Al‑kitaab al‑taani hana
Akhbaar al‑Ayyaam
min Kutub Taariikh Bani Israaʼiil
Mugaddima
Al‑kutub al‑itneen hana Akhbaar al‑Ayyaam, zamaan humman kitaab waahid bas wa baʼad da, gassamo al‑kutub al‑itneen dool wa sammoohum 1 Akhbaar al‑Ayyaam wa 2 Akhbaar al‑Ayyaam. Wa le yaktib al‑kitaab da, al‑kaatib astaʼmal kutub al‑jo awwal wa humman dool kutub 1 Muluk wa 2 Muluuk. Wa fi chaan da, aayaat waahidiin mutachaabihiin. Wa battaan kula, aayaat waahidiin mutachaabihiin maʼa aayaat fi kutub aakhariin misil Ichaʼya wa Irmiya wa Azra.
Al‑kitaab da yihajji be taariikh hukum al‑malik Suleymaan hu al‑Allah antaah al‑hikma wa khuna katiir. Wa da bas al‑sabab al‑jaab malikat Saba le tuzuur al‑malik Suleymaan wa tichiif hikmatah wa khunaayah al‑hi simʼat beehum. Wa Suleymaan bas al‑bana beet Allah wa khatta fi lubbah sanduug muʼaahadat Allah wa addal leyah madbah wa kulla muʼiddaatah.
Al‑kitaab da yihajji be moot Suleymaan wa kikkeef Bani Israaʼiil angasamo mamaalik itneen wa humman mamlakat Yahuuza fi l‑junuub wa mamlakat Israaʼiil fi l‑munchaakh. Wa waahidiin min mulukhum adiiliin wa taabaʼo Allah wa laakin aakhariin sawwo al‑fasaala. Wa l‑kitaab da yihajji be taariikh mamlakat Yahuuza. Yabda be awwal malikha wa yihajji be muluuk aakhariin al‑baʼadah misil Aasa wa Yahuuchafat wa Yuwaach wa Uzziiya wa Hizkhiiya. Wa l‑taariikh da yamchi lahaddi Nabuukhadnasar malik Baabil ja wa dammar al‑mamlaka di wa karab min chaʼabha wa waddaahum fi l‑khurba fi Baabil. Wa fi l‑akhiir, al‑kitaab da yihajji be gabbiliinhum min al‑khurba fi baladhum.