Nabuukhadnasar haasar al‑madiina
25
1 Fi l‑yoom al‑aachir hana l‑chahar al‑aachir fi l‑sana al‑taasʼe hana hukum Sidkhiiya,
Nabuukhadnasar malik Baabil ja be kulla askarah le Madiinat al‑Khudus.
Wa humman nazalo wa hawwagooha be radmiiye.
2 Wa l‑madiina di gaʼadat muhaasara lahaddi sanit 11 hana hukum al‑malik Sidkhiiya.
3 Wa l‑juuʼ bigi chadiid fi l‑madiina wa l‑naas ma induhum cheyy yaakuluuh.
Wa fi l‑yoom al‑taasiʼ hana l‑chahar al‑raabiʼ,
4 gaddo khurma fi durdur al‑madiina.
Wa khalaas be l‑leel,
malik mamlakat Yahuuza wa kulla askarah marago wa arrado.
Humman marago be l‑derib al‑gaaʼid ambeenaat al‑daraadir al‑itneen hana l‑difaaʼ al‑gariib le jineenit al‑malik hatta kan al‑Baabiliyiin muhawwigiin al‑madiina kula.
Wa l‑malik Sidkhiiya chaal al‑derib al‑maachi ale waadi al‑Urdun.
5 Wa laakin askar Baabil taradooh le l‑malik wa lihgooh wa karabooh fi kadaadit Ariiha.
Wa kulla askarah arrado khallooh.
6 Wa askar Baabil karabooh le l‑malik Sidkhiiya wa waddooh fi hillit Ribla giddaam malik Baabil.
Wa fi l‑bakaan da,
haakamooh.
7 Wa humman dabaho awlaad Sidkhiiya fi giddaamah.
Wa baʼad da,
malik Baabil gaddad uyuun Sidkhiiya wa janzarah be jinziir hana nahaas matbuug wa waddaah fi Baabil.
Askar Baabil chaalo Madiinat al‑Khudus
8 Wa fi l‑yoom al‑saabiʼ hana l‑chahar al‑khaamis fi sanit 19 hana hukum Nabuukhadnasar malik Baabil,
Nabuuzaradaan kabiir al‑hurraas wa masʼuul le malik Baabil dakhal fi Madiinat al‑Khudus.
9 Wa hu tachcha beet Allah wa gasir al‑malik wa kulla buyuut Madiinat al‑Khudus.
Wa kulla buyuut al‑masaaʼiil,
hu harragaahum be naar.
10 Wa kulla askar Baabil al‑macho maʼa kabiir al‑hurraas kassaro al‑durdur al‑muhawwig Madiinat al‑Khudus.
11 Wa Nabuuzaradaan kabiir al‑hurraas chaal maʼaayah al‑chaʼab al‑faddalo fi l‑madiina wa l‑sallamo nufuushum le malik Baabil.
Wa hu chaal naas aakhariin kula wa waddaahum fi l‑khurba fi Baabil.
12 Wa laakin kabiir al‑hurraas khalla waahidiin min masaakiin al‑balad le yahartu al‑inab wa l‑ziraaʼa.
13 Wa askar Baabil kassaro amad al‑nahaas al‑giddaam beet Allah wa l‑hiitaan al‑mutaharrikiin wa l‑hoot al‑kabiir hana nahaas al‑gaaʼid giddaam beet Allah.
Wa waddo kulla l‑nahaas da fi Baabil.
14 Wa humman chaalo al‑buraam wa l‑feelaat wa l‑sakaakiin wa l‑kiisaan wa kulla l‑mawaaʼiin al‑sanaʼoohum min nahaas wa astaʼmaloohum le l‑ibaada.
15 Wa khammaamaat al‑naar wa l‑kiisaan al‑kulluhum min dahab wa fudda,
chaalaahum kabiir al‑hurraas.
16 Wa kan le l‑amad al‑itneen wa l‑hoot al‑kabiir wa l‑hiitaan al‑mutaharrikiin al‑sanaʼaahum al‑malik Suleymaan le beet Allah,
wazin nahaashum ma maʼruuf min al‑katara.
17 Wa l‑amuud al‑awwalaani,
tuulah 18 duraaʼ wa l‑amuud da khatto foogah raas hana nahaas al‑tuulah 3 duraaʼ wa muhawwag be salaasil al‑murassas fooghum rummaan wa kulluhum ke min nahaas.
Wa l‑amuud al‑taani,
sunʼitah sawa sawa misil al‑amuud al‑awwalaani be salaasilah.
18 Wa battaan kabiir al‑hurraas karab Saraaya kabiir rujaal al‑diin wa Safanya raajil al‑diin al‑naayib wa l‑hurraas al‑talaata hana madkhal beet Allah.
19 Wa min al‑madiina,
karab kabiir waahid al‑mukallaf be l‑rujaal al‑muhaaribiin wa khamsa naas min khaddaamiin al‑malik al‑ligoohum fi lubb al‑madiina.
Wa karab battaan al‑kaatib hana khaayid al‑deech,
hu al‑mukallaf be jannidiin al‑chaʼab fi l‑askariiye wa 60 raajil min al‑chaʼab al‑gaaʼidiin fi l‑madiina.
20 Wa Nabuuzaradaan kabiir al‑hurraas karabaahum masaajiin wa waddaahum le malik Baabil fi Ribla.
21 Wa malik Baabil katalaahum hinaak fi Ribla fi balad Hamaat.
Wa be misil da,
kulla naas balad Yahuuza waddoohum fi l‑khurba baʼiid min arduhum.
22 Wa kan le l‑naas al‑faddalo fi balad Yahuuza,
humman al‑Nabuukhadnasar malik Baabil khallaahum,
hu darraj Gadaalya wileed Akhigaam wileed Chaafaan haakim fooghum.
23 Wa wakit kulla khuyyaad al‑askar hana mamlakat Yahuuza wa kulla naashum simʼo kadar malik Baabil darrajah le Gadaalya haakim,
gammo macho leyah fi Misfa.
Wa l‑naas dool humman Ismaaʼiil wileed Natanya wa Yuuhanaan wileed Gaarih wa Saraaya wileed Tanhuumat min hillit Natuufa wa Yazanya min hillit Maʼaaka.
24 Wa Gadaalya halaf leehum wa le naashum wa gaal :
« Ma takhaafo min masaaʼiil al‑Baabiliyiin.
Agoodu fi l‑balad wa akhdumu tihit sultit malik Baabil wa akiid da yabga leeku adiil. »
25 Wa laakin fi l‑chahar al‑saabiʼ,
Ismaaʼiil wileed Natanya wileed Alichamaʼ min zurriiyit al‑mamlaka ja maʼa achara rujaal wa darabooh le Gadaalya wa katalooh,
hu wa naas min balad Yahuuza wa l‑Baabiliyiin al‑gaaʼidiin maʼaayah fi hillit Misfa.
26 Wa khalaas fi l‑bakaan da,
kulla chaʼab mamlakat Yahuuza,
kan kabiir walla sakhiir walla kubaaraat al‑askar kula,
gammo wa macho balad Masir achaan khaafo min al‑Baabiliyiin.
Yuyakiin talagooh min al‑sijin
27 Wa fi sanit 37 min waddo Yuyakiin malik mamlakat Yahuuza fi l‑khurba fi Baabil,
darrajo Awiil Maruudak malik fi Baabil.
Wa fi yoom 27 hana chahri 12 hana l‑sana di,
Awiil Maruudak afa Yuyakiin malik mamlakat Yahuuza wa talagah min al‑sijin.
28 Wa l‑malik hajja leyah be kalaam halu wa darrajah fi bakaan aali ziyaada min al‑muluuk al‑aakhariin al‑gaaʼidiin maʼaayah fi Baabil.
29 Wa malik Baabil khayyar khulgaan Yuyakiin hana l‑sijin wa khallaah yaakul maʼaayah daayman fi dabalaaytah fi kulla muddit hayaatah.
30 Wa be misil da fi kulla muddit hayaatah,
Yuyakiin ligi riise samhe min malik Baabil.