus.
5 Wa khalaas,
kubaaraat gabaayil Yahuuza wa gabaayil Banyaamiin wa rujaal al‑diin wa l‑Laawiyiin wa ayyi naadum al‑antaah al‑Rabb fikir le yigabbil le Madiinat al‑Khudus wa yabni beet Allah,
dool kulluhum gaaʼidiin yijahhuzu achaan yamchu.
6 Wa kulla jiiraanhum saaʼadoohum wa antoohum muʼiddaat hana fudda wa dahab wa maal wa khumaam aakhar khaali wa bahaayim.
Wa da bala l‑musaaʼada al‑antooha be niiyithum le beet Allah.
7‑8 Wa muʼiddaat beet Allah al‑awwal chaalaahum al‑malik Nabuukhadnasar min Madiinat al‑Khudus wa jaabaahum,
dool gaaʼidiin fi beet ilaahaatah.
Wa l‑muʼiddaat dool Kuurach malik balad Faaris anta izin le Mitradaat masʼuul al‑makhaazin achaan yamrughum wa yahsibhum wa yantiihum le Chichbasar haakim balad Yahuuza.
9 Wa daahu adad al‑muʼiddaat dool,
humman 30 taasa hana dahab wa 1 000 taasa hana fudda wa 29 sakkiin
10 wa 30 kaas hana dahab wa 410 kiisaan aakhariin hana fudda wa 1 000 muʼiddaat aakhariin.
11 Wa muʼiddaat al‑dahab wa l‑fudda dool kulluhum ke adadhum 5 400.
Chichbasar chaalaahum wa waddaahum maʼaayah wakit humman gabbalo min Baabil balad al‑khurba wa macho le Madiinat al‑Khudus.