Al‑kitaab al‑taani hana
al‑Muluuk
min Kutub Taariikh Bani Israaʼiil
Mugaddima
Al‑kutub al‑itneen hana l‑Muluuk, zamaan humman kitaab waahid bas wa baʼad da, gassamo kutub itneen wa sammoohum 1 Muluuk wa 2 Muluuk. Wa kitaab 1 Muluuk hajja be l‑muluuk al‑hakamo fi mamlakat Israaʼiil fi l‑munchaakh wa fi mamlakat Yahuuza fi l‑wati. Wa kitaab 2 Muluuk yihajji fi l‑muluuk al‑akhiiriin hana mamaalik Israaʼiil wa Yahuuza. Wa yihajji be huruubhum al‑kaano maʼa balad Muwaab wa balad Araam wa yihajji be kikkeef muluuk waahidiin ma taabaʼo derib Allah adiil wa laakin humman abado al‑asnaam. Wa battaan yihajji be l‑nabi Alyasaʼ al‑be iidah Allah sawwa ajaayib katiiriin fi mamlakat Israaʼiil misil al‑dihin al‑abadan ma kammal wa l‑chifa hana Naʼamaan al‑mujaddim wa gawwimiin hana l‑wileed al‑mayyit.
Wa l‑kitaab da yihajji be damaar mamlakat Israaʼiil. Muluukha abo Allah wa khalaas, Allah sallamaahum le malik balad Achuur. Wa hu ja be deechah wa chaal al‑Saamira aasimat mamlakat Israaʼiil wa dammaraaha. Wa chaal min chaʼabha wa waddaahum fi l‑khurba. Wa deech balad Achuur haawal yidammir mamlakat Yahuuza wa Madiinat al‑Khudus aasimatha wa laakin ma gidro achaan Allah fazaʼ al‑mamlaka.
Wa l‑kitaab da yihajji be l‑mudda al‑gaʼadat foogha mamlakat Yahuuza wiheedha wa l‑muluuk al‑hakamo foogah. Wa l‑mamlaka di gaʼadat lahaddi Nabuukhadnasar malik Baabil ja wa haasar madiinat al‑Khudus. Wa baʼad siniin, chaal al‑madiina wa dammar beet Allah wa karab min chaʼab Bani Yahuuza wa waddaahum fi l‑khurba fi balad Baabil.