Al‑kitaab al‑awwal hana
Akhbaar al‑Ayyaam
min Kutub Taariikh Bani Israaʼiil
Mugaddima
Al‑kutub al‑itneen hana Akhbaar al‑Ayyaam, zamaan humman kitaab waahid bas wa baʼad da, gassamo kutub itneen wa sammoohum al‑kitaab al‑awwal hana Akhbaar al‑Ayyaam wa l‑kitaab al‑taani hana Akhbaar al‑Ayyaam. Wa le yaktib al‑kitaab da, al‑kaatib astaʼmal kutub al‑jo awwal wa humman dool kitaab al‑Takwiin wa 1 Samuwiil wa 2 Samuwiil wa l‑Zabuur. Wa fi chaan da, aayaat waahidiin mutachaabihiin.
Wa kitaab Akhbaar al‑Ayyaam da yabda be gurma hana juduud Bani Israaʼiil min Adam lahaddi wakit al‑naas al‑waddoohum fi l‑khurba fi Baabil gabbalo fi baladhum. Wa baʼad da, al‑kitaab yihajji be taariikh Bani Israaʼiil gubbaal ma angasamo mamaalik itneen. Yihajji be moot hana l‑malik Chaawuul wa darrijiin hana l‑malik Dawuud. Wa battaan, yihajji be taariikh hukum Dawuud wa yanti asaame hana masaaʼiilah wa askarah wa iyaalah. Wa Dawuud sawwa cheyy katiir le yinazzim ibaadat Allah. Hu jaab sanduug muʼaahadat Allah fi Madiinat al‑Khudus wa nazzam khidmit rujaal al‑diin wa l‑Laawiyiin wa l‑khannaayiin wa hurraas al‑biibaan. Wa fi l‑akhiir, jahhaz kulla cheyy al‑waajib le buna beet Allah wa kallaf beyah wileedah Suleymaan.